Ua Faapupulaina e Ieova Oʻu Mata

Ua Faamatalaina e Patrice Oyeka

I aso uma lava, ou te lagona le matuā mafatia, tuua toʻatasi, ma e na o loʻu faalogologo lava i le leitiō. Ae i se tasi o afiafi, sa ou filifili ai loa ou te pule i loʻu ola. Sa ou lūlū se pauta oona i le ipu vai ma tuu i luga o le laulau o loo i oʻu luma. Sa ou manaʻo ou te taʻele muamua ma fai soʻu ofu lelei a o leʻi inuina le vai oona. Aiseā na ou manaʻo ai e pule i loʻu ola? E faapefea ona ou ola mai pea, pe a fua i lenā mea na tupu?

NA OU fanau i a Fepuari 2 i le tausaga e 1958, i le itumalo o Kasaï Oriental, i le Malo Faatemokalasi o Congo. Na maliu loʻu tamā a o iva oʻu tausaga, ma na tausia aʻu e loʻu uso matua a o ou tuputupu aʻe.

Ina ua uma aʻu aʻoga, na maua saʻu galuega i le faatoʻaga o togāpulu. I se tasi o taeao i le tausaga 1989, a o sauniuni se lipoti i loʻu ofisa, na faafuaseʻi lava ona pogisa laʻu vaai. I le taimi muamua, na ou manatu ua motusia le eletise, ae na ou faalogoina o loo ola mai le afi eletise ma o le taimi foʻi lea o le taeao! Na faateʻia aʻu ona ua lē mafai ona ou iloaina se mea, e oo lava i faamaumauga o loo i oʻu luma!

Na vave lava ona ou valaau atu i le isi tamāloa e galue i lalo o laʻu vaavaaiga, ina ia ave aʻu i le tagata e gafa ma tulaga faafomaʻi i le fale faigaluega. Peitaʻi, ina ua ia mātauina ua telē se aafiaga i le vaega o oʻu mata e taʻua o le retina, na manatu ai loa o ia e tatau ona ave aʻu i le aai e vaai se fomaʻi e sili atu lona tomai, ma na ia auina atu ai aʻu i le laumua o Kinshasa.

Olaga i Kinshasa

A o oʻu iai i Kinshasa, sa vaaia aʻu e le tele o fomaʻi faapitoa mo mata, ae e leai ma se tasi o i latou na mafai ona fesoasoani mai. Ina ua uma aso e 43 a o ou iai i le falemaʻi, na faapea mai ai loa fomaʻi o le a ou tauaso i loʻu olaga atoa! Na ave aʻu e loʻu aiga i lotu eseese ina ia saʻilia se faamālōlōga faavavega, ae e leai se tasi na mafai ona faamālōlōina aʻu.

Mulimuli ane, na mou atu loʻu faamoemoe e mafai ona toe faaleleia laʻu vaai. Na matuā mafatia lava loʻu olaga. Ua ou tauaso, ma ua lē mafai ona ou toe faigaluega. Na tuua foʻi aʻu e laʻu avā, ma na alu ma ave uma mea sa i lo ma fale. Na ou lagona le mā e toe auaufaatasi ma isi tagata. Na ou faaesea aʻu lava ma e na o loʻu nofo lava i le fale. Ou te lē fia talanoa foʻi i tagata, ma na ou lagona le lē aogā.

E faalua ona ou taumafai e pule i loʻu ola. O le taimi lona lua lea na faamatala i le amataga o lenei tala. Sa sefe loʻu ola e se tamaitiiti laʻitiiti o lo matou aiga. Na ia ave ma le lē iloa le ipu ma sasaa le vai oona a o ou taʻele. Ou te lagona le lotofaafetai ona e na te leʻi inuina le vai. Ae sa ou lagona le lē fiafia ona na ou fiu e suʻe le ipu. Ona ou taʻu saʻo atu lea i lo matou aiga le māfuaaga o loʻu suʻeina o le ipu, ma le mea na ou taumafai e fai.

Ou te faafetaia le Atua ma loʻu aiga i le vaavaaia lelei o aʻu. E leʻi taulau aʻu taumafaiga e pule i loʻu ola.

