Yehova Wajura Maso Ghane

Yakuyowoyeka na Patrice Oyeka

Nkhaŵa kuti nasuzgikaso maghanoghano kwa zuŵa lose. Nkhaŵa nekha ndipo nkhapulikizganga waka pulogiramu yiliyose iyo ŵaŵika pa wayilesi. Nkhaghanaghananga vyakuti nijikome waka. Ntheura, namise nkhathira poyizoni mu kapu na kuŵika pa thebulu. Nkhakhumbanga kugeza kaumaliro na kuvwara makora paumaliro na kumwa poyizoni uyu kuti nifwe. Cifukwa wuli nkhakhumbanga kujikoma? Ndipo kasi vikenda wuli kuti nisangike wamoyo sono na kuŵa na mwaŵi wakulongosora nkhani iyi?

NKHABABIKA pa 2 Febuluwale, 1958, ku Kasaï ku Congo. Adada ŵakafwa apo nkhaŵa na vilimika 9, ndipo mukuru wane ndiyo wakanipweleleranga.

Nati namalizga sukulu nkhamba nchito pa kamupani ya makuni agho ŵakupangira mphira. Zuŵa linyake mulenji mu 1989, apo nkhalembanga lipoti mu ofesi, mwamabuci nkhasanga waka mdima bii mu maso. Pakwamba nkhaghanaghananga kuti magesi ghazimwa, kweni jeneleta nkhayipulikanga yikulira nakutiso kukaŵa mulenji. Nkhazizwa comene kuti nkhatondekanga kuwona cilicose pa pepara.

Mwaluŵiro nkhacema yumoza wa ŵanchito kuti wakanilinde ku cipatala. Wanchito uyu wati wiza wakaniphalira kuti nilute kwa dokotala mulara ku tawuni. Dokotala uyu wakati mboni za maso ghane zaphulika, ndipo suzgo lane likaŵa likuru. Ntheura wakanitumizga ku Kinshasa uwo ni msumba ukuru.

Umo umoyo ukaŵira ku Kinshasa

Ku Kinshasa uku nkhakumana na ŵadokotala ŵanandi ŵamaso, kweni palije uyo wakanovwira. Nati nakhala mu cipatala mazuŵa 43, ŵadokotala ŵakadumura kuti niŵenge wacibulumutira umoyo wose. Ŵabali ŵane ŵakanitolera ku machalichi ghakupambanapambana agho ghakuti ghakucizga mwa munthondwe kweni vikatondeka.

Paumaliro, nkhaleka waka kughanaghana vyakuti ningacira. Vinthu vikafika paheni comene. Nkhalaŵiskanga yayi, ndipo nchito yikanimalira. Muwoli wane nayo wakanicimbira ndipo wakaŵiŵa katundu yose mu nyumba. Nkhacitanga soni kufumira kuwaro kuti nkhacezgenge na ŵanthu. Nkhamba kujipatura ndipo nkhakhalanga mu nyumba mazuŵa ghanandi. Ntheura nkhakhalanga nekha ndipo nkhajiwonanga kuŵa ciswaswa.

Nkhayezgapo kaŵiri kose kuti nijikome. Kukwambilira kwa nkhani iyi ndiko nalongosora ivyo nkhacita pa ulendo waciŵiri. Kamwana kacoko comene ndiko kakaniponoska. Panyengo iyo ine nkhagezanga, kakatora kapu uyo mukaŵa poyizoni na kuthira pasi. Nkhuwonga kuti kakamwa yayi. Kweni nkhafipa mtima comene cifukwa kapu wakasoŵa. Ntheura nkhavumbura ku ŵamumbumba cifukwa ico nkhapenjeranga kapu uyu ndiposo ivyo nkhakhumbanga kucita.

Nkhuwonga Ciuta na mbumba yakwithu cifukwa ca kunipwelelera. Cilato cane cakuti nijikome cikatondeka.

