Jehova i Opim Ai Bilong Mi

Stori bilong Patrice Oyeka

Em apinun tru. Em wanpela bilong ol dispela de we mi save bel hevi stret—mi aipas, mi stap wanpis, na mi putim yau tasol long olgeta samting i kamap long redio—na mi tingting long suasaid. Mi putim wanpela paura i gat marasin nogut long en insait long kap wara na putim long tebol. Mi laik waswas laspela taim na bilas gut paslain long mi dringim dispela marasin nogut na kilim i dai mi yet. Bilong wanem mi laik suasaid? Na olsem wanem mi stap laip yet long nau na kamapim dispela stori?

MAMA i karim mi long Februeri 2, 1958 long provins Kasaï Oriental long Demokratik Ripablik Bilong Kongo. Papa bilong mi i bin dai taim mi gat 9-pela krismas, na bikbrata bilong mi i bin lukautim mi.

Taim mi pinisim skul, mi kisim wanpela wok long raba plantesen. Wanpela moning long 1989, mi wok long redim wanpela ripot long ofis bilong mi na wantu tasol mi lukim olsem ples i go tudak olgeta. Pastaim mi ting pawa i blakaut, tasol mi ken harim jenereta i wok na em i moningtaim! Mi pret taim mi luksave olsem mi no inap lukim wanpela samting, na mi no inap lukim tu ol tok mi raitim long pepa i stap long fran bilong mi!

Wantu tasol mi singautim wanpela man i wok aninit long mi long kisim mi i go long man i save lukautim liklik klinik. Orait dispela man i tok ol i mas kisim mi i go lukim wanpela bikpela dokta long taun. Taim bikpela dokta i painimaut olsem ol rop insait long ai bilong mi i bruk, em i salim mi i go long biktaun, Kinshasa.

Laip Long Kinshasa

Long Kinshasa, mi go lukim planti dokta bilong ai, tasol i no gat wanpela inap helpim mi. Mi stap 43 de long haus sik, na bihain ol dokta i tok olsem bai mi stap aipas long laip olgeta bilong mi. Ol wanfamili bilong mi i kisim mi go long kain kain lotu bambai ol lotu lain i ken wokim mirakel bilong oraitim mi, tasol olgeta samting ol i mekim i no helpim mi.

Bihain, mi givap na mi pilim olsem i no gat moa rot bilong helpim mi long lukluk gen. Olgeta samting long laip bilong mi i mekim na mi bel hevi tru. Mi kamap aipas na ol i pinisim mi tu long wok. Na tu, meri bilong mi i lusim mi na em i kisim olgeta samting long haus bilong mitupela i go wantaim em. Mi sem long go aut o bung wantaim ol narapela manmeri. Mi save stap mi yet, na olgeta taim mi stap insait tasol long haus. Mi stap wanpis na mi pilim olsem laip bilong mi i yusles tasol.

Tupela taim mi traim long suasaid. Stori bilong samting mi mekim long namba 2 taim i stap long kirap bilong dispela atikol. Wanpela liklik pikinini long famili i seivim laip bilong mi. Em i no save na em i kisim dispela kap wara na kapsaitim long graun taim mi waswas i stap. Gutpela tru olsem em i no bin dringim dispela kap wara. Tasol mi bel hevi tru olsem mi no inap painim dispela kap wara. Olsem na mi tokaut long ol wanfamili bilong mi long as na mi wok long painim dispela kap wara na mi tokaut tu long samting mi bin tingting long mekim.

Mi tok tenkyu long God na famili bilong mi long ol i lukautim mi. Mi laik suasaid, tasol plen bilong mi i bagarap.

