PËRULËSIA është tërheqëse. Zakonisht njerëzit e përulur na bëjnë për vete. Mjerisht, në botën e sotme është e vështirë të hasim përulësinë e vërtetë, sidomos nga ata që kanë pushtet ose autoritet mbi të tjerët. Po Perëndia Jehova, më i fuqishmi i universit, a është i përulur? Le të shqyrtojmë fjalët e profetit Jeremia që i gjejmë te Vajtimet 3:20, 21.​—Lexoje.

Jeremia i shkroi Vajtimet në një pikë kritike të historisë së Izraelit. Sapo kishte parë me sytë e tij diçka që i shkaktoi dhembje të madhe: shkatërrimin e Jerusalemit të tij të dashur nga babilonasit. Profeti i dëshpëruar e dinte se gjëma ishte ekzekutim i drejtë i gjykimit hyjnor ndaj izraelitëve mëkatarë. Por, a e shihte të pashpresë situatën Jeremia? A mendonte se Jehovai ishte aq i largët ose i ftohtë sa të mos shikonte të penduarit e të mos i nxirrte nga gjendja e dëshpëruar? Vër re teksa Jeremia flet në emër të popullit.

Edhe pse shumë janë të trishtuar, Jeremia është plot shpresë. Ai i thërret Jehovait: «Me siguri shpirti yt * [vetë Jehovai] do të kujtohet dhe do të përkulet mbi mua.» (Vargu 20) Jeremia nuk ka asnjë dyshim. E di se Jehovai nuk do ta harrojë as atë, as të penduarit e popullit të Tij. Megjithatë, çfarë do të bëjë Perëndia i Plotfuqishëm?​—Zbulesa 15:3.

Jeremia është i sigurt se Jehovai «do të përkulet» mbi të penduarit e sinqertë. Nga këto fjalë arrijmë ta përfytyrojmë Jehovain si një person të butë. Jehovai, «Më i Larti në tërë dheun», si të thuash do të përkulet e do t’i ngrejë adhuruesit e tij nga gjendja e poshtëruar, që të kenë sërish miratimin e tij. (Psalmi 83:18) I kapur fort pas shpresës, Jeremia gjen ngushëllim të vërtetë për dhembjen që ka në zemër. Profeti besnik është i vendosur ta presë me durim kohën e duhur kur Jehovai të çlirojë popullin e tij të penduar.​—Vargu 21.

Në të vërtetë, fjalët e dokumentuara të Jeremisë na mësojnë dy gjëra për Jehovain. Së pari, është i përulur. (Psalmi 18:35) Ndonëse «s’ka më të fuqishëm se Ai», Jehovai, si të thuash, është i gatshëm të zbresë në nivelin tonë që të na ndihmojë kur vuajmë. (Jobi 37:23; Psalmi 113:5-7) A nuk na ngushëllon ky mendim? Së dyti, Jehovai është i mëshirshëm, është ‘gati të falë’ mëkatarët e penduar dhe t’u japë sërish miratimin e tij. (Psalmi 86:5) Këto dy cilësi​—përulësia dhe mëshira—​shkojnë krah për krah.

Sa mirënjohës jemi që Jehovai nuk është si sundimtarët njerëzorë, të cilët krenaria i bën kokëfortë dhe të pandjeshëm! A nuk nxitesh të mësosh më shumë për Perëndinë e përulur, i cili është gati «të përkulet» që t’i ngrejë nga gjendja e dëshpëruar adhuruesit e tij e t’u japë shpresë?

Sugjerim për leximin e Biblës gjatë qershorit:

▪ Jeremia 51–Ezekieli 5

[Shënimi]

[Diçitura në faqen 14]

Jehovai, si të thuash, është i gatshëm të zbresë në nivelin tonë që të na ndihmojë kur vuajmë