 Nkhambaso Kukondwa

Zuŵa linyake pa Sabata mu 1992, Ŵakaboni ŵa Yehova ŵaŵiri ŵakanisanga panyumba nakhala pa khonde uku nkhukhweŵa hona. Ŵati ŵamanya kuti nkhulaŵiska yayi ŵakaniŵazgira lemba la Yesaya 35:5, ilo likuti: “Penepapo maso gha vinthuru ghamkujulika, makutu gha ŵakumangwa nagho ghamkubanuka.” Nkhakondwa comene nati napulika mazgu agha. Mwakupambana na ivyo nkhapulikanga ku machalichi, Ŵakaboni ŵa Yehova ŵakanicizga mwamunthondwe yayi. Kweni ŵakaniphalira kuti para namumanya Ciuta nizamulaŵiskaso mu caru ciphya ico walayizga. (Yohane 17:3) Nyengo yeneyiyo nkhamba kusambira Baibolo na Ŵakaboni. Tikasambiranga buku la Mungathe Kukhala ndi Moyo Kosatha M’paradaiso pa Dziko Lapansi. Kweniso nkhamba kuluta ku maungano ghose gha ku mpingo ndipo nkhasintha vinthu vinyake pa umoyo wane. Nkhaleka kukhweŵa.

Kweni nkhatondekanga kucita vinandi cifukwa ca maso. Ntheura, nkhaluta ku sukulu ya ŵanthu ŵacibulumutira mwakuti nkhasambire kuŵazga na kulemba. Ici cikanovwira kuti nilembeske mu sukulu ya uteŵeti iyo yikucitika pa nyumba ya Ufumu. Mwaluŵiro nkhamba kupharazgira ŵazengezgani. Nkhamba kuŵaso wacimwemwe. Nkhalutilira kucita vinandi ndipo nkhajipatulira kwa Yehova. Nkhabapatizika pa Meyi 7, 1994.

Nkhati namba kutemwa comene Yehova na ŵanthu, nkhaŵa na khumbo lakucita uteŵeti wanyengozose. Kwambira pa Disembala 1, 1995, nkhucita upayiniya wanyengozose, ndine muteŵeti wanyengozose. Naŵaso na mwaŵi wakuteŵetera nga mulara mu mpingo, kwambira mu mwezi wa Febuluwale 2004. Nyengo zinyake mipingo yinyake yikunicema kuti nkhayowoye nkhani za mu Baibolo ku mipingo yawo. Vitumbiko vyose ivi vikunipa cimwemwe ndipo vikunikumbuska fundo yakuti munthu wangatondeka kuteŵetera Yehova cifukwa ca kupendera yayi.

Yehova Wanipa “Maso”

Nga umo nalongosolera, muwoli wane wakanicimbira cifukwa maso ghane ghakafwa. Kweni Yehova wakanitumbikaso. Ningayowoya kuti wakanipa maso ghanyake. Anny Mavambu, wakazomera kuti niŵe mfumu wake nangauli ndine wacibulumutira. Ntheura, iyo ndiyo ni maso ghane. Pakuti nayo ni mupharazgi wanyengozose, tikulutira lumoza kukapharazga. Kweniso para nili na nkhani wakuniŵazgira mabuku agho mwafuma nkhani mwakuti nilembe fundo mu malemba gha ŵanthu ŵambura kuwona. Ni thumbiko lane lapadera. Cifukwa ca muwoli wane uyu, nawona kuti mazgu gha pa Zintharika 19:14 ngaunenesko. Mazgu agha ghakuti: “Nyumba na usambazi nchiharo kwa ŵawiske, kweni muwoli wa mtima wa mano wakufumira kwa Yehova.”

Yehova wali kutitumbikaso na ŵana ŵaŵiri, musepuka na msungwana. Nkhulindilira mwanweka kuzakawona visko vyawo mu Paradiso. Ndipo thumbiko linyake ndakuti mukuru wane uyo wali kutipa malo kuti tikhalengepo wali kuzomera unenesko ndipo wali kubapatizika. Tose tikuwungana mu mpingo umoza.

Nangauli ndine wacibulumutira, kweni nkhukhumba kucita vinandi pakuteŵetera Ciuta cifukwa wanitumbika comene. (Malaki 3:10) Zuŵa lililose nkhulomba kuti Ufumu wa Ciuta wize kuti uzakawuskepo masuzgo ghose pa caru capasi. Pakuti sono namumanya Yehova, ningayowoya na mtima wose kuti: “Thumbiko la Yehova likusambazga, ndipo kuti wakusazgako citima cara.”—Zintharika 10:22.

[Vithuzithuzi pa peji 13]

Nkhuyowoya nkhani; nili na mbumba yane na mukuru wane