MAKAAY-AYO a galad ti kinapakumbaba. Masansan a naasideg ti riknatayo kadagidiay napakumbaba. Ngem nakalkaldaang ta manmanon ti tao a pudno a napakumbaba nangnangruna kadagidiay addaan iti autoridad. Ni ngay Jehova a Dios, ti Katan-okan a Persona iti intero nga uniberso? Napakumbaba met kadi? Usigentayo ti sasao ni propeta Jeremias a masarakan iti Un-unnoy 3:20, 21.​—Basaen.

Idi insurat ni Jeremias ti Un-unnoy, nakaay-ay-ay ti kasasaad ti Israel. Maladingitan unay ta nasaksianna ti panangdadael dagiti Babilonio iti ipatpategna a Jerusalem. Ammo ti maladingitan a propeta a dayta a didigra ket maiparbeng a pannusa ti Dios kadagiti Israelita gapu kadagiti dakes nga aramidda. Ngem awan kadin ti namnama ni Jeremias? Impapanna kadi a naadayo wenno di maseknan ni Jehova kadagidiay agbabbabawi a dinan tulongan ida? Imdengantayo ni Jeremias bayat nga agsao maipaay iti ilina.

Nupay agladladingit ti kaaduan nga umili, napnuan namnama ni Jeremias. Immararaw ken Jehova: “Di bumurong a lagipento ti kararuam * [ni Jehova a mismo] ket agrukob maigapu kaniak.” (Bersikulo 20) Sigurado ni Jeremias nga isu ket saan a lipaten ni Jehova agraman dagiti agbabbabawi a kailianna. Ngem ania ti aramiden ti mannakabalin-amin a Dios?​—Apocalipsis 15:3.

Mangnamnama ni Jeremias a ni Jehova “agrukob” kadagidiay pudno nga agbabbabawi. Dayta a sao iladawanna ti kinadungngo. “Ti Kangatuan iti intero a daga” a ni Jehova, arigna agrukob tapno ibangonna dagiti adipenna manipud iti pannakaipababada ken anamonganna manen ida. (Salmo 83:18) Gapu iti dayta a namnama, talaga a naliwliwa ni Jeremias. Determinado ti matalek a propeta nga aguray agingga iti tiempo nga inkeddeng ni Jehova tapno ispalenna ti agbabbabawi nga ilina.​—Bersikulo 21.

Adda masursurotayo maipapan ken Jehova manipud iti insurat ni Jeremias. Umuna, napakumbaba ni Jehova. (Salmo 18:35) Nupay “natan-ok iti pannakabalin,” sidadaan ni Jehova nga agpakumbaba tapno tulongannatayo no marigrigatantayo. (Job 37:23; Salmo 113:5-7) Saan kadi a makaliwliwa dayta kadatayo? Maikadua, naasi ni Jehova; “sisasagana a mamakawan” kadagidiay agbabbabawi a nakabasol ken anamonganna manen ida. (Salmo 86:5) Agkuykuyog dagitoy dua a galad​—ti kinapakumbaba ken asi.

Anian a makaparagsak ta ni Jehova ket saan a kas kadagiti tattao nga addaan autoridad, a naturay ken saanda a mannakipagrikna gapu ta natangsitda! Dika kadi matignay a mangammo iti ad-adu pay maipapan iti napakumbaba a Dios a sidadaan nga “agrukob” tapno ibangonna dagiti adipenna manipud iti narigat a kasasaadda?

Singasing a Basaen iti Hunio:

▪ Jeremias 51-52; Un-unnoy 1-5–Ezequiel 1-5

[Footnote]

[Blurb iti panid 14]

Sidadaan ni Jehova nga agpakumbaba tapno tulongannatayo no marigrigatantayo