“Ruħek . . . Titbaxxa Lejja”
Ersaq Qrib Lejn Alla
L-UMILTÀ hi kwalità mill-isbaħ. Spiss ninġibdu lejn dawk li huma umli. Imma b’dispjaċir l-umiltà ġenwina hi diffiċli ħafna biex issibha fid-dinja llum—speċjalment fin-nies li għandhom il-poter jew l-awtorità fuq ħaddieħor. Xi ngħidu dwar Alla Ġeħova, l-iktar Persuna setgħana fl-univers? Huwa umli? Ejja neżaminaw il-kliem tal-profeta Ġeremija li nsibu f’Lamentazzjonijiet 3:20, 21.—Aqra.
Ġeremija kiteb il-Lamentazzjonijiet fi żmien diffiċli fl-istorja taʼ Iżrael. Kien għadu kemm ra xi ħaġa li nikktitu ferm—il-qerda tal-belt għażiża tiegħu Ġerusalemm mill-Babiloniżi. Il-profeta li kellu qalbu sewda kien jaf li dan il-gwaj kien ġudizzju divin ġust fuq l-Iżraelin minħabba l-ħajja midinba tagħhom. Imma Ġeremija tħalla bla tama? Ħass li Ġeħova kien indifferenti jew ’il bogħod wisq biex jinnota lill-uħud nedmin u jeħlishom mill-inkwiet? Agħti widen hekk kif Ġeremija jitkellem għan-nom tal-poplu tiegħu.
Għalkemm il-biċċa l-kbira tan-nies huma mnikktin, Ġeremija hu mimli tama. Hu jgħajjat lil Ġeħova: “Żgur li ruħek a [Ġeħova stess] tiftakar u titbaxxa lejja.” (Vers 20) Ġeremija m’għandux dubju. Hu jaf li Ġeħova mhux se jinsa lilu—jew lil uħud nedmin mill-poplu Tiegħu. Allura, x’se jagħmel Alla li jistaʼ kollox?—Rivelazzjoni 15:3.
Ġeremija hu ċert li Ġeħova se ‘jitbaxxa lejn’ dawk li jkunu verament nedmin. Dan il-kliem jgħinna nimmaġinaw lil Ġeħova bħala xi ħadd qalbu tajba. Ġeħova, “l-Iktar Għoli fuq l-art kollha,” se jitbaxxa, biex ngħidu hekk, u jerfaʼ lill-aduraturi tiegħu mill-kundizzjoni baxxa li jkunu fiha u jerġaʼ jagħtihom l-approvazzjoni tiegħu. (Salm 83:18) Peress li Ġeremija għandu qabda soda maʼ din it-tama, isib faraġ veru għall-qalb muġugħa tiegħu. Il-profeta leali hu determinat li jistenna bis-sabar saż-żmien li Ġeħova għażel biex jeħles lill-poplu niedem Tiegħu.—Vers 21.
Il-kliem imniżżel minn Ġeremija bażikament jgħallimna żewġ affarijiet dwar Ġeħova. L-ewwel, hu umli. (Salm 18:35) Għalkemm hu “sublimi fil-qawwa,” Ġeħova hu lest li jinżel għal-livell tagħna, biex ngħidu hekk, ħalli jgħinna meta nkunu dipressi. (Ġob 37:23; Salm 113:5-7) Mhuwiex dan ħsieb li jfarraġna? It-tieni, Ġeħova hu ħanin; ‘lest li jaħfer’ lill-midinbin nedmin u jilqagħhom lura billi japprovahom. (Salm 86:5) Dawn iż-żewġ kwalitajiet—l-umiltà u l-ħniena—imorru id f’id.
Kemm aħna grati li Ġeħova mhuwiex bħall-ħakkiema umani li l-kburija tagħhom tagħmilhom stinati u insensittivi! Ma titqanqalx titgħallem iktar dwar l-Alla umli li hu lest li ‘jitbaxxa’ sabiex jerfaʼ lill-aduraturi tiegħu mid-disperazzjoni biex jagħtihom tama?
[Nota ta’ taħt]
a L-iskribi tal-qedem bidlu dan il-vers biex jgħid “ruħi,” bħallikieku qed jirreferi għal Ġeremija. Milli jidher, kienu jemmnu li kien nuqqas taʼ rispett li wieħed jitkellem dwar Alla bħala ruħ, kelma li l-Bibbja tuża għall-ħlejjaq tal-art. Imma l-Bibbja spiss tiddeskrivi lil Alla b’modi li l-bnedmin jistgħu jifhmu. Ladarba t-terminu “ruħ” ifisser “il-ħajja li għandna,” il-kelma “ruħek” tfisser “int.”
[Kumment f’paġna 14]
Ġeħova hu lest li jinżel għal-livell tagħna, biex ngħidu hekk, ħalli jgħinna meta nkunu dipressi