Omombeʼu Patrice Oyeka

Pytũ jeýma ohóvo, ha che ndajapói mbaʼeve ideprovechomíva. Cheaño rei ahendu rrádio ha ndavyʼái. Upéicha aiko apyta guive chesiégo. Ndaikuaasevéi mbaʼeve, apytuʼuséntema. Upévare adesidi ajesuisida. Ajagarra peteĩ venéno en pólvo, aprepara peteĩ hárrope ha amoĩ mesa ári. Péro haʼu mboyve upe venéno, aha ajahu ha añemonde porã. ¿Mbaʼérepa ajesuisidaséraʼe? Ha, ¿mbaʼéicha rupípa aikove gueteri?

ANASEVAʼEKUE el 2 de febrero de 1958, peteĩ puévlo oĩva Kasai Orientálpe (República Democrática del Congo). Che túva omanovaʼekue arekópe 9 áño, upévare che ermáno ypykue oñangareko cherehe.

Atermina rire che koléhio añepyrũkuri ambaʼapo oñeñotỹhápe caucho. Peteĩ jey áño 1989-pe, aprepara aja peteĩ infórme che ofisínape, iñypytũmbaite sapyʼa chehegui. Ñepyrũrã apensa oho hague lús, péro de día gueteri; hiʼarive ahendu ombaʼapoha pe heneradór de elektrisida. Tuichaiterei añemondýi apillávo ndahechaveimaha mbaʼevete, ni umi kuatia oĩva che renondépe.

Pyaʼeterei ajerure peteĩ empleádope chegueraha hag̃ua enfermeríape. Pe oñatendéva cherehe heʼi chéve aha hag̃ua puévlope, peteĩ doktór ivalevéva rendápe. Pe doktór heʼi oñembyaiha che rretína ha opilla ivaiha che mbaʼasy. Upémarõ chemondo kapitálpe, hérava Kinshasa.

Aheka che pohãg̃ua Kinshásape

Ag̃uahẽvo upépe, akonsulta heta okulísta ndive, péro ni peteĩva ndojapói cherehe mbaʼeve. Ahasa rire 43 día ospitálpe, umi doktór heʼi chéve ndakueramoʼãveimaha. Che hentekuéra otantea oimeraẽ mbaʼe rei akuera hag̃ua, upévare chegueraha opaichagua tupaópe oñemboʼe hag̃ua cherehe. Péro avave ndaikatúi ojapo mbaʼeve akuera hag̃ua.

Amo ipahápe ahechakuaa ndakueraveimaha arakaʼeve, ha upévare aju añamarga. Ha ndahaʼéi ndahechavéinteva, síno aperde avei che traváho, che rembireko chereja rei ha orahapaite ore kosakuéra. Apyta atĩeterei ha añemohaʼeño, ni nasẽsevéi ógagui. Apensa voi ndavaleiha mbaʼeverã.

Dos vése atantea ajesuisida. Pe amombeʼuvaʼekue haʼehína pe segundoha. Ahárõ guare aheka che hárro, ndatopavéima kuri. Ajahu aja, peteĩ mitãʼi haʼéva che pariénte, oñohẽmbáraʼe chehegui. Oikuaaʼỹre mbaʼeve pe mitã chesalva. ¡Haʼetépe katu haʼe ndoʼúi la venéno! Upéi amombeʼu che hentekuérape mbaʼépa ajapomoʼãite.

Aagradeseterei Ñandejára ha che hentekuérape akóinte oñangareko haguére cherehe. Upéi arakaʼeve natanteavéi ajesuisida.

