Yave Waziula Meso Mame

Lusansu lwa Patrice Oyeka

Lumbu kimosi muna masika, una yaviokesa diaka lumbu kiamvimba muna tombe kiasaka, mu kuma kia kimpofo ye kinsona, yabak’e nzengo za sukisa zingu kiame kiampasi ekolo yawanga konso nsangu zambote zilenda zayiswa muna rádio. Yasia nlongo miampondi muna kopo dia maza yo sia dio vana ntandu a meza. Vitila yanwa nlongo miami muna sukisa zingu kiame, yazola vo yateka yowela yo vwata mvwatu miambote. Ekuma yabakil’e nzengo za kuyivonda? Ekuma yalembi kuyivondela diaka yo zinga yamu unu mu kunusamunwina lusansu lwalu?

Y AWUTUKA kina kia 2 kia Fevelelo, 1958, kuna mvivu wa Kasaï Oriental, República Democrática do Congo. O s’ame wafwa vava yakala ye kimbuta kia mvu vwa. Mpangi ame eyakala wansansa.

Vava yafokola tanga sikola, yayantika sadila mu mpatu a nkweza (seringueira). Muna mvu wa 1989, ekolo yasalanga muna suku diame dia salu muna mene, vana vau e meso mame mabukama. Entete, yabanza vo minda miazima, kansi yawanga mazu ma gerador ye mu mene twakala. Yayantika tokana, yabakula vo meso mame mafwidi emvimba, kana nkutu e nkanda miakala vana ndambu kiamonanga mio diaka ko!

Vana vau, yabokela yakala dimosi yasalanga yandi kimana kandata kwa mfelemi. Kansi, o mfelemi wavova vo twenda vava dotolo kuna mbanza. Wau kamona vo kimbevo kiangolo yakala kiau muna meso, wamfila kuna mbanz’a kimfumu, Kinshasa.

Zingu Kuna Kinshasa

Vava twakala kuna Kinshasa, twavava madotolo mayingi mewukanga kimbevo kia meso, kansi ke mosi ko muna yau walenda kunsadisa. Una yaviokesa lumbu 43 kuna lupitalu, madotolo bavova vo kimona diaka ko muna zingu kiame kiawonso! E yitu yame bayantika kundata mu mabundu ma mpila mu mpila y’ekani dia vava mawuku mu mpil’esivi, kansi mawonso bavanga ke matwasa nluta ko.

E vuvu kia mona diaka kiadimbuka. Mawonso muna zingu kiame makituka se tombe. E meso mame mafwa yo katuka muna salu. O nkaz’ame mpe wambembola yo nata lekwa yawonso twakala yau muna nzo. Nsoni yamonanga za kala vamosi y’akaka. Yayantika kuyivambula yo wantu yo nangina muna kati kwa nzo. Yakituka nze muntu una mu pelezo, yamonanga vo kina diaka mfunu ko.

Nkumbu miole yavava kuyivonda. O nkumbu wezole, i una nzayisi kuna lubantiku lwa lusansu lwalu. Kingyana-ngyana kimosi kiantanina. Ekolo yayowelanga, wabonga e kopo diakala vana meza yo tengola maza makala mo. Ivutulanga matondo wau vo kanua mo ko. Kansi, yakendalala kikilu wau yalembi solola kopo diadina. I bosi, yazayisa yitu yame e kuma yavavilanga kopo diadina ye dina yazola vanga.

Ivutulanga matondo kwa Nzambi ye kwa yitu yame muna kundunga-lunga. Ekani yakala diau dia kuyivonda diavunzana.

