“Ou pou . . . abes ou devan mwan”
Apros avek Bondye
“Ou pou . . . abes ou devan mwan”
LIMILITE i atiran. Souvan nou santi nou atire anver bann dimoun ki annan limilite. Me malerezman dan sa lemonn ozordi, i difisil pour trouv bann dimoun ki annan vre limilite espesyalman bann ki annan lotorite oubyen ki annan pouvwar lo lezot. Ki nou pou dir lo Zeova, sa Personnaz pli pwisan dan liniver? Eski i annan limilite? Annou egzamin parol ki profet Zeremi ti dir dan Lamantasyon 3:20, 21.—Lir.
Zeremi ti ekrir Lamantasyon pandan en peryod difisil dan listwar Izrael. I ti’n fek vwar Zerizalenm ki i ti kontan ganny detrir par bann Babilonnyen e sa ti sagrin li en kantite. Sa profet ti konnen ki sa maler ti en zizman zis ki Bondye ti’n anmennen lo Izrael akoz zot ti pe fer pese. Me eski Zeremi ti san okenn lespwar? Eski i ti panse ki Zeova ti tro lwen oubyen tro o pour remark bann dimoun ki ti’n repantir e tir zot dan dezespwar? Ekoute anmezir ki Zeremi i koz pour son pep.
Menm si laplipar dimoun ti dan sagrinasyon, Zeremi ti annan bokou lespwar. I ti dir avek Zeova: “Sirman ou * pou mazin mwan e abes ou devan mwan.” (Verse 20) Zeremi ti napa okenn dout. I ti konnen ki Zeova pa ti pou oubliy li ni bann ki ti’n repantir parmi Son pep. Me ki Bondye tou pwisan ti pou fer?—Revelasyon 15:3.
Zeremi ti asire ki Zeova ti pou “abes” li devan bann ki’n vreman repantir. Sa i fer nou vwar Zeova konman en Bondye ki annan bokou tandres. Zeova, sa enn ki “Tre O lo later antye” pou abes li dan en sans senbolik e relev son bann adorater ki dan dezespwar e redonn zot son laprouvasyon. (Psonm 83:18) Sa ti vreman rekonfort leker Zeremi. Sa profet ki ti fidel ti determinen pour esper Zeova avek pasyans ziska ki i deside delivre Son pep ki ti’n repantir.—Verse 21.
Parol Zeremi i ansenny nou de keksoz lo Zeova. Premyerman, i annan limilite. (Psonm 18:35) Menm si Zeova i annan “en gran pwisans,” i pare pour vin lo menm nivo ki nou e ed nou kan nou santi nou dezespere. (Zob 37:23; Psonm 113:5-7) Pa sa i vreman rekonfortan? Dezyenmman, Zeova i demontre mizerikord, setadir i ‘pare pour pardonn’ bann dimoun ki’n repantir e redonn zot son laprouvasyon. (Psonm 86:5) Limilite ek mizerikord i mars ansanm.
Pa nou vreman rekonesan ki Zeova i pa parey bann dirizan imen ki zot lorgey i fer zot latet dir e ensansib! Eski sa i pous ou pour aprann plis lo sa Bondye ki annan limilite ki pare pour “abes” li pour rekonfort e donn lespwar son bann serviter ki dan dezespwar?
[Not anba lo paz]
^ par. 5 Dan son langaz orizinal, sa term “ou” i literalman vedir “ou nanm.” Bann profeser lalwa dan letan lontan ti sanz sa lekspresyon e met li konman “mon nanm” konmsi i ti pe refer avek Zeremi. I kler ki zot ti panse ki i pa apropriye pour refer avek Bondye konman en nanm, en term ki Labib i servi zis pour imen oubyen zannimo. Me kan Labib i dekrir Bondye, i souvan servi bann lekspresyon ki imen i byen konpran. Vi ki sa term “nanm” i kapab vedir “nou lavi,” sa fraz “ou nanm” i vedir “ou.”
[Ekstre lo paz 32]
Zeova i pare pour vin lo menm nivo ki nou kan nou santi nou dezespere
