Molekeed er Kau er a Dios

“Ke . . . Mo Terrob el Kiderak”

A KLENGARIOURRENG a kmal ungil el blekeradel. Kede blechoel el soad el mo kmeed er a rechad el ngariou a rengrir. Engdi ngklengiterreng e le ngmeringel el debetik er a rengariou a rengrir el chad er chelecha el taem, el ileakl tirke el olab a klisiich me a lechub e ngderuchall er a ureor. E kuk mekerang el kirel a Jehovah el ngii a kot el mesisiich el Dios? Ngikang ngariou a rengul? Me bo dorriter a tekingel a Jeremia el ngar er a babier er a Klengiterreng 3:20, 21 el kmo: “Me ke ulterekokl el mo lotkii e mo terrob el kiderak. Ak mo melatk er tia el tekoi a uchul me ngklou a renguk el mengiil.”​—New World Translation.

A Jeremia a milluches er a babier er a Klengiterreng er a taem er a klou el chelebuul er a beluu er a Israel. Ngulemes er a tekoi el kmal millemall er a rengul el rechad er a Babilon a tilemellii a mats er a Jerusalem. Ngika el profet a mle medengei el kmo tia el kerrekerilel a Dios el kirel a Jerusalem a mle melemalt el kerrekeriil el kngterir a rechad er a Israel a uchul. Me a Jeremia, ngmlo diak a omeltkel? Ngmlo omdasu el kmo a Jehovah a kmal cheroid me ngdiak leseterir tirke el mla obult er a kngterir e lengesuterir? Momtab a tekingel er a longedecheduch el omtechei er a rechedal.

Alta e a rechad a mle mekngit a rengrir, engdi a Jeremia a mla er ngii a omeltkel. Nglilangel el mo er a Jehovah el kmo: “Ke ulterekokl el mo lotkii e mo terrob el kiderak.” * (20 el bades) A Jeremia a mle ulterekokl a rengul el medengei el kmo a Jehovah a diak lobes er ngii me tirke el chedal a Dios el mla obult er a kngterir. Me ngmo mekerang a Dios?​—Chocholt 15:3.

A Jeremia a mle ulterekokl a rengul el kmo a Jehovah a mo ‘terrob el mengider’ er tirke el mera el lobult er a kngterir. Aika el tekoi a ngosukid el mo medengelii sel klechubechub er a Jehovah. Me ngika el “ngarbab el merreder er a beluulchad el rokir” a ua bo leterrob e longider er tirke el mengull er ngii el metacherbesrir me lluut el nguu a kengei er ngii. (Psalm 83:18) Ngoeak tiaikid el omelatk e ngmera el mlo mechelaod a rengul a Jeremia. Ngika el profet a mle klou a rengul el mengiil er a temel a Jehovah el mo olsobel er a rechedal.​—21 el bades.

A tekingel a Jeremia a osisecheklid er a eru el tekoi el kirel a Jehovah. A kot, e a Jehovah a ngariou a rengul. Alta ng “imis el klou” a klisichel engdi ngblechoel el melatk er kid e kltmokl el mo ngosukid er sel taem er a chelebuled. (Job 37:23; Psalm 113:5-7) Tiang a kmal melisiich er kid. E a ongerung, a Jehovah a chubechubechad, me ngkltmokl el ‘ousubes a telemellir’ tirke el mla obult er a kngterir me te mo nguu a kengei er ngii. (Psalm 86:5) Aika el eru el blekeradel, el klengariourreng me a klechubechub a kirel el dmak el oureor.

Kede oba omereng el saul e le Jehovah a diak longedereder el ua rechad a longedereder, el kldidiul a rengrir a rulleterir el mo medecherecher a rengrir! Me kau ngsoam el mesuub a lmuut el betok el kirel a ngariou a rengul el Dios el kongei el mo “terrob” el olengeseu er a rechedal er a chelsel a chelebulir e mesterir a omelatk?

[Footnote]

[Blurb el ngar er a 32 el llel]

A Jehovah a kltmokl el mo terrob e ngosukid er sel taem er a chelebuled