 Yasolola Diaka Kiese Muna Zingu

Muna mvu wa 1992, kia Lumingu, ekolo yanuanga fomo vana mwelo a nzo, Mbangi zole za Yave basilanga umbangi mu nzo ye nzo bayiza vana yakala. Wau bamona vo i mpofo, bantangila e sono kia Yesaya 35:5 kivovanga vo: “O meso ma mpofo metemoka, o matu m’afwa matu mekakuka.” Vava yawá mvovo miami, yayangalala kikilu! Nswaswani ye mana yawanga muna mabundu yayendanga, Mbangi za Yave ke bayika wukwa mu mpil’esivi ko. Kansi, bampovesa vo ndenda mona diaka muna nz’ampa ina Nzambi kasia nsilu, kele vo nzayidi Nzambi. (Yoane 17:3) Vana vau, yayantika longoka Nkand’a Nzambi ye Mbangi za Yave muna nkanda Poderá Viver Para Sempre no Paraíso na Terra. Yayantika mpe kwenda muna tukutakanu kun’Eseka dia Kintinu yo soba zingu kiame. Yayambula nua fomo.

Kansi, o kala mpofo diankakidilanga mu nungunuka muna mwanda. Muna kuma kiaki, yakota sikola ya mpofo muna longoka tanga yo soneka Braile. Ediadi diansadisa mu kota muna sikola ya kimfumu mun’Eseka dia Kintinu. Ke vavioka kolo ko, yayantika sila umbangi kwa esi belo. Kiese kia zinga kiayantika vutuka. Yakwamanana nungunuka muna mwanda yo yekola zingu kiame kwa Yave. Yavubwa kina kia 7 kia ngonde ya Mayu, 1994.

Ekolo zola kwame muna Yave ye wantu kwawokelanga, yakala y’etima dia kota muna salu kia ntangwa ke ntangwa. Tuka kina kia 1 kia ngonde ya Desemba, 1995, yayantika sala se mviti a nzila a ngonde ke ngonde. Ngina mpe y’elau dia sala se nkuluntu muna nkutakani eto tuka muna ngonde ya Fevelelo, 2004. Ezak’e ntangwa, ibokelwanga mu nkutakani zakaka za zunga kieto mu kwenda fila elongi dia nkangu awonso. Mawonso mama kiese kiayingi mekuntwasilanga yo kunsadisa mu zaya vo ka vena kimbevo ko kilenda kutukakidila mu lungisa ekani dieto dia sadila Yave wa Nzambi.

Yave Wampana “Meso”

Nze una mpovele kala, o nkaz’ame wambembola wau vo i mpofo. Kansi Yave wampana lukau lwakaka lwamfunu. Wampana meso makaka. Anny Mavambu, ona watambulwila vo yakala nkaz’andi kana una vo i mpofo, wakituka se meso mame. Wau vo yandi mpe mviti a nzila a ngonde ke ngonde, okwendanga yame muna salu kia umbangi. Okuntangilanga mpe nkanda mina ibongelanga malongi kimana yasoneka mo muna Braile. Lusadisu lwayingi kekumpananga. Muna kuma kiandi, imonanga e ziku kia mvovo miasonama muna Ngana 19:14, oku vo: “Efwa dia mase, nzo yo mavwa: Kansi nkento anlungaladi kwa Yave ketuka.”

Mono yo Anny twasambulwa kwa Yave mu kuma kia wana wole twawuta, mosi eyakala, wakaka wa nkento. Ikalanga y’etima dia mona ndose zau muna Paradiso! E nsambu zakaka yatambula i mu kuma kia mpangi ame eyakala, ona watuvana e fulu kia zingila, watambulwila e ludi kia Nkand’a Nzambi yo vubwa. Yeto awonso mu nkutakani mosi twina.

Kana una vo i mpofo, etima diame i kwamanana kuyivana muna salu kia Nzambi mu kuma kia ulolo wa nsambu kekumpananga. (Malaki 3:10) Lumbu yawonso isambanga kimana Kintinu kiandi kiza yo sukisa mpasi zawonso ova ntoto. Tuka yazayila Yave, ndenda vova ye ziku kiawonso vo: “O lusambulu lua Yave luvwamisanga: Ketensekanga ko mpasi ko.”—Ngana 10:22.

[Mvovo mia Sina muna lukaya lwa 15]

Vava yafilanga elongi dia nkangu awonso; kumosi y’esi nzo ame yo mpangi ame