EWE napanap tipetekison a fókkun múrinné. Lap ngeni aramas ra sani chókkewe mi tipetekison. Iwe nge, a weires ach sipwe kúna emén mi enletin tipetekison, ákkáeúin me lein ekkewe mi wor ar nemenem wóón aramas. Nge, ifa usun ren Jiowa Kot, ewe mi manaman chapur lón unuselapen láng me fénúfan? I emén mi tipetekison? Sipwe etittina alón ewe soufós Jeremaia ei lón Kölün Kechü 3:20, 21, NW, a erá: “Kopwe fókkun chechchemeni, kopwe pworetiw woi. Ina met upwe chechchemeni lón letipei. Ina popun upwe mosonottam le witiwit.”

Jeremaia a makkeei ewe puken Kölün Kechü lón ewe fansoun mi échúpwúl eletipengaw lón uruwoon Israel. A kerán kúna katalóón Jerusalem ren ekkewe chón Papilon, eú mettóch mi fókkun eletipetai i. Ena soufós mi meefi riáfféú a silei pwe ina eú kapwúng seni Kot mi fichiiti chón Israel pokiten ar féfférún tipis. Nge Jeremaia mi meefi ápilúkúlúkúngaw? A meefi pwe Jiowa a fókkun towau seniir an epwe áfánni ekkewe mi aier me angasereló seni ar chúpwúl? Nengeni alón Jeremaia keei, usun itá a fós fán ásengesin néún kewe aramas.

Jeremaia a fókkun ápilúkúlúkéch lón an riáfféú. A sié ngeni Jiowa: “Kopwe * [pwisin Jiowa] fókkun chechchemeni, kopwe pworetiw woi.” (Wokisin 20). Esor án Jeremaia tipemwaramwar. A silei pwe Jiowa esap tongeni ménúki i are chókkewe mi aier lein néún kewe aramas. Nge, met Kot ewe mi unusen manaman epwe féri?​—Pwärätä 15:3.

Jeremaia a fókkun lúkú pwe Jiowa epwe “pworetiw” wóón chókkewe mi enletin aier. Pwal eú afféwún Paipel a apasa: “O chemeni me rotiw woi.” Ekkeei kapas ra álisikich le anchangei pwe Jiowa i emén mi kirekiréch. I, “Ewe mi Unusen Tekia won unusen fanüfan,” usun itá epwe rotiw wóón néún kewe aramas pwe epwe echimaretá seni ar riáfféú me etiwasefáliir ngeni an chen. (Kölfel 83:18) Ena ápilúkúlúk mi núkúchar, a fókkun aururu Jeremaia lón an chúpwúl. A fen apposa letipan an epwe mosonottam le witiwiti Jiowa le angasaaló Néún kewe aramas mi aier lón an we fansoun mi fich.​—Wokisin 21.

Ei pwóróus Jeremaia a makkeei a áiti ngenikich ruu mettóch usun Jiowa. Áeúin, Jiowa emén mi tipetekison. (Kölfel 18:35, NW) Inaamwo ika a “tekia lon an manaman,” nge usun itá a nennetiw wooch pwe epwe arap ngenikich pun a afaanikich me mochen álisikich lón ach letipeta. (Hiop 37:23; Kölfel 113:5-7) Ei pwóróus ese pwal aururu letipom? Oruuan, Jiowa emén mi úméúméch, a mwittir “amusala” tipisin chókkewe mi aier me etiwasefáliir ngeni an chen. (Kölfel 86:5) Ekkeei ruu napanap tipetekison me úméúméch ra ririfengen.

A ifa me watteen ach kilisou pwe Jiowa a sókko seni ekkewe sou nemenemen fénúfan, iir mi lamalam tekia, iwe ra tipeweires me rese áfánni aramas! A chúng letipom le alapaaló om silei ewe Kot mi tipetekison, ewe mi ‘rotiw’ wóón néún kewe aramas an epwe echimwaretá seni letipeta ngeni ápilúkúlúkéch?

[Ekis Pwóróus lón pekin taropwe 32]

Jiowa a tipemecheres le netiw wóóch ren an epwe álisikich lupwen sia letipeta