Maan e fa e wun e mantan Ɲanmiɛn

“Á kán ɔ wun ase nían min”

BE WUN ase kanlɛ’n maan sran fɛ i wun mantan be. Afin titi e klo kɛ é fá e wun mántan be nga be ti wun ase kanfuɛ’n. Sanngɛ ng’ɔ ti tɛ andɛ’n, yɛle kɛ be wun ase kanlɛ’n ti nzuɛn kun mɔ sran’m be tɛmɛn i nglo yi kun ɔn. I li be nga be le kwlalɛ annzɛ be sie sran uflɛ’n, be yɛ nzuɛn sɔ’n i nglo yilɛ ti kekle man be kpa’n niɔn. ?Yɛ Ɲanmiɛn Zoova mɔ i kwlalɛ’n leman wunsu’n nin? ?Ɔ ti wun ase kanfuɛ? Maan e nian ndɛ nga Ɲanmiɛn nuan ijɔfuɛ Zeremi kannin’n. Ɔ seli kɛ: “Saan, ɔ wla kpɛ́n su yɛ á kán ɔ wun ase nían min. Sa nga ń fá kpɛ́n min wun wla’n yɛ ɔ o lɛ. I sɔ’n ti yɛ ń trán ḿ mínndɛ titi’n niɔn.”​—Ngwlɛ Yilɛ 3:20, 21, NW.

I nun nga Zeremi klɛ́ Ngwlɛ Yilɛ fluwa’n, nn kekle dan kpa o Izraɛli nvle’n su. Ɔ wunnin sa kun m’ɔ boli i wla dan ɔn. Sa sɔ’n yɛle Zerizalɛmu klɔ m’ɔ klo i kpa’n i sacilɛ mɔ Babilɔnifuɛ’m be sacili i’n. Ɲanmiɛn nuan ijɔfuɛ sɔ mɔ i akunndan’n w’a sanngan’n ɔ si kɛ ɲrɛnnɛn sa sɔ’n fin jɔlɛ mɔ Ɲanmiɛn dili Izraɛlifuɛ mun’n. Yɛ ɔ si kɛ i sɔ’n ti su, afin sa tɛ yolɛ’n kacili be nzuɛn. ?Sanngɛ Zeremi w’a ɲanman like kun sa m’ɔ ko fa ko cici i wla ɔ? ?Ɔ yoli i kɛ Zoova o mmua dan naan ɔ wunman be nga be kaci be nzuɛn’n naan w’a de be awlabɔɛ’n nun? Amun maan e tie ndɛ nga Zeremi kannin’n. Ɔ kɛnnin i kɛ ɔ su ijɔ i nvle’n nunfuɛ’m be nuan sa.

Kannzɛ bɔbɔ awlabɔɛ’n trannin sran’m be nun sunman lika be su’n, sanngɛ like kun cicili Zeremi i wla. Ɔ sun flɛli Zoova seli i kɛ: “Saan, ɔ wla kpɛ́n su yɛ á kán ɔ wun ase nían min.” (Ndɛ mma 20) Zeremi lafili i sɔ’n su kpa. Ɔ si kɛ Zoova i wla su fimɛn i yɛle kɛ i wla su fimɛn i nvle’n nunfuɛ nga be kaci be nzuɛn’n. ?Ɔ maan ngue yɛ Ɲanmiɛn mɔ i kwlalɛ’n leman wunsu’n ɔ́ yó ɔ?​—Sa Nglo Yilɛ 15:3.

Zeremi lafili su kpa kɛ Zoova ‘kɛ́n i wun ase nían’ be nga be aeliɛ’n yo be nsisɔ sakpa’n. Kɛ e bu ndɛ nga Zeremi kannin’n i akunndan’n, e wun kɛ Zoova ti sran m’ɔ klo sran ɔn. Zoova mɔ ‘like fi nunmɛn i sin asiɛ wunmuan’n su’n,’ sɛ é kwlá sé’n, ɔ́ kɛ́n i wun ase mɛ́n i sufuɛ mɔ b’a tɔ’n be su, kpɛkun ɔ́ fá be yó i sran kpa ekun. (Jue Mun 83:19) Like sɔ mɔ Zeremi i wla o su’n, ɔ cicili i wla kpa. Ɲanmiɛn nuan ijɔfuɛ ndɛnmanfuɛ sɔ’n, ɔ guguli kɛ ɔ́ mínndɛ blɛ nga Zoova sieli i kɛ ɔ́ dé i nvle’n nunfuɛ nga be aeliɛ’n yoli be nsisɔ’n.​—Ndɛ mma 21.

Ndɛ nga Zeremi klɛli’n, ɔ kle e Zoova i su like nɲɔn. I klikli’n yɛle kɛ Zoova ti ‘wun ase kanfuɛ.’ (Jue Mun 18:35, NW) Zoova i “fanngan’n ɔ ti dan.” Sanngɛ kɛ e wla bo e wun’n ɔ kplin su kɛ ɔ́ kɛ́n i wun ase mántan e naan ɔ́ úka e. (Zɔb 37:23; Jue Mun 113:5-7) ?I sɔ liɛ’n ciciman e wla? I nɲɔn su’n yɛle kɛ Zoova si aunnvuɛ. Sa tɛ yofuɛ nga be aeliɛ’n yo be nsisɔ mɔ be kaci be nzuɛn’n, ɔ ‘yaci be wun sa cɛ be’ kpɛkun ɔ sɔ be nun ekun. (Jue Mun 86:5) Be wun ase kanlɛ’n nin aunnvuɛ silɛ’n, be ti nzuɛn nɲɔn mɔ be kɔ likawlɛ ɔ.

Klɔ sran’m be famiɛn’m be tu be wun ti’n be ndɛ nunman sran ndɛ nun. Kɛ Zoova timan kɛ be sa’n, nanwlɛ ɔ yo e fɛ dan! ?Kɛ amun kanngannin Ɲanmiɛn m’ɔ kɛn i wun ase de i sufuɛ mun awlabɔɛ’n nun’n i su ndɛ’n, ɔ yoman amun kɛ amun suɛn i su like kpa ekun?

[Ndɛ kwle, bue 32]

Kɛ e wla bo e wun’n Zoova kplin su kɛ ɔ́ kɛ́n i wun ase mántan e naan ɔ́ úka e.