Jehova Nĩ Ahingũrĩte Maitho Makwa

TA ŨRĨA RŨTAARĨIRIO NĨ PATRICE OYEKA

Kwarĩ hwaĩ-inĩ. Thutha wa gũtinda mũthenya ũngĩ nduma-inĩ nene—ndĩ mũtumumu, ndĩ na ihooru, ngĩthikĩrĩria kameme mũthenya wothe—ngĩtua itua rĩa kwĩyũraga. Ngĩkĩra ndawa yarĩ na thumu gĩkombe-inĩ kĩrĩ na maĩ na ngĩigĩrĩra metha-inĩ. Ndendaga gwĩthamba riita rĩa mũthia, njĩkĩre nguo njega, njoke ndĩmĩnyue ngue. Ndendaga kwĩyũraga nĩkĩ? Na ndĩ muoyo atĩa ũmũthĩ ngĩtaarĩria ũhoro ũyũ?

NDAACIARIRŨO Februarĩ 2, 1958, mwena wa Kasaï Oriental, bũrũri-inĩ wa Congo. Baba aakuire ndĩ kahĩĩ ka mĩaka kenda, na mũrũ wa maitũ ũrĩa mũkũrũ nĩwe wanderire.

Thutha wa kũrĩkia cukuru, nĩ ndonire wĩra mũgũnda-inĩ wa mĩtĩ ya raba. Rũcinĩ rũmwe mwaka wa 1989, ngĩhaarĩria riboti ndĩ wabici yakwa, maitho makwa maagire kuona o rĩmwe, ngĩaga kuona o na hanini. Ndambĩte gwĩciria nĩ thitima ciora, no nĩ ndaiguaga njenerĩta ĩkĩruruma, na kwarĩ o rũcinĩ! Makĩte mũno, ngĩmenya atĩ ndingĩahotire kuona o na kĩ, nginya maũndũ marĩa ndandĩkaga!

O na ihenya ngĩta mũndũ ũmwe warutaga wĩra rungu rwakwa nĩguo andware kwĩ mũrigitani. Mũrigitani ũcio, akiuga njagĩrĩirũo gũtwarũo kũrĩ ndagĩtarĩ ũrĩ ũmenyeru mũingĩ taũni-inĩ. Thutha wa kũmenya atĩ maitho makwa maarĩ mathũku mũno, akĩndũma taũni ĩrĩa nene, Kinshasa.

Ũtũũro ndĩ Kinshasa

Ndĩ Kinshasa, nĩ ndonire ndagĩtarĩ aingĩ a maitho, no gũtirĩ o na ũmwe wao wahotire kũndeithia. Thutha wa gũikara thibitarĩ matukũ 43, ndagĩtarĩ makiuga atĩ ngũtũũra ndĩ mũtumumu ũtũũro wakwa wothe! Andũ a famĩlĩ itũ nĩ maandwarire kanitha-inĩ nyingĩ nĩguo mone kana nĩ ngũhonio na njĩra ya kĩama, no kĩyo kĩao gĩothe kĩarĩ o gĩa tũhũ.

Mũthia-inĩ, ngĩte mwĩhoko wa gũkaanona rĩngĩ. Maũndũ mothe matuĩkĩte nduma ũtũũro-inĩ wakwa. Ngĩũrũo nĩ maitho na ngĩũrũo nĩ wĩra. Ningĩ mũtumia wakwa akĩndiga, na agĩthiĩ na indo iria ciothe twarĩ nacio cia nyũmba. Nĩ ndaiguaga thoni gũthiĩ harĩ andũ arĩa angĩ kana kũnyitanĩra nao. Ngĩtuĩka mũndũ wa kwĩikaria na gũikaraga o nyũmba. Ndeyonaga itarĩ kĩene.

Nĩ ndageririe kwĩyũraga maita merĩ. Riita rĩa kerĩ nĩrĩo rĩtaarĩirio kĩambĩrĩria-inĩ kĩa rũgano rũrũ. Ndaahonokirio nĩ kahĩĩ kamwe ka famĩlĩ itũ. Gakĩoya na gagĩita thumu ũrĩa ndekĩrĩte gĩkombe-inĩ gatekũmenya, rĩrĩa ndethambaga. Nĩ ngenaga nĩ gũkorũo gatianyuire thumu ũcio. No nĩ ndaiguire ũũru mũno nĩ kwaga gĩkombe kĩu. Thutha ũcio nĩ ndacokire ngĩra andũ a famĩlĩ kĩrĩa gĩatũmaga njethe gĩkombe kĩu, na ũrĩa ndaabangĩte gwĩka.

Nĩ njokagĩria Ngai ngatho o hamwe na andũ a famĩlĩ nĩ gũikara makĩndoraga. Mũbango wakwa wa kwĩyũraga ũkĩaga gũkinyanĩra.