 Toe Maua le Fiafia i le Olaga

I se tasi o Aso Sa i le 1992, a o oʻu nofonofo i lo matou fale ma ula laʻu tapaa, na asia ai aʻu e ni Molimau a Ieova se toʻalua a o fai la latou galuega talaʻi mai lea fale i lea fale. Ina ua la iloa ou te tauaso, ona la faitaua mai lea o le Isaia 35:5: “O lea foʻi taimi o le a faapupulaina ai mata o ē ua pō le vaai, ma o le a faalogo foʻi taliga o ē e tutuli.” Na faatumulia loʻu loto i le fiafia ina ua ou faalogo i na upu! E ese mai i mea na ou faalogo ai i lotu na ou alu i ai, e leʻi ofoina mai e Molimau se faamālōlōga faavavega. Nai lo o lea, na la faamatala mai o le a toe faaleleia laʻu vaai i le lalolagi fou ua folafolaina mai e le Atua, pe afai ou te iloa o Ia. (Ioane 17:3) Na vave lava ona amata laʻu suʻesuʻega faale-Tusi Paia ma Molimau, e faaaogā ai le tusi E Mafai Ona E Ola e Faavavau i Parataiso i Le Lalolagi. Na amata foʻi ona ou auai i sauniga uma faa-Kerisiano i le Maota mo Sauniga, ma faia suiga i loʻu olaga. Na tuu laʻu ulaula tapaa.

Sa faalavelave loʻu tulaga tauaso i loʻu agaʻigaʻi i luma faaleagaga. O lea na ou alu ai i le aʻoga mo tauaso ina ia ou iloa faitau ma tusitusi i le gagana patupatu (Braille). O lea na mafai ai ona ou auai i le toleniga mo le talaʻiga na faia i le Maota mo Sauniga. E leʻi umi ae mafai loa ona ou talaʻi atu i lo matou vaipanoa. Ua amata ona ou toe maua le fiafia i le olaga. Sa faaauau pea ona ou agaʻigaʻi i luma faaleagaga ma tuuina atu loʻu ola iā Ieova. Sa ou papatiso iā Me 7 i le tausaga e 1994.

A o tuputupu aʻe loʻu alofa mo Ieova ma tagata, na ou atiaʻe se faanaunauga ina ia avea ma faifeʻau talaʻi faataimi atoa. Talu mai Tesema 1 i le tausaga e 1995, na avea ai aʻu o se faifeʻau talaʻi faataimi atoa. Ua ou maua foʻi se faaeaga e avea ai ma toeaina o la matou faapotopotoga talu mai Fepuari i le tausaga e 2004. O nisi taimi e valaaulia ai aʻu ina ia faia se lauga faale-Tusi Paia i isi faapotopotoga i loʻu vaipanoa. O nei faamanuiaga uma ua ou maua ai le fiafia tele, ma e fesoasoani iā te aʻu e iloa ai, e lē mafai e le tulaga lē atoatoa o le malosi ona taofia i tatou, mai le faataunuuina o le faanaunauga o le fia auauna iā Ieova le Atua.

Ua Aumaia e Ieova i a te Aʻu Ni “Mata”

E pei ona taʻua muamua, na tuua aʻu e laʻu avā ona ua ou tauaso. Ae na ou maua se isi faamanuiaga mai iā Ieova. Na ia aumaia iā te aʻu i se auala faapitoa ni mata e vaai ai. Na avea Anny Mavambu ma oʻu mata, o lē na taliaina aʻu e avea ma ana tane e ui i le lē atoatoa o loʻu malosi. Ona o ia o se faifeʻau talaʻi faataimi atoa, o lea e ma te ō faatasi ai i le galuega talaʻi. E masani ona ia faitau mai iā te aʻu lomiga e faaaogā i aʻu lauga, ina ia mafai ona ou faia ni faamaumauga i le gagana patupatu. O ia o se faamanuiaga faapitoa mo aʻu. Ona o ia, ua mafai ai ona ou iloa le moni o upu o loo i le Faataoto 19:14: “O le tofi mai i tamā, o le fale ma le tamaoaiga, a o le avā e faautauta e mai iā Ieova.”

Na faamanuia mai foʻi Ieova iā te aʻu ma Anny e ala i ni fanau se toʻalua, o le tama ma le teine. Ou te naunau ina ia vaai i o la foliga i le Parataiso! O se isi faamanuiaga, o loʻu uso matua lea na lotomalie e matou te nonofo i lona fanua, sa ia talia foʻi aʻoaʻoga moni o le Tusi Paia ma papatisoina! O loo matou auai uma i le faapotopotoga e tasi.

E ui i loʻu tulaga tauaso, ae ou te naunau pea ina ia saʻili nisi auala e auauna ai i le Atua, ona ua ia faamanuia tele mai iā te aʻu. (Malaki 3:10) Ou te tatalo i aso taʻitasi ina ia oo mai lona Malo, ma aveesea ai mafatiaga uma o loo i le lalolagi. Talu ona ou iloa e faatatau iā Ieova, e mafai ona ou faapea atu ma le mautinoa: “O le faamanuiaga a Ieova, e faatamaoaiga ai ma e na te lē faaopoopo i ai se tigā.”—Faataoto 10:22.

[Ata i le itulau 13]

Faia se lauga faale-Tusi Paia; faatasi ma loʻu aiga ma loʻu uso