Go Klostu Long God
“Yu Bai . . . Lindaun i Kam Klostu Tru Long Mi”
PASIN daun em i wanpela gutpela pasin. Yumi save laik pas gut wantaim ol man i gat pasin daun. Tasol sori tru, planti man long nau i no gat pasin daun tru, na moa yet em ol man husat i gat namba long bosim ol narapela. Olsem wanem long God Jehova, em Man i gat olgeta strong? Yu ting em i gat pasin daun? Yumi ken skelim tok bilong profet Jeremaia i stap long Krai 3:20, 21. a
Jeremaia i bin raitim Buk Krai long taim bikpela hevi tru i bin painim lain Israel. Em i lukim samting i givim bikpela pen long em—Babilon i bagarapim Jerusalem, em taun em i laikim tru. Dispela profet i save olsem i stret dispela bagarap i painim lain Israel, long wanem, ol i bin mekim planti pasin nogut. Tasol yu ting Jeremaia i no gat rot bilong kisim helpim? Yu ting em i pilim olsem Jehova i stap longwe o i no tingim na helpim ol manmeri husat i tanim bel? Putim yau long tok em Jeremaia i makim maus bilong lain bilong em na i autim.
Maski planti man i bel hevi i stap, Jeremaia i save olsem i gat rot bilong kisim helpim. Em i tokim Jehova olsem: “Oltaim yu [Jehova] bai tingim mi na lindaun i kam klostu tru long mi.” (Ves 20) Jeremaia i no gat tupela tingting. Em i save olsem Jehova i no inap lusim tingting long em, o long ol manmeri namel long lain bilong Em husat i tanim bel. Tasol yu ting God i Gat Olgeta Strong bai mekim wanem?—Revelesen 15:3.
Jeremaia i save olsem Jehova bai “lindaun i kam klostu tru” long ol manmeri husat i tanim bel tru. Dispela tok i helpim yumi long tingim Jehova olsem wanpela man husat i gat gutpela pasin helpim. Jehova em “God Antap Tru” i “bosim olgeta hap bilong graun,” i olsem em bai lindaun na helpim ol manmeri bilong em husat i stap nogut tru na em bai orait gen long ol. (Song 83:18) Dispela tok i strongim Jeremaia na i mekim gut bel bilong em. Dispela gutpela profet i tingting strong long stap isi na wet inap long taim Jehova yet i makim bilong kisim bek lain bilong Em husat i tanim bel.—Ves 21.
Ol tok Jeremaia i raitim i skulim yumi long 2-pela pasin bilong Jehova. Namba 1, em i gat pasin daun. (Song 18:35) Maski Jehova “i gat bikpela strong,” em i redi long daunim em yet na helpim yumi long taim yumi gat hevi. (Jop 37:23; Song 113:5-7) Dispela i mekim gut tru bel bilong yumi, a? Namba 2, Jehova i gat pasin marimari; em i redi long “rausim sin” na orait gen long ol manmeri i tanim bel. (Song 86:5) Dispela 2-pela pasin, em pasin daun na pasin marimari, i poroman gut wantaim.
Yumi tenkyu tru olsem Jehova em i no olsem ol hetman bilong graun em pasin antap i mekim na ol i gat strongpela het na i no tingim narapela! Olsem wanem? Yu gat laik long kisim sampela save moa long dispela God i gat pasin daun na em i redi long daunim em yet bambai em i ken helpim ol manmeri bilong em husat i gat hevi?
Baibel ritim bilong Jun:
[Futnot]
a “Oltaim yu [Jehova] bai tingim mi na lindaun i kam klostu tru long mi. Bai mi tingim dispela samting long bel bilong mi. Olsem na bai mi wet i stap.”—New World Translation.
[Rait long pes 14]
Jehova i redi long daunim em yet na helpim yumi long taim yumi gat hevi
