UJehova Wangivula Amehlo

Njengombana Ilandiswa nguPatrice Oyeka

Bekumalanga ntambama. Ngibe nelinye ilanga ebumnyameni obunzima tshu—ngisiphofu, nginesizungu, ngilalele ihlelo lomrhatjho elinye ngemva kwelinye—ngaqunta ukuqeda ukuphila kwami obekuzele amatlhuwo. Ngathela ipuyere enetjhefu ngekomitjini yamanzi ngayibeka etafuleni phambi kwami. Bengifuna ukududa kokugcina bese ngimbatha kuhle ngaphambi kokusela itjhefu leyo, ngiqede ngokuphila kwami. Kubayini bengifuna ukuzibulala? Begodu kwenzeka njani bona ngisaphila nanamhlanje ukulandisa indaba le?

NGABELETHWA ngoFebherbari 2, 1958, esifundeni sePumalanga yeKasaï, eDemocratic Republic of Congo. Ngahlongakalelwa ngubaba ngisesemsanyana oneemnyaka elithoba, ngakhuliswa mnakwethu.

Ngemva kokuqeda isikolo, ngafumana umsebenzi emasimini wemithi yekghomu okwenziwa ngayo iraba. Langelinye ekuseni ngo-1989, njengombana bengilungiselela umbiko e-ofisinami, ngazifumana sengisiphofu. Ekuthomeni ngacabanga bona igezi iwile, kodwana bengizwa ukuduma kwejeneretha ene bekusekuseni! Ngithukiwe, ngatjheja bona angisaboni, angiboni ngitjho namaphepha aphambi kwami!

Msinyana ngabiza enye yamadoda asebenza ngaphasi kwami bona ingise emntwini osebenza eklinigi. Indoda leyo yathi kufuze ngisiwe kibodorhodere abaphezulu edorobheni. Udorhodere atjheja bona indawo enzima elihlweni lami ithuthumbile nokobana ubujamo bepilwami bumbi, wangithumela ehlokodorobho, iKinshasa.

Ukuphila EKinshasa

EKinshasa, ngaya kibodorhodere abakhethekileko bamehlo, kodwana akekho owakwaziko ukungisiza. Ngemva kokuhlala esibhedlela amalanga ama-43, abodorhodere bathi ngizokuba siphofu ukuphila kwami koke! Amalunga womndenami angisa emasondweni ahlukahlukeneko bona ngifumane ukupholiswa ngokusimangaliso, kodwana yoke imzamwabo yaba lilize.

Emaswapheleni, ngaphelelwa lithemba bona ngisazokubona godu. Ukuphila kwami bekutjharagene. Ngaba siphofu ngalahlekelwa namsebenzi. Ngalahlekelwa namkami, owangitjhiyako, wathatha yoke into ebesinayo emzinethu. Ngazizwa ngineenhloni zokukhamba namtjhana ukuzihlanganisa nabanye abantu. Ngaba yikom’ edla yodwa ene bengihlala ngendlini. Ngazizwa ngingasililitho.

Kabili ngalinga ukuzibulala. Ihlandla lami lesibili lokulinga ukuzibulala lihlathululwe ekuthomeni kwendaba le. Ngaphuluswa mntwana omncani ekhaya. Angakanqophi wathatha ikomitji waphalaza itjhefu leyo ngisahlamba. Ngetjhudu, akhenge ayisele. Kodwana okwaba buhlungu kimi, akhenge ngisayithola ikomitji leyo. Ngemva kwalokho ngatjela amalunga womndenami bona kubayini bengiyifuna begodu yini ebengifuna ukuyenza.

Ngithokoza uZimu nomndenami ngokungitlhogomela. Ukulinga kwami ukuzibulala kwaphela.

