Coverdale ma le Tusi Paia Atoa na Muamua Lomia i le Gagana Peretania

I LE Tusi Paia atoa lea na muamua lomia i le gagana Peretania, e lē o taʻua ai le suafa o lē na faaliliuina. O lenā tagata o Miles Coverdale, ma na aliaʻe mai lana faaliliuga i le tausaga e 1535. O le taimi lenā o loo faafalepuipui ai lana uō o Viliamu Tiniteli, ona o ni galuega mataʻina na ia faia e fesootaʻi atu i le faaliliuina o le Tusi Paia, ma na faasalaina o ia i le oti i le tausaga na sosoo ai.

O se vaega o le faaliliuga a Coverdale e faavae mai i le faaliliuga a Tiniteli. Na faapefea ona taulau Coverdale i le lomia o lana faaliliuga e aunoa ma le faasalaina i le oti, ae o lea na faasala i le oti isi tagata faaliliu o le Tusi Paia i na aso? O le ā na mafai ona faataunuuina e Coverdale?

Ua Lūlūina Fatu

Na fanau Miles Coverdale i Yorkshire, i Egelani, atonu i le tausaga e 1488. Na aʻoga o ia i le Iunivesite i Cambridge, ma faauu ai e avea ma patele a le Katoliko Roma i le tausaga e 1514. O lona faanaunauga ina ia toe fuataʻi le lotu na lagolagoina e lona faiaʻoga o Robert Barnes. Na sola Barnes i se isi vaega o Europa i le tausaga e 1528, ma i le sefulu lua tausaga mulimuli ane, na susunuina ai o ia e taʻitaʻi lotu a o saisai i se laau.

E oo ane i le tausaga e 1528, ua talaʻi atu e Coverdale i le falesā ni manatu e tetee i aʻoaʻoga lē faale-Tusi Paia a le Katoliko, e pei o le tapuaʻi i tupua, kofesio, ma le Misasā. Ona na lamatia ai lona ola, na ia tuua ai loa Egelani ae sola atu i se isi itu o Europa, ma nofo ai i inā mo ni tausaga se fitu.

Na nonofo faatasi Coverdale ma Viliamu Tiniteli i Hamburg i Siamani. Na galulue faatasi i laʻua ona sa la mananaʻo e faia se Tusi Paia e mafai ona faitau e tagata lautele. A o faagasolo lea taimi, e tele ni mea na aʻoaʻoina e Coverdale mai iā Tiniteli e faatatau i le faaliliuina o le Tusi Paia.

Taimi mo se Suiga

O le taimi lea na suia ai le tulaga o mea i Egelani. I le tausaga e 1534, na teena ai e le tupu o Henry VIII le pule sa iai i le pope a le Katoliko i Roma. Na fiafia foʻi o ia i le manatu e faia se Tusi Paia e mafai ona faitau i ai tagata i le gagana Peretania, ma na mulimuli ane galue ai Coverdale i lenā tulaga. Sa lelei tele Coverdale i le faamatalaina o manatu i le gagana Peretania. Peitaʻi, e leʻi iai iā te ia le tomai i isi gagana e pei o lana uō ma o lona faiaʻoga foʻi, o Tiniteli, o lē sa malamalama lelei ma tautala i le gagana Eperu ma le gagana Eleni. Na faaaogā e Coverdale le faaliliuga Latina ma le faa-Siamani e toe teuteu ai le faaliliuga a Tiniteli.

Na lomia le Tusi Paia a Coverdale i Europa i le tausaga e 1535, a o lumanaʻi le faasalaga oti o Tiniteli i le isi tausaga. Na aofia ai i le Tusi Paia ni faaaloaloga faaviivii i le tupu o Henry. Na faamautinoa atu e Coverdale iā Henry e faapea, ua ia aveesea nisi o faaopoopoga a Tiniteli ia na lē fiafia iai isi tagata, ona o nisi o na faaopoopoga e taulaʻi atu i aʻoaʻoga lē faale-Tusi Paia a le Lotu Katoliko. O lea na tuu atu ai e Henry le faatagaga ma lomia ai loa le Tusi Paia. Ua amata ona suia le tulaga o mea.

