“Eie [Jihova] . . . Ua-nda Kotamena ku Thandu Diami”
Zukama Kua Nzambi
“Eie [Jihova] . . . Ua-nda Kotamena ku Thandu Diami”
O KU LENDUKA, kídifua kia uabha. Etu tua uabhela ku zukama ku athu a lenduka. Maji lelu ku bhonza kiavulu ku sanga athu a lenduka—bhenge-bhenge ió ala ku pholo ia akuâ. Ihi i tuamba ia lungu ni Jihova Nzambi, o Muthu ua beta o kutena mu ngongo? O kuila muéne muthu ua lenduka? Tu di longe ihi iambe o polofeta Jelemiia mu divulu dia Kuditenda 3:20, 21, NW.
Jelemiia ua soneka o divulu dia Kuditenda kioso kia kexile ni malamba, mukonda dia ima ieji bhita ni akua Izalaiele. Muéne ueji mona o kibuikilu—kia Jeluzaleme, ku akua Babilonha, kiki kieji mu bhekela ndolo iavulu. Né muene ni malamba mê, muéne uejidile kuila Nzambi muéne ueji buika o akua Izalaiele mukonda dia ituxi iâ. O kuila Jelemiia ka kexile dingi ni kidielelu? O kuila muéne ua banzele kuila Jihova keji tena ku mona ió a diela o ituxi iâ, ni ku kamba ku a bhana kidielelu? Tu di longe ihi iambe Jelemiia ua kexile ku pholo ia mundu uê.
Jelemiia ua kexile ni kidielelu, sumbala ua luualele. Muéne ua di kola kua Jihova: “Muenhu [uê Jihova Nzambi] hanji uala ku i lembalala, anga u ngi kotamena ku thandu diami.” (Velusu 20) Jelemiia ka kexile ni phata. Muéne uejidile kuila Jihova keji mu jimba—mba ku jimba o mundu Uê ua diela. Ihi ieji bhanga Nzambi, o muteni-ia-ioso?—Dijingunuinu 15:3. *
Jelemiia uejidile kuila Jihova ueji “kotamena” ió a diela mu kidi. O Bibidia ia mukua izuela: “U ngi lembalala, u ngi kotamena.” O izuelu íii, ilondekesa o henda ia Nzambi. Jihova, “Suke-ku mu ngongo ioso,” ua-nda kotamena ni ku zangula o abhizi’ê mu ku a bheka dingi ko kuê ni ukexilu uambote bhu pholo iê. (Jisálamu 83:18) Mu ku banza mu kikanenu kiki, Jelemiia ua kondo o malamba mê. O polofeta ia fiiele ua kexile ni muanhu ua ku kingila o kithangana kia Jihova kia ku bhulula o mundu Uê ua diela.—Velusu 21.
O izuelu ia Jelemiia i tu longa ima iiadi ia lungu ni Jihova. Kia dianga, muéne muthu ua lenduka. (Jisálamu 18:35) Sumbala muéne muthu “ukôla mu kutena kuê,” Jihova uala polondo phala ku tu kuatekesa, kioso ki tu kala ni malamba ku muxima. (Jobe 37:23; Jisálamu 113:5-7) O izuelu íii ki i tululukisa o muxima? Kaiiadi, Jihova muthu uambote; muéne ‘u lenguluka ku loloka,’ o athu a diela o ituxi iâ, u ehela ku kala ni ukexilu uambote bhu pholo iê. (Jisálamu 86:5) O ídifua íii iiadi—o ku lenduka ni henda—enda kumoxi.
Tua sakidila kiavulu mu kuijiia kuila Jihova ka difu ni jinguvulu, ene mu dizangeleka, ka mesena o mbote ia’thu! O kuila ua mesena kuijiia o Nzambi ia lenduka, uala polondo phala ku “kotamena” ku thandu dia abhezi’ê, ni ku a zangula, ni ku a bhana kidielelu kioso kia kala ni malamba?
[Tanga mu luji]
^ kax. 5 M’ukulu o jimesene ja kitumu, a lungulula o velusu íii mu kuzuela “muenhu uami,” kala a mu tumbula Jelemiia. Ene a banzele kuila ki kia fuamene ku tumbula Nzambi kala muenhu, o Bibidia i tumbula o kizuelu kiki ku athu mu ngongo. Maji o Bibidia i tumbula Nzambi mu ukexilu ua muthu phala ku tu kuatekesa ku mu ijiia. O kizuelu “muenhu” kilombolola “o muenhu u tuala nau” o izuelu “muenhu uê” ilombolola “eie.”
[Kilombuelelu ku bandu 32]
Jihova uala polondo phala ku tu kuatekesa, kioso ki tu kala ni malamba ku muxima