 Ukufumana Ithabo Godu Ekuphileni

NgoSondarha ngo-1992 njengombana ngihlezi ekhaya ngibhema, aboFakazi BakaJehova ababili bangivakatjhela nebatjhumayele endlini nendlu. Batjheja bona angiboni, bangifundela u-Isaya 35:5 othi: “Ngesikhatheso amehlo weemphofu azokuvuleka, neendlebe zabangezwako zizokuvuleka.” Ngathaba khulu nengizwa amezwi layo! Ngokuhlukileko kunalokho ebengikuzwa emasondweni egade ngiwavakatjhela, aboFakazi akhenge bangithembise ukuphola ngokusimangaliso. Kunalokho, bangifundisa bona ngizokubona godu ephasini elitjha uZimu alithembisako, nengingafunda ngaye kwaphela. (Jwanisi 17:3) Khonokho, ngathoma ukufunda iBhayibhili naboFakazi, ngisebenzisa incwadi ethi Ungaphila Phakade Ngokungapheli EPharadesi Emhlabeni. Godu ngathoma ukuya kiyo yoke imihlangano yobuKrestu eWolweni LoMbuso langekhethu ngenza namatjhuguluko ekuphileni kwami. Ngalisa ukubhema.

Kodwana ubuphofu bami bebungiliya ekuthuthukeni ngokomoya. Ngalokho ngaya ehlanganweni yabaphopheleko bona ngifunde ukufunda nokutlola ngeBraille. Lokhu kwenza ngakghona ukuba nengcenye ekubandulelweni ikonzo okutholakala eWolweni LoMbuso. Msinyana ngathoma ukuhlanganyela emsebenzini wokutjhumayela kibomakhelwana. Ngathoma ukufumana ithabo ekuphileni godu. Ngaragela phambili ngithuthuka ngabe nganikela ukuphila kwami kuJehova. Ngabhabhadiswa ngoMeyi 7, 1994.

Njengombana ithando lami ngoJehova nangabantu likhula, ngaba nesifiso sokungenela ikonzo yesikhathi esizeleko. Kusukela ngoDisemba 1, 1995, bengikhonza njengephayona lesikhathi esizeleko. Godu ngaba nelungelo lokuba ngumdala ebandleni lekhethu kusukela ngo-Febherbari 2004. Ngezinye iinkhathi ngimenywa bona ngiyokunikela iinkulumo zeBhayibhili kwamanye amabandla walapho ngihlala khona. Zoke iimbusiswezi zingilethela ithabo elikhulu begodu zingisiza ukukhumbula bona abukho uburhole obungasivimbela ukuzalisa isifiso sethu sokukhonza uJehova uZimu.

UJehova Ungiphe “Amehlo”

Njengombana kutjengiswe ngaphambili, umkami wangilahla ngebanga lobuphofu bami. Kodwana ngathola esinye isibusiso kuJehova. Ngendlela ekhethekileko, wangipha amehlo wokubona. U-Anny Mavambu, owangimukela bona ngibe yindodakwakhe naphezu koburhole bami, waba mamehlwami. Bekakhamba nami qobe esimini, begodu gade angifundela iinkulumo zami bona ngizitlole ngeBraille. Sibusiso esikhethekileko kimi, ngombana naye mtjhumayeli wesikhathi esizeleko. Ngebanga lakhe, ngabona ukuba liqiniso kwamezwi weZiyema 19:14 athi: “Ilifa elivela kibobaba yindlu nomnotho, kodwana umfazi ohlakaniphileko uvela kuJehova.”

UJehova wasibusisa ngabantwana ababili—umsana nomntazana. Ngiqale phambili ekuboneni ubuso babo eParadeyisini! Esinye isibusiso kukobana umnakwethu, ngomusa owasivumela bona sihlale ejaradenakhe, wamukela iqiniso leBhayibhili begodu wabhabhadiswa! Soke sisebandleni elilodwa.

Naphezu koburhole bami, ngisafuna ukuragela phambili ngikhonza uZimu ngombana ungibusise khulu. (Malaki 3:10) Ngamalanga ngithandazela uMbuswakhe bona uze uzokususa koke ukutlhaga okusephasinapha. Solo ngazi uJehova, ngingatjho kuzale umlomo ngithi: “Isibusiso sakaJehova—ngiso esinothisako, akangezeleli ubuhlungu kiso.”—Iziyema 10:22.

[Iinthombe ekhasini 15]

Nginikela ikulumo yeBhayibhili; nginomndenami nomnakwethu