 Na toe faia isi lomiga e lua o le Tusi Paia a Coverdale i le tausaga e 1537, ma na lomiaina i Egelani. I lenā lava tausaga, na faamaonia ai e le tupu o Henry se faaliliuga e taʻua o le Tusi Paia a Mataio, lea na lomia i Antwerp, ma o loo tuufaatasia ai le faaliliuga a Tiniteli ma Coverdale.

Na iloa e Thomas Cromwell, le faufautua sili a le tupu o Henry, atoa ai ma Cranmer le akiepikopō o Canterbury, le manaʻoga ina ia toe teuteu le faaliliuga o le Tusi Paia a Mataio. Na talosaga atu o ia iā Coverdale ina ia toe teuteu lenei faaliliuga o le Tusi Paia. Na faataga e le tupu o Henry lenei faaliliuga fou i le tausaga e 1539, ma na taʻua o le Great Bible ona o lona telē. Na faatonuina le faia o ni kopi o lenei Tusi Paia ina ia tuu i totonu o falesā e faitau ai tagata uma, ma na talia fiafia lenei Tusi Paia e tagata uma o le atunuu.

Le Meaalofa a Coverdale

Ina ua maliu le tupu o Henry VIII, ae soloaʻi atu Edward VI, ona tofia loa lea o Coverdale e avea ma epikopo o Exeter i le tausaga e 1551. Peitaʻi i le tausaga e 1553, na sosoo atu ai iā Edward le tupu tamaʻitaʻi o Mary, o se Katoliko, ma na tatau ai ona sola Coverdale i Tenemaka ina ia faasaoina lona ola. Mulimuli ane na siitia atu o ia i Suisilani, ma na faaauau ai i inā lana galuega. Na ia lomia foʻi ni Tusi Paia se tolu lea e masani ona taʻua o le Feagaiga Fou i le faa-Peretania, ma o loo iai foʻi ma le faaliliuga i le faa-Latina e mafai ona faaaogā e faifeʻau.

O se vala e leʻi faatalitalia i le Tusi Paia a Coverdale, o le aveesea lea o le suafa o le Atua, o “Ieova.” Na faaaogā e Tiniteli le suafa o le Atua i le silia ma le 20 taimi i lana faaliliuga o Tusitusiga Eperu. I le tusi Coverdale and His Bibles, na iloa ai e J. F. Mozley e faapea: “O le tausaga e 1535 na aveesea atoatoa ai e Coverdale le upu [Ieova].” Peitaʻi, e faatolu ona ia faaaogā mulimuli ane i le Great Bible le suafa o le Atua, o Ieova.

Peitaʻi, na avea le Tusi Paia a Coverdale ma uluaʻi Tusi Paia i le gagana Peretania, o loo iai le Tetakalamatone po o mataʻitusi e fā lea e faia aʻe ai le suafa o le Atua, i le ulutala i le itulau muamua. E lē gata i lenā, o le Tusi Paia muamua lea na faavasega ai tusi Apokerifa i se isi vaega, nai lo o le tuufaatasi ma tusi o Tusitusiga Eperu.

O le tele o faaupuga mataʻina a Coverdale na faaaogāina foʻi e nisi o tagata faaliliu. O se faataʻitaʻiga o le fuaitau lea o le “vanu o le ata o le oti” o loo i le Salamo 23 fuaiupu e 4. Na taʻua e le polofesa o S. L. Greenslade e faapea o le upu “alofa faamaoni” o loo i le fuaiupu e 6, o “se upu faapitoa e iloa ai le eseesega o le alofa mataʻina o le Atua mo ona tagata, mai le alofa masani ma le alofa mutimutivale.

O loo faamatala i le The Bibles of England, le Great Bible a Coverdale e faapea, “o le tumutumuga lea o faaliliuga uma o le Tusi Paia i le gagana Peretania, . . . mai lava i le taimi na amata ai ona faaliliuina e Tiniteli le Feagaiga Fou.” O le mea moni, o le faaliliuga a Coverdale na mafai ai e tagata e tautatala i le gagana Peretania i ona aso, ona faitau le Tusi Paia.

[Ata i le itulau 11]

Ituagavale: Tetakalamatone, mai i le ulutala i le itulau muamua o le lomiga o le 1537

[Ē Ana le Ata]

Ata: Mai i le The Holy Scriptures of the Olde and Newe Testamente With the Apocripha tusia e Myles Coverdale

[Ē Ana le Ata i le itulau 10]

Mai i le tusi Our English Bible: Its Translations and Translators