SAKAFASI na wan sani di furu sma lobi. Nofo tron a de so taki wi lobi sma di abi sakafasi. Ma a sari fu si taki furu sma na ini a grontapu disi no abi trutru sakafasi, spesrutu den wan di abi makti noso di e tiri trawan. Ma fa a de nanga Yehovah Gado, a moro makti sma fu hemel nanga grontapu? A abi sakafasi? Kon meki wi luku san a profeiti Yeremia taki na ini Sari singi 3:20, 21.​—Leisi.

Yeremia ben skrifi a buku Sari singi na wan pisi ten di a ben hebi gi Israel. A ben si wan sani di hati en srefisrefi èn dati na taki den Babilonsma ben pori Yerusalem, a foto di a ben lobi trutru. Aladi a profeiti ben sari, toku a ben sabi taki na ogri di miti den Israelsma ben de wan reti strafu fu Gado gi a sondu libi fu den. Ma a de so taki Yeremia ben lasi howpu? A ben denki taki Yehovah ben fara tumusi fu si den sma di ben sari trutru fu den sondu fu den? A ben o yepi den so taki den no sari moro? Arki te Yeremia e taki gi a pipel fu en.

Aladi a pipel ben e sari, toku Yeremia ben abi howpu. A e bari kari Yehovah: „A no abi misi taki yu [Yehovah] o memre mi èn taki yu o beni fu yepi mi” (vers 20). Yeremia no e tweifri. A sabi taki Yehovah no o frigiti en, noso tra sma na mindri En pipel di abi berow. Ma san na almakti Gado o du?​—Openbaring 15:3.

Yeremia sabi taki Yehovah o „beni” go na den wan di e sari trutru fu den sondu fu den. Den wortu disi e yepi wi fu si Yehovah leki wan safu-ati sma. Yu kan taki dati Yehovah, „a Moro Heiwan fu heri grontapu”, o beni kon èn o puru den anbegiman fu en na ini a takru situwâsi pe den de na ini. Dan a o blesi den baka (Psalm 83:18). A sani disi e meki taki Yeremia abi wan tranga howpu, a e gi en furu trowstu èn now a no e sari moro. A reti-ati profeiti disi abi a fasti bosroiti fu wakti nanga pasensi, teleki a ten doro taki Yehovah o frulusu en pipel di sori berow.​—Vers 21.

Te yu luku en bun, dan den sani di Yeremia skrifi e leri wi tu sani fu Yehovah. A fosi sani na taki a abi sakafasi (Psalm 18:35). Aladi Yehovah abi „bun furu krakti”, toku a de klariklari fu yepi wi. Yu kan taki dati a e beni fu kan kon moro krosibei na wi (Yob 37:23; Psalm 113:5-7). A sani disi e gi wi trowstu, a no so? A di fu tu sani na taki Yehovah abi sari-ati. Iya, a de ’klariklari fu gi pardon’ na den sma di abi berow fu den sondu fu den èn a e teki den baka leki en futuboi (Psalm 86:5). Sakafasi nanga sari-ati abi furu fu du nanga makandra.

Wi breiti trutru taki Yehovah no de leki libisma tiriman di tranga-ede èn di no e firi gi sma, fu di den abi heimemre. Yu wani leri moro fu a Gado disi di abi sakafasi èn di de klariklari fu „beni” kon fu yepi den anbegiman fu en di lasi-ati?

A bun fu leisi a pisi disi fu bijbel na ini yuni:

▪ Yeremia 51–Esekièl 5

[Prenspari pisi na tapu bladzijde 14]

Yehovah de klariklari fu yepi wi. Yu kan taki dati a e beni fu kan kon moro krosibei na wi