“Hiẹ Na . . . Dẹ́ Hlan Dè E Nado Gọalọna Mi”
Dọnsẹpọ Jiwheyẹwhe
“Hiẹ Na . . . Dẹ́ Hlan Dè E Nado Gọalọna Mi”
WHIWHẸ nọ dọnmẹdogo. E nọ saba bọawu nado dọnsẹpọ mẹhe tindo whiwhẹ lẹ. Ṣigba, e blawu dọ whiwhẹ nujọnu tọn masọ tin to aihọn egbehe tọn mẹ ba, podọ ehe nọ họnwun titengbe to nuyiwa mẹhe tindo huhlọn kavi aṣẹpipa do mẹdevo lẹ ji lẹ tọn mẹ. Ṣigba, etẹwẹ dogbọn Jehovah Jiwheyẹwhe, Mẹhe yin huhlọnnọ hugan to wẹkẹ lọ mẹ dali? Be ewọ yin whiwhẹnọ ya? Gbọ mí ni gbadopọnna hogbe yẹwhegán Jelemia tọn he tin to Avigbè Jelemia tọn 3:20, 21, NW mẹ lẹ he dọmọ: “Hiẹ na flin mi bo dẹ́ hlan dè e nado gọalọna mi dandan. Ehe wẹ yẹn na hẹn do ahun ṣie mẹ. Enẹwutu wẹ yẹn na yí homẹfa do nọte.”
Jelemia wlan owe Avigbè Jelemia tọn to whenue akọta Islaeli tọn to jujugbọn ojlẹ sinsinyẹn de mẹ. E ṣẹṣẹ mọ nujijọ de he hẹn awubla wá na ẹn taun—enẹ wẹ vasudo Jelusalẹm he e yiwanna lọ tọn gbọn Babilọninu lẹ dali. Yẹwhegán he to awubla mẹ lọ yọnẹn dọ nugbajẹmẹji enẹ sọgbe, na ylanwiwa Islaelivi lẹ tọn wutu wẹ Jiwheyẹwhe hẹn whẹdida enẹ wá yé ji. Ṣigba, be todido depope masọ tin na Jelemia ba wẹ ya? Be e lẹndọ Jehovah dẹn do yé sọmọ bo ma na doayi yé mẹhe lẹnvọjọ lẹ go bo de yé sọn flumẹjijẹ mẹ wẹ ya? Pọ́n nuhe Jelemia dọ do omẹ etọn lẹ tamẹ.
Mahopọnna awubla lọ, Jelemia ma hẹn todido bu. E dawhá ylọ Jehovah dọmọ: “Hiẹ na flin mi bo dẹ́ hlan dè e nado gọalọna mi dandan.” (Wefọ 20) Jelemia ma tindo ayihaawe depope. E yọnẹn dọ Jehovah ma na wọnji emi kavi omẹ Etọn he lẹnvọjọ lẹ go gba. To whelọnu lo, etẹwẹ Jiwheyẹwhe ganhunupotọ lọ na wà?—Osọhia 15:3.
Jelemia deji dọ Jehovah na “dẹ́” nado gọalọna mẹhe lẹnvọjọ nugbonugbo lẹ. Hogbe ehe gọalọna mí nado mọdọ Jehovah yin dagbewanyinọ. Jehovah he yin “Gigogán to wẹkẹ lẹpo ji” na dẹ́ to yẹhiadonu-liho nado de sinsẹ̀n-basitọ etọn lẹ sọn ninọmẹ winyan tọn he mẹ yé tin te bọ yé na vọ́ nukundagbe etọn mọ whladopo dogọ. (Psalm 83:18) Todido mẹhẹnlodo tọn ehe miọnhomẹna Jelemia sọn awubla etọn mẹ. Enẹwutu, yẹwhegán nugbonọ lọ magbe nado yí homẹfa do nọtepọn Jehovah kakajẹ ojlẹ dide he mẹ Ewọ na tún omẹ Etọn he lẹnvọjọ lẹ dote.—Wefọ 21.
Kandai Jelemia tọn plọn mí onú titengbe awe gando Jehovah go. Tintan, ewọ yin whiwhẹnọ. (Psalm 18:35) Dile etlẹ yindo Jehovah yin “yẹyi dahonọ to huhlọn mẹ,” ewọ wleawufo nado ze ede whè bo gọalọna mí to whenue mí jẹflumẹ. (Job 37:23; Psalm 113:5-7) Be e ma yin homẹmiọnnamẹnu de wẹ enẹ yin ya? Awetọ, lẹblanunọ wẹ Jehovah yin; ewọ nọ “wleawu nado jona” ylanwatọ he lẹnvọjọ lẹ bo kẹalọyi yé whladopo dogọ. (Psalm 86:5) Jẹhẹnu awe ehelẹ—yèdọ whiwhẹ po lẹblanu po—nọ zọnpọ.
Mí dopẹ́ taun dọ Jehovah ma taidi gandutọ he goyiyi nọ sisẹ́ nado yin tasinyẹntọ po okànọ po lẹ gba! Be hiẹ yin whinwhàn nado plọn nususu dogọ gando Jiwheyẹwhe whiwhẹnọ lọ go, yèdọ mẹhe wleawufo nado “dẹ́” nado sọgan na todido sinsẹ̀n-basitọ etọn he jẹflumẹ lẹ ya?
[Nudọnamẹ tangan lẹ to weda 22]
Jehovah wleawufo nado ze ede whè bo gọalọna mí to whenue mí jẹflumẹ
