‘Mzimu Winu . . . Ukusindama pa Ine’
Sendelerani Kwa Ciuta
‘Mzimu Winu . . . Ukusindama pa Ine’
KUJIYUYURA ni mukhaliro wakukondweska. Kanandi cikuŵa cipusu kutemwa munthu uyo ngwakujiyuyura. Kweni cacitima nchakuti kujiyuyura kukusoŵa mazuŵa ghano, comenecomene ku ŵanthu awo ŵali na mazaza. Kweni wuli pakuyowoya za Yehova Ciuta, munthu wankhongono comene pa caru cose? Kasi ngwakujiyuyura? Tiyeni tisande mazgu gha nchimi Yeremiya agho ghali pa Citengero ca Yeremiya 3:20, 21.—Ŵazgani.
Yeremiya wakalemba buku la Citengero pa nyengo yakusuzga comene mu mdauko wa Israyeli. Wakaŵa na citima comene apo wakawona Ŵababuloni ŵakuparanya msumba wa Yerusalemu uwo wakawutemwanga comene. Nangauli vikamuŵinya, kweni Yeremiya wakamanya kuti ceruzgo ca Ciuta ici cikaŵa cakwenelera ku Ŵaisrayeli cifukwa ca vyakucita vyawo viheni. Kweni kasi Yeremiya wakaŵavya cigomezgo? Kasi wakawonanga kuti Yehova wali kutali comene kuti wangaleka kumanya awo ŵapera na kuŵafumya mu suzgo? Wonani ivyo Yeremiya wakayowoya m’malo mwa ŵanthu wose.
Nangauli ŵanthu wose ŵakaŵa na citima, kweni Yeremiya wakaŵa na cigomezgo. Wakalomba kwa Yehova kuti: ‘Mzimu winu a [Yehova] ucali kuvikumbuka ndipo ukusindama mwa ine.’ (Vesi 20) Yeremiya wakaŵa na cigomezgo cose. Wakamanya kuti Yehova wamuluwenge yayi, nesi kuluwa ŵanthu awo ŵapera. Kasi Ciuta wankhongono zose wakacita wuli?—Uvumbuzi 15:3.
Yeremiya wakaŵa na cigomezgo kuti Yehova ‘wasindamenge’ pa awo ŵapera nadi. Mu Baibolo linyake ŵali kulemba kuti: “Kumbukani, mwee na kusindamira pa ine.” Mazgu agha ghakutikumbuska waka kuti Yehova ngwalusungu. Yehova, “Wapacanyapose mu vyaru vyose,” wazamusindama na kuŵathaska mu suzgo awo ŵakumusopa ndipo wazamuŵalongora citemwa. (Salmo 83:18) Cifukwa ca cigomezgo ici, Yeremiya wakapembuzgika. Nchimi ya kugomezgeka iyi yikalindilira mwakuzika nyengo iyo Yehova wakimika kuti wathaske ŵanthu ŵake awo ŵapera.—Vesi 21.
Mazgu gha Yeremiya ghakutisambizga vinthu viŵiri vyakukhwaskana na Yehova. Cakwamba, ngwakujiyuyura. (Salmo 18:35) Nangauli Yehova ni “mukuru wakuluska mu nkhongono,” kweni ngwakunozgeka kusindama kuti wayane nase na kutovwira para tasuzgika. (Job 37:23; Salmo 113:5-7) Kasi fundo iyi njakukhozga yayi? Caciŵiri Yehova ngwalusungu. ‘Ngwakunozgeka kugowokera’ ŵakwananga awo ŵapera ndipo wakwambaso kuŵatemwa. (Salmo 86:5) Kujiyuyura na lusungu vikwendera lumoza.
Tikuwonga comene kuti Yehova ngwakuyana yayi na ŵawusi ŵa mu caru awo ŵakujikuzga ndipo ŵakughanaghanira ŵanji yayi. Kasi mungatemwa kusambira vinandi vyakukhwaskana na Ciuta uyo ngwakukhumbisiska ‘kusindama’ kuti wawovwire awo ŵakumusopa?
Vipaturo ivyo Mungaŵazga mu Juni:
◼ Yeremiya 51-52; Citengero ca Yeremiya 1-5–Ezekiel 1-5
[Mazgu ghamusi]
a Ŵalembi ŵakale ŵakasintha vesi ili kuti lilongore kuti Yeremiya ndiyo wakasindama, Yehova yayi. Iwo ŵakalemba kuti “mzimu wane,” nga ni para likuyowoya za Yeremiya. Ŵakwenera kuti ŵakaghanaghananga kuti nchambura kwenelera kumulongosora Ciuta na mazgu agho Baibolo likugwiliskira nchito pa vilengiwa vya pa caru capasi. Kweni kanandi Baibolo likumulongosora Ciuta nga ni munthu kuti tipulikiske makora vyakukhwaskana na iyo. Pakuti mazgu ghakuti “mzimu” ghangang’anamura umoyo uwo tili nawo, ipo mazgu ghakuti “mzimu winu” ghakung’anamura “imwe.”
[Mazgu Ghakukhozgera pa peji 14]
Yehova ngwakunozgeka kusindama kuti wayane nase na kutovwira para tasuzgika.
