Ruwaakl̦o̦k Ñan Anij

“Kwõnaaj . . . M̦allal̦tak ñan Ippa”

ETTÃ bõro ej juon men ekanooj in em̦m̦an im aorõk. Ekkã an pidodo ad kepaake armej ro me ettã bũrueer. Ak ekabũrom̦õjm̦õj bwe ejeja armej rainin me elukkuun ettã bũruon, el̦aptata, ippãn ri utiej ro ak ro ewõr aer maroñ ioon ro jet. Ak ta kõn Jeova Anij, Eo im eutiejtata im kajoortata ioon aolepen lañ im lal̦? Ettã ke bũruon? Ri kanaan Jeremaia ear ba: “Ij lõke bwe kwõnaaj keememej eõ im m̦allal̦tak ñan ippa. Eñin men eo inaaj keememeje ilo bũruõ. Eñin unin inaaj kõttar wõt eok.” (Liaajlo̦l̦ 3:​20, 21, NW) Jen etale ta mel̦el̦ein naan kein an Jeremaia.

Jeremaia ear je bok in Liaajlo̦l̦ ilo juon iien eo me ear kanooj pen im kabũrom̦õjm̦õj ilo bwebwenatoon mour eo an Ri Israel ro. Jeremaia ej kab m̦õj an lo juon men ekabũrom̦õjm̦õj ear wal̦o̦k im ear lukkuun bũrom̦õj im rup bũruon kake. Ilo iien in, Ri Babilon ro rar ko̦kkure im kajeepepl̦o̦k Jerusalem. Meñe ri kanaan in ear inepata im bũrom̦õj, ak ear jel̦ã bwe unin an Anij kar bõktok ekajet ioon Ri Israel ro ej kõnke rar kõm̦m̦ani men ko renana. Ak ear ke ejjel̦o̦k an Jeremaia kõjatdikdik? Ear ke l̦õmn̦ak bwe Jeova ear pãd ettol̦o̦k im ejjab l̦õmn̦ak kõn ro rar ukel̦o̦k bwe en kajutak er jãn aer ebbeer im bũrom̦õj? Eokwe, jen lale naan ko an Jeremaia ñan Jeova ke ear kõnono ikijjeen armej in Israel.

Meñe enañin aolep rar bũrom̦õj im rup bũrueer, Jeremaia ear obrak kõn kõjatdikdik. Ear lam̦õj im ba ñan Jeova: “Ij lõke bwe kwõnaaj [Jeova] keememej eõ im m̦allal̦tak ñan ippa.” (Eoon 20) Jeremaia ear jab pere men in ñan jidik. Ear jel̦ã bwe Jeova enaaj keememej e im armej ro doon me rar ukel̦o̦k. Ak ta eo Anij eo ekajoor bõtata enaaj kõm̦m̦ane?​—Revelesõn 15:⁠3.

Jeremaia ear lõke bwe Jeova enaaj “m̦allal̦tak” ñan ippãn ro im rar m̦ool aer ukel̦o̦k. Naan kein rej jipañ kõj ñan pijaik Jeova ilo l̦õmn̦ak ko ad ãinwõt juon eo ejouj im tũriam̦o. Jeova, eo im “Eutiejtata ioon aolepen lal̦,” enaaj m̦allal̦tak ilo kõkkar, im kajutak ro doon jãn aer bũrom̦õj im bar kajepl̦aak er ñan ippãn. (Sam 83:​18) Kõn an Jeremaia pen ilo kõjatdikdik in, men in ear maroñ kaenõm̦m̦an bũruon. Ri kanaan in etiljek ear kate e im kõttar wõt iien eo em̦õj an Jeova karõke ñan lo̦mo̦o̦ren armej ro doon im rar ukel̦o̦k.​—Eoon 21.

Naan kein an Jeremaia rej katakin kõj ruo men ko kõn Jeova. Kein kajuon, Jeova ettã bũruon. (Sam 18:​35, NW) Meñe Jeova “ekajoor bõtata,” ak ej m̦õn̦õn̦õ in wanlal̦tak ilo kõkkar ñan joñan l̦ãbõl̦ eo ad bwe en jipañ kõj ñe jej bũrom̦õj. (Job 37:23; Sam 113:​5-7) Men in ejjab ke kaenõm̦m̦ane kõj? Kein karuo, Jeova el̦ap an tũriam̦o; epojak in “jol̦o̦k bõd” ko an ro rej ukel̦o̦k im bar kajepl̦aak er ñan ippãn. (Sam 86:⁠5) Ettã bõro im tũriam̦o rej aolep iien rejetake doon.

Jej lukkuun kam̦m̦oolol bwe Jeova ejjab ãinwõt irooj im ri tõl ro an lal̦ me kõn aer utiej bũrueer ekõm̦m̦an bwe en pen bũrueer im ejjel̦o̦k aer tũriam̦o kõn armej! Kokõn̦aan ke kal̦apl̦o̦k am̦ jel̦ã kõn Anij eo ettã bũruon, eo im ej m̦õn̦õn̦õ in “m̦allal̦tak” bwe en jipañ im lel̦o̦k kõjatdikdik ñan ro doon jãn aer bũrom̦õj im ebbeer?

[Pija ilo peij 32]

Jeova ej m̦õn̦õn̦õ in wanlal̦tak ilo kõkkar ñan joñan l̦ãbõl̦ eo ad bwe en jipañ kõj ñe jej bũrom̦õj