 Hasypeve avyʼa jey

Peteĩ domingo, áño 1992-pe aguapyhína apita, upeichaháguinte mokõi testígo de Jehová og̃uahẽ ohóvo che rógape. Ha ohechávo hikuái chesiegoha, olee chéve Isaías 35:5 heʼihápe: “Upéramo umi ohechaʼỹva ohecháta, ha umi ohenduʼỹva ohendúta”. Avyʼaiterei ahendúvo upe oleéva hikuái. Umi ótro rrelihión heʼivaʼekue chemonguerataha, péro umi testígo de Jehová nahániri. Upéva rangue ohechauka chéve la Biblia rupive Ñandejára múndo pyahúpe ikatuha akuera jey, ha heʼi chéve mbaʼépa ajapovaʼerã añemoag̃uive hag̃ua Ñandejárare (Juan 17:3). Pyaʼe voi añepyrũ astudia la Biblia hendivekuéra, upearã oiporu hikuái pe lívro Usted puede vivir para siempre en el paraíso en la Tierra. Upe guive aha meme rreunionhápe Salón del Réinope, ndapitavéi ha akambia heta mbaʼépe.

Péro chesiégo rupi ndaikatúi ambaʼapove Jehovápe g̃uarã. Upévare aha peteĩ eskuéla oñemboʼehápe umi siégope, alee ha askrivikuaa hag̃ua bráillepe. Upéicha rupi ideprovechove chéve umi rreunión ojejapóva Salón del Réinope, ñandepreparáva ñamboʼe hag̃ua la Biblia. Upe riremínte añepyrũma apredika ogahárupi. Hasypeve avyʼa jey. Asegi añakarãpuʼã, upéi añemeʼẽ Jehovápe ha ajevautisa el 7 de mayo de 1994.

Ahayhuvévo Jehovápe ha che rapichakuérape, aiporuseve che tiémpo amboʼe hag̃ua la Biblia. Upévare, 1 de diciembre de 1995 añepyrũ ajapo che prekursorádo, upéva heʼise aiporuha ikatuháicha che tiémpo aipytyvõ hag̃ua che rapichakuérape oiko hag̃ua Jesús remimboʼéramo. Avei, febrero 2004 guive aservi ansiánoramo che kongregasiónpe, ha aha jepi ajapo diskúrso umi kongregasiónpe oĩva ag̃ui aikohágui. Opa koʼã mbaʼére avyʼaiterei, ha ahechakuaa ikatuha aservi Jehovápe chesiégoramo jepe.

Jehová omeʼẽ chéve peteĩ rregálo

Amombeʼúma haguéicha, che rembireko chereja apytárõ guare siégo. Péro Jehová omeʼẽ chéve peteĩ rregálo: Anny Mavambu omenda cherehe, jepeve chesiégo. Haʼe chepytyvõ rupi haʼete ku ahecha jeýva. Anny prekursóra avei, upévare rosẽ meme oñondive predikasiónpe. Avei olee jepi chéve umi informasión aikotevẽva ajapo hag̃ua che diskúrso, ikatu hag̃uáicha upéi askrivi bráillepe. Hendive ahechakuaa añeteha heʼíva Proverbios 19:14: ‘Ñande tuvakuéra oheja ñandéve hóga ha heta mbaʼe, Ñandejára katu omeʼẽ ñandéve peteĩ tembireko iñakãguapýva’.

Jehová orevendesi avei omeʼẽvo oréve mokõi mitã: peteĩ mitãʼi ha peteĩ mitãkuñaʼi. ¡Aipotaitéma og̃uahẽ pe múndo pyahu ahecha hag̃ua hovakuéra mimi! Che ermáno oheja oréve roiko ijyvýpe, ha iporãveha, haʼe oñepyrũ avei ostudia la Biblia ha ojevautisáma. ¡Koʼág̃a roime oñondivepa peteĩ kongregasiónpe!

Jehová hetaiterei mbaʼe porãma omeʼẽ chéve, upévare ajapose ikatúva guive chupe g̃uarã (Malaquías 3:10). Káda día ajerure chupe tou Irréino ha toipeʼa umi mbaʼe oporombohasa asýva. Aikuaa rupi chupe ikatu haʼe: ‘Jehová vendisión ñanemyakãrapuʼã ha nañanembohasaʼasýi’ (Proverbios 10:22).

[Nóta oĩva taʼanga ndive páhina 29]

Ajapo jave peteĩ diskúrso; che ermáno, che raʼy, che rajy ha che rembireko ndive