 Kũgĩa na Gĩkeno Rĩngĩ Ũtũũro-inĩ

Mũthenya ũmwe wa kiumia 1992, ndĩ wiki mũciĩ ngĩnyua thigara, Aira erĩ a Jehova nĩ mookire gwakwa makĩhunjia nyũmba kwa nyũmba. Rĩrĩa maamenyire atĩ ndĩ mũtumumu, magĩthomera Isaia 35:5: “Hĩndĩ ĩo maitho ma atumumu nĩmakahingũrũo, o namo matũ ma arĩa mataiguaga nĩmagakunũrũo.” Ngoro yakwa ĩkĩiyũrũo nĩ gĩkeno ndaigua ciugo icio! Mũgarũ na ũrĩa ndaiguĩte rĩrĩa ndathiaga kanitha iria ingĩ, Aira a Jehova matianjĩrire nĩ makũhonia na njĩra ya kĩama. Ithenya rĩa ũguo, maandaarĩirie atĩ nĩ ingĩgacokerio ũhoti wakwa wa kuona thĩinĩ wa thĩ njerũ ĩrĩa ĩranĩirũo nĩ Ngai, angĩkorũo tu nĩ ingĩerutire ũhoro wĩgiĩ Ngai. (Johana 17:3) O na ihenya ngĩambĩrĩria kwĩruta Bibilia na Aira a Jehova, tũkĩhũthĩra ibuku Unaweza Kuishi Milele Katika Paradiso Duniani. Ngĩcoka ngĩambĩrĩria gũthiĩ mĩcemanio yothe ya Gĩkristiano thĩinĩ wa Nyũmba ya Ũthamaki na ngĩka ũgarũrũku mũtũũrĩre-inĩ wakwa. Ngĩtiga kũnyua thigara.

No kwaga ũhoti wa kuona nĩ gwatũmaga njage gũkũra kĩĩroho. Kwoguo ngĩthiĩ cukuru ya atumumu nĩguo ndĩĩrute gũthoma na kwandĩka na Braille. Ũndũ ũcio nĩ wahotithirie kwĩmenyeria maũndũ ma ũtungata thĩinĩ wa Nyũmba ya Ũthamaki. Thutha wa kahinda kanini ngĩambĩrĩria kũhunjĩria andũ a itũũra. Ngĩambĩrĩria kũgĩa na gĩkeno rĩngĩ mũtũũrĩre-inĩ. Ngĩthiĩ na mbere gũkũra kĩĩroho na ngĩyamũrĩra Jehova. Ngĩbatithio Mĩĩ 7, 1994.

O ũrĩa wendo wakwa harĩ Jehova na andũ arĩa angĩ wathiaga na mbere gũkũra, ngĩĩrirĩria kũingĩra ũtungata-inĩ wa hĩndĩ-ciothe. Kuuma Dicemba 1, 1995, ngoretwo ndĩ painia wa hĩndĩ-ciothe, kana ndungata ya mahinda mothe. Ningĩ nĩ ngoretwo ngĩtungata ndĩ mũthuri wa kĩũngano kuuma Februarĩ 2004. Rĩmwe na rĩmwe nĩ heagwo mweke wa gũthiĩ kũruta mĩario ya Bibilia ciũngano-inĩ ingĩ iria irĩ hakuhĩ na gwitũ. Irathimo ici ciothe nĩ itũmaga ngĩe na gĩkeno kĩnene na igatũma menye atĩ gũtirĩ wonje ũngĩtũgirĩrĩria tũhingie wendi witũ wa gũtungatĩra Jehova Ngai.

Jehova nĩ Aheete “Maitho”

Ta ũrĩa ngũgwetete, mũtumia wakwa nĩ aandigire ndora maitho. No Jehova nĩ aheete kĩrathimo kĩngĩ. Na njĩra ya mwanya, nĩ aheete maitho ma kuona. Anny Mavambu, ũrĩa wetĩkĩrire nduĩke mũthuri wake o na itekuona, atuĩkĩte maitho makwa. Tondũ o nake nĩ mũhunjia wa mahinda mothe, tũthiaga hamwe nake ũtungata-inĩ. Ningĩ nĩ athomagĩra kũrĩa mĩario yakwa ĩroima nĩguo hote kũmĩandĩka na Braille. Akoragwo arĩ kĩrathimo kĩa mwanya harĩ niĩ. Nĩ ũndũ wake, nĩ nyonete ũũma wa ciugo cia Thimo 19:14: “Mũciĩ, o na indo, nĩ magai moimaga kũrĩ maithe, no mũtumia mũgerekereri oimaga kũrĩ Jehova.”

Ningĩ Jehova nĩ atũrathimĩte na ciana igĩrĩ, kahĩĩ na kairĩtũ. Nĩ ndĩriragĩria gũkoona mothiũ mao Paradiso! Kĩrathimo kĩngĩ nĩ atĩ mũrũ wa maitũ ũrĩa mũkũrũ, ũrĩa ũtũheete ũikaro, nĩ eetĩkĩrire ma ya Bibilia na akĩbatithio! Ithuothe tũkoragwo kĩũngano kĩmwe.

O na gũtuĩka ndionaga-rĩ, wendi wakwa mũnene nĩ gũthiĩ na mbere gũtungatĩra Ngai nĩ gũkorũo nĩ andathimĩte mũno. (Malaki 3:10) O mũthenya nĩ hoyaga Ũthamaki wake ũke nĩguo weherie mĩnyamaro yothe gũkũ thĩ. Kuuma hĩndĩ ĩrĩa ndaamenyire Jehova no njuge na ma atĩ: “Kĩrathimo kĩa Jehova nĩkĩo kĩrehage ũtonga, na ndarĩ kĩeha onganagĩrĩria nakĩo.”—Thimo 10:22.

[Mbica karatathi 15]

Ngĩruta mĩario ya Bibilia; twĩ na famĩlĩ yakwa na mũrũ wa maitũ