Yehovah opo mi ai

Soleki fa Patrice Oyeka fruteri

A ben de latilati bakadina. Wan heri dei pasa baka, pe mi ben e sidon mi wawan e arki radio èn e firi brokosaka fu di mi ben breni. Ne mi bosroiti fu kiri misrefi. Na ini wan kan nanga watra mi kanti vergif, dan mi poti en na tapu tafra. Ma fosi mi ben o dringi en, mi ben wani wasi wan lasti leisi èn weri moi krosi. Fu san ede mi ben wani kiri misrefi? Fa a du kon taki now mi de na libi ete fu kan fruteri sma a tori disi?

MI GEBORE na tapu 2 februari 1958, na ini a distrikt Kasaï Oriental, na Demokrasia Republiek Kongo. Mi papa dede di mi ben abi neigi yari èn mi bigi brada kweki mi.

Baka di mi kaba nanga skoro, mi feni wan wroko na wan balata pranasi. Wan mamanten na ini 1989 mi ben de na kantoro fu sreka a wroko. Ne wantronso mi no ben man si noti moro. Mi ben denki taki stroom fadon, ma mi ben kan yere taki a faya masyin ben e drai èn a ben de mamanten. Mi skreki srefisrefi di mi kon frustan taki mi no ben man si noti. Srefi den papira na mi fesi mi no ben man si.

Wantewante mi kari wan fu den wrokoman, dan mi aksi en fu tyari mi go na a datra fu a wrokope. A datra taigi mi fu go na foto fu suku wan moro bun datra. Di a si taki a fini buba na inisei fu mi ai kon priti, a seni mi go na Kinsyasa, a mamafoto fu Kongo.

A libi na ini Kinsyasa

Na Kinsyasa mi go na furu ai-datra, ma nowan fu den ben kan dresi mi. Baka di mi tan na ati-oso 43 dei, den datra taigi mi taki mi heri libi langa mi ben o breni. Mi famiri tyari mi go na ala sortu kerki fu den du wan wondru fu meki mi kon betre. Ma den no ben man yepi mi.

Baka wan pisi ten mi lasi ala howpu taki mi ben o man si baka. Mi no ben abi prisiri moro. Mi ben kon breni, mi ben lasi mi wroko èn mi wefi gowe libi mi. A teki ala sani na ini na oso. Mi ben syen fu go na doro noso fu moksi nanga tra sma. Heri dei mi ben tan na ini oso. Mi no ben wani sma kon na mi èn mi ben abi a firi leki na fu soso mi de na libi.

Tu tron mi pruberi fu kiri misrefi. Na a bigin fu a tori disi mi e taki fu a di fu tu leisi di mi ben wani du dati. Na wan yongu pikin fu a famiri meki taki mi no dede. Di mi ben e wasi, a pikin teki a kan di ben abi a vergif na ini, dan a trowe en na gron. Ma a no ben sabi taki vergif ben de na ini. Koloku taki a no dringi en. Toku mi ben mandi di mi no feni a kan. Baka dati mi taigi mi famiri fu san ede mi ben suku a kan èn san mi ben wani du.

Mi de nanga tangi taki Gado nanga mi famiri luku mi, so taki mi no kiri misrefi èn taki sani no waka soleki fa mi ben wani.

 Mi kisi prisiri baka nanga a libi

Wan sonde na ini 1992 di mi ben sidon na oso e smoko, tu Kotoigi fu Yehovah kon na mi oso fu preiki. Di den si taki mi breni, den leisi Yesaya 35:5 gi mi. Drape skrifi: „Na a ten dati den ai fu den breniwan o si èn den yesi fu den dofuwan o yere.” Mi ben prisiri srefisrefi di mi yere den wortu disi. Den no ben taigi mi taki mi ben o kon betre nanga yepi fu wan wondru, soleki fa mi ben gwenti yere na den kerki pe mi ben go. Ma den sori mi taki efu mi ben o kon leri sabi Gado, dan mi ben o si baka na ini a nyun grontapu di Gado pramisi (Yohanes 17:3). Wantewante mi bigin studeri Bijbel nanga den nanga yepi fu a buku Joe kan libi foe têgo na ini wan paradijs na grontapoe. Mi bigin go na ala den konmakandra na ini a Kownukondre zaal na ini a birti fu mi èn na so mi ben man kenki mi libi. Mi tapu nanga smoko tu.

Ma fu di mi breni, meki mi no ben man go na fesi fu dini Gado. Dati meki mi go na wan skoro fu leri leisi èn skrifi nanga mi finga leki fa brenisma e du. Na so mi ben kan teki prati na a skoro di e hori na ini a Kownukondre zaal, so taki mi ben kan preiki moro bun. Syatu baka dati mi bigin preiki na ini a birti fu mi. Mi bigin kisi prisiri baka na ini a libi. Mi tan go na fesi, mi gi mi libi abra na Yehovah èn na tapu 7 mei 1994 mi teki dopu.

Di mi ben kon lobi Yehovah nanga tra sma moro, mi kisi na angri fu tron wan pionier. Dati na wan preikiman di e preiki furu yuru. Sensi 1 december 1995 mi de wan gewoon pionier. Sensi februari 2004 mi kisi a grani tu fu dini leki owruman na ini mi gemeente. Son leisi den e aksi mi fu go na tra gemeente fu hori Bijbel lezing. Ala den blesi disi e gi mi furu prisiri èn den e yepi mi fu no frigiti taki awinsi wi siki, toku noti no man tapu wi fu dini Yehovah Gado.

Yehovah gi mi „ai”

Mi ben fruteri kaba taki mi wefi gowe libi mi di mi kon breni. Ma toku Yehovah gi mi wan tra blesi. Yu kan taki dati a gi mi ai fu si. Anny Mavambu, trow nanga mi aladi mi breni èn a tron mi ai. Fu di en srefi na wan pionier, meki ala ten a e go nanga mi na ini a preikiwroko. Te mi e meki mi lezing, dan a e leisi gi mi san skrifi na ini den buku di mi kan gebroiki gi den lezing dati. Na so mi kan skrifi den sani di mi yere, na a fasi fa brenisma e skrifi sani. Anny de wan bigi blesi gi mi. Fu en ede meki mi kon si taki den wortu na ini Odo 19:14 tru. Drape skrifi: „Den sani di papa e libi na baka gi den pikin fu den na wan oso nanga gudu, ma wan koni wefi na san Yehovah e gi wan man.”

Wan tra blesi di Anny nanga mi kisi fu Yehovah na taki wi kisi wan boi nanga wan meisje. Mi e angri fu si den fesi na ini Paradijs. Boiti dati, mi bigi brada di meki wi tan na a dyari fu en, kon bribi den tru tori fu Bijbel èn a teki dopu. Wi alamala de na ini a srefi gemeente.

Aladi mi breni, toku mi e angri fu du moro gi Gado fu di a gi mi so furu blesi (Maleaki 3:10). Ala dei mi e begi taki en Kownukondre kon so taki a kan puru ala pina na grontapu. Sensi di mi kon leri sabi Yehovah, mi kan taki nanga mi heri ati: „A blesi fu Yehovah, na dati e meki sma kon gudu èn a no e meki den firi sari.”​—Odo 10:22.

[Prenki na tapu bladzijde 13]

Mi e hori wan lezing; mi nanga mi osofamiri nanga mi brada