 Mi Stap Amamas Gen

Wanpela Sande long 1992, mi sindaun smok i stap long haus na tupela Witnes Bilong Jehova i autim tok na ol i kam bungim mi long haus. Taim ol i luksave olsem mi aipas, ol i ritim tok bilong Aisaia 35:5 long mi, em i tok: “Ol aipas bai ol i lukluk, na ol yaupas bai ol i harim toktok.” Bel bilong mi i pulap tru long amamas taim mi harim dispela tok! Dispela i narapela kain long samting mi bin harim long ol narapela lotu—ol Witnes i no save wokim mirakel bilong oraitim ol man. Ol i stori gut olsem ai bilong mi inap kamap orait gen long nupela taim em God i tok promis long kamapim, sapos mi kisim save long God. (Jon 17:3) Wantu mi kirap stadi long Baibel wantaim ol Witnes Bilong Jehova long buk Yu Inap i Stap Oltaim Long Paradais Long Graun. Na tu, mi go long olgeta miting Kristen long Haus Kingdom long hap bilong mi na mi mekim ol senis long laip bilong mi. Mi lusim pasin bilong smok.

Tasol mi aipas na dispela i pasim mi long kisim sampela save moa na kamap strong long ol samting bilong lotu. Olsem na mi go long skul bilong ol aipas bilong lain long rit na rait long Brel, em rait bilong ol aipas. Dispela i opim rot long mi ken insait long skul tiokratik we i save kamap long Haus Kingdom. I no longtaim mi kirap long autim tok long ol man i sindaun long hap mi stap long en. Mi kirap mekim ol samting i givim amamas gen long mi. Mi bihainim ol tok bilong Baibel long i stap bilong mi na mi dediketim laip bilong mi long Jehova. Mi kisim baptais long Me 7, 1994.

Mi laikim tru Jehova na ol manmeri, na dispela i kirapim laik bilong mi long insait long wok bilong autim tok fultaim. Kirap long Disemba 1, 1995, mi mekim wok painia oltaim—em wok bilong autim tok fultaim. Na tu, mi amamas olsem kirap long Februeri 2004, mi mekim wok olsem elda long kongrigesen mi stap long en. Sampela taim ol narapela kongrigesen long hap bilong mi i save invaitim mi long go givim ol tok bilong Baibel long kongrigesen bilong ol. Ol dispela gutpela samting i givim bikpela amamas long mi na helpim mi long tingim olsem, maski yumi gat wanem kain bagarap long bodi, dispela i no inap pasim laik bilong yumi long mekim wok bilong God Jehova.

Jehova i Givim “Ai” Long Mi

Olsem mi bin stori pinis, meri bilong mi i bin lusim mi, long wanem, mi kamap aipas. Tasol mi kisim wanpela gutpela blesing i kam long Jehova. I olsem em i givim ai long mi bilong lukluk. Anny Mavambu i orait long maritim mi maski mi aipas, na em i stap olsem ai bilong mi. Em tu i save autim tok fultaim, olsem na olgeta taim em i save go wantaim mi long autim tok. Na tu, taim mi gat tok bilong Baibel mi mas mekim, em i save ritim ol dispela tok long mi na mi save raitim long Brel. Em i gutpela poroman tru bilong mi. Taim mi tingim em, mi pilim tru dispela tok bilong Sindaun 19:14, em i tok: “Papamama inap givim haus na mani samting long yumi. Tasol God wanpela inap givim yumi meri i gat gutpela tingting.”

Jehova i blesim mitupela Anny na mitupela i gat tupela pikinini—wanpela boi na wanpela gel. Mi laik tru long lukim pes bilong ol long Paradais! Narapela gutpela samting i olsem, bikbrata bilong mi husat i larim mipela i sindaun long graun bilong em, em i lainim tok i tru bilong Baibel na i kisim baptais! Mipela olgeta i stap long wankain kongrigesen.

Maski mi aipas, mi gat laik tru long mekim wok bilong God, long wanem, em i givim planti gutpela samting long mi. (Malakai 3:10) Long olgeta de mi save beten long Kingdom Bilong God i mas i kam na pinisim olgeta pen na hevi long graun. Kirap long taim mi kisim save long Jehova, mi pilim tru dispela tok, olsem: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.

[Ol Piksa long pes 13]

Mi mekim wanpela Baibel tok; wantaim famili na brata bilong mi