“Ohande Yove . . . Mainyongamena Kuame”
Fuena ku Huku
“Ohande Yove . . . Mainyongamena Kuame”
OKULIOLA omutima otyituwa tyikoka ovanthu. Haunene tuhole okulinga oupanga novanthu veliola omutima. Mahi mouye uno tyipuiya okuvasa ovanthu veliola omitima tyotyili, haunene ku vana vena epondolo ine vatumina. Iya Jeova Huku, omunthu wepondolo enene vali mouye auho? Okuti weliola omutima? Tutalei onondaka mbomuuli Jeremia mu Lamentações 3:20, 21.—Tanga.
Jeremia wahoneka Lamentações momuvo umwe wepuiya wova Isilayeli. Oe wamuene otyipuka tyemuihamesa unene omutima etyi o Jelusalei ankho ehole yahanyaunuapo nova Mbambilonia. Omuuli oo ankho utyii okuti ova Isilayeli vatokala okuhitiswa na Huku mokonda yononkhali mbavo. Mahi, okuti Jeremia wakalele tyihena ekevelelo? Okuti ankho usoka okuti Jeova ukahi kokule, nokuhesukile na vana velivela nokuehulilwa? Tehelelei etyi Jeremia apopilako ovanthu vae.
Namphila ovanthu ovakuavo ankho vahulilwa, Jeremia ankho una ekevelo. Weliyavela ku Jeova okuti: “Tyotyili ohande yove a [ya Jeova] mainthyinangela nokunyongamena kuame.” (Versikulu 20) Jeremia ankho kasilemo. Oe ankho utyii okuti Jeova kamemulimbwa—ine kamalimbwa vana velivela. Oityi Huku wepondolo aliho malingi?—Revelação 15:3.
Jeremia ankho una onthumbi yokuti Jeova “manyongamena” vana velivela tyotyili. Ombimbiliya onkhuavo yati: “Mbambavo nthyinangele, linyongamena kuame.” Onondaka ombo mbutusokesa okuti Jeova omunthu wokankhenda. Jeova, “Omukulami kombanda yoohi aiho,” malingi ngatyina anyongama, akatulapo ovafendeli vae monkhalelo yavo ombi nokuvepanda vali. (Salmo 83:18) Nokuapamena mekevelelo liae, Jeremia wavasa eungumaneso liotyotyili komutima wae. Omuuli oo wekolelo ankho watokola okukevelela noumphua-lundo alo Jeova ayovola ovanthu Vae velivela.—Versikulu 21.
Onondaka mba Jeremia mbutulongesa ovipuka vivali konthele ya Jeova. Tete, Jeova weliola omutima. (Salmo 18:35) Namphila ena “epondolo enene,” Jeova uhanda okunyongama alo apa tukahi ine okutukuatesako tyina tuvahiwa novitateka vitusoyesa. (Jó 37:23; Salmo 113:5-7) Otyo katyitupameka? Vali, Jeova omunthu wokankhenda, “nokuafwapo pala okuevela” vana velivela, nokuvetavela vali. (Salmo 86:5) Ovituwa ovio vivali, okuliola omutima nokankhenda, viendela kumwe.
Tupandula unene mokonda Jeova kekahi ngovanthu vatumina, vena elungavi livekalesa nomphata, nokuhesukile novanthu! Konyima yokuelilongesa okuti Huku weliola omutima nokuhanda “okunyongama” opo akuateseko ovafendi vae tyina vasoya, kuhande okunoñgonoka vali konthele yae?
[Onondaka Poutoi]
a Ovahoneki vokohale vapilululile oversikulu oyo okuti “ohande yange,” ngatyina ipopia Jeremia. Ankho vetavela okuti katyaviukile okupopia Huku ngatyina ohande, Mombimbiliya ondaka oyo ipopia vala ovipuka vina omuenyo pano pohi. Mahi Ombimbiliya ovikando ovinyingi ipopia Huku monkhalelo imwe ikuatesako ovanthu okumunoñgonoka. Mokonda ondaka “ohande” ipondola okuhangununa “omuenyo tuna,” ondaka “ohande yove” ihangununa okuti “ove.”
[Onondaka Mbavilapo pefo 32]
Jeova uhanda okunyongama alo apa tukahi ine okutukuatesako tyina tuvahiwa novitateka vitusoyesa
