“Uma Wam . . . a Var Inya Ker a Mo”
Kporem Hen Aôndo
“Uma Wam . . . a Var Inya Ker a Mo”
IYOL i hiden a mi ijime ka ieren i dedoo. Ka se soo ser se lu ikyua a mba ve hiden a ayol a ve ijime yô. Nahan kpa, kwagh gema er vihi yô, taver kpishi u zuan a ior mba hiden a iyol ijime ken tar u hegen ne, hemban cii je yô, mba ve lu a tahav sha mbagenev shin ve hemen ve la. Man Yehova Aôndo, u a hembe tahav sha won cii la di ye? Hidi a iyol ijime kpa? De se time sha mkaanem ma profeti Yeremia, ma i nger ken Ukwelegh 3:20, 21 la.—Ôr.
Yeremia yange nger Ukwelegh sha shighe u Mbaiserael lu yan ican tsung la. Yange nenge kwagh ugen sha ashe a na, u na un zungwe kpishi yô. A zungwe sha ci u mtim u Mbababilon va tim gar u Yerusalem, u doo un ishima yum la. Profeti u lu ken ishimavihin kpishi ne fa er mtim la lu mtsaha u vough u Aôndo va a mi sha Mbaiserael sha ci u igbenda ve i bo la yô. Kpa Yeremia kera lu a ishimaverenkeghen ga shinii? Yange nenge ér Yehova gba ica kpishi gande u una nenge a mba ve gema asema la shi una due a ve ken ishimayinan keraa? Nenge ase kwagh u Yeremia yange ôr inja er ngu lamen sha ci u Mbaiserael ne.
Er ior kpishi lu ken ishimayinan nahan kpa, Yeremia yô, gema lu a ishimaverenkeghen tsung. A zamber a Yehova ér: “Uma wam * [uma u Yehova] ngu umbur ve her gbem, a var inya ker a mo.” (Ivur 20) Yeremia lu a akpelan ga. Yange fa ér Yehova una hungur a na, shin mbagenev mba ve gema asema ken ior Nav la ga. Nahan kpa, Aôndo Uhembanagee la una er nena?—Mpase 15:3.
Yeremia lu a jighjigh u nan ér Yehova una “var inya” sha ci u mba ve gema asema sha mimi la. Mkaanem man wase se u nengen er Yehova a lu or u eren a ior kundu kundu yô. A fatyô u kaan ér Yehova, u a lu “Uhembansha sha tar cii” la una var inya, una due a mbacivir un ken mlu ve u kunya la kera, shi una hide a lumun ve. (Pasalmi 83:18) Ishimaverenkeghen ne wase Yeremia u zuan a ishimasurun i mimi ken ican i lu yan ken ishima la. Profeti u jighjigh ne yange kange ishima ér una kegh Yehova zan zan shighe u a ver u yiman ior Nav mba ve gema asema la.—Ivur 21
Mkaanem ma Yeremia yange nger ne tese se akaa ahar sha kwagh u Yehova. Hiihii yô, ngu Aôndo u hiden a iyol ijime. (Pasalmi 18:35) Shin er Yehova a ‘hembe agee’ nahan kpa, se fatyô u kaan ser a kegh iyol u hiden a iyol na ijime sha ci wase, sha u una yima se shighe u ishima i yen se yô. (Yobu 37:23; Pasalmi 113:5-7) Kwagh ne na se ishimasurun ga he? Kwagh u sha uhar yô, Yehova zungu mhôônom; a “kegh iyol u den” mba ve gem asema la “kwaghbo” shi hiden lumun ve. (Pasalmi 86:5) Iyol i hiden a mi ijime man mhôônom ma zungwen ka aeren a a ze ihyan i môm yô.
Doo se kpishi er Yehova a lu er mbahemenev mba uumace, mba iyolmoron ka i na ve hingir mba nômbon ikyôr sha kwagh shi kwagh a gbe ve sha akaa a mbagenev ga la nahan ga yô! Kwagh ne mgbegha u u̱ seer henen kwagh u Aôndo u a hidi a iyol ijime, u a kegh iyol u ‘varen inya’ sha u una due a mbacivir un ken ishimayinan, una gema a na ve ishimaverenkeghen la ga he?
[Ngeren u shin kpe]
^ Mbangeren mba sha ayange a tsuaa mbara yange ve gema ivur ne ér “uma wam,” inja er ka kwagh u Yeremia ve ôron nahan. A̱ shi nan kpa, yange ve na jighjigh ér aluer i tôô ishember i uma, i Bibilo i er kwagh u akaa a uma a shin tar a mi la, i ôr kwagh u Aôndo a mi yô, a lu nan un icivir ga. Kpa ashighe kpishi Bibilo ka i̱ ôr kwagh u Aôndo sha igbenda i a wase uumace u kaven kwagh na yô. Ashighe agen ka ôron kwagh u ishember i “uma” la yô, mba ôron kwagh u orumace, nahan yô inja i ishember i “uma wam” la yô, ka “we.”
[Mkaanem ma sha peeji 22 la]
Yehova kegh iyol u hiden a iyol na ijime sha ci wase, sha u una yima se shighe u ishima i yen se yô
