Mu Chuchugur Ngak Got

“Ga Be Chuchugur Ngog”

SOBUT’AN’ e reb e fel’ngin nib fel’. Ba ga’ ni gad baadag ni ngad chugurgad ngak be’ nib sobut’an’. Ngiyal’ ney e ba mo’maw’ ni ngan pirieg e re fel’ngin ney ko girdi’, nib ga’ ni piin nib tolang e liw rorad. Ma uw rogon Jehovah, ni ir e en th’abi gel gelngin u palpalth’ib? Be’ nib sobut’an’, fa? Gad ra guy e thin rok Jeremiah ko Lamentations 3:20, 21, NW: “Ba mudugil ni dab mu pagtalneg, ma ga be chuchugur ngog. Ereray e n’en ni ma yib ngan’ug. Ma aram fan ni gubin ngiyal’ ni gu ma sonnagem.”

I yoloy Jeremiah fare babyor ni Lamentations u ba ngiyal’ ni kari gel e gafgow rok piyu Israel. Ke guy Jeremiah e gafgow ni i tay piyu Babylon ko fare mach nu Jerusalem ni kari kirebnag laniyan’. Manang ni ke buch e pi nem rok piyu Israel ni bochan e kireb ni ur ngongliyed. Machane, uw rogon Jeremiah, dakuriy e athap rok, fa? I lemnag ni Jehovah e dariy e runguy rok ma dabun ni nge chuweg e piin ni kar kalgadngan’rad u fithik’ e gafgow? Jeremiah e ra non ni pa’ e girdi’ rok u Israel.

Yugu aram rogon ni ba gel e kireban’ ni be tay e girdi’, machane Jeremiah e bay e athap rok. Be yor ngak Jehovah ni be gaar: “Ba mudugil ni dab mu pagtalneg, ma ga be chuchugur ngog.” (Verse 20) De maruwar laniyan’ Jeremiah. Manang ni Jehovah e dabi pagtalin e piin ni kar kalgadngan’rad. Ere mang e ra rin’ Got ni gubin ma rayog rok?​—Revelation 15:3.

Ba mich u wan’ Jeremiah ni Jehovah e ra “chugur” ngak e piin ni ke kalngan’rad. Pi thin ney e be tamilangnag ni ir be’ nib sumunguy mab gol. Jehovah e ir e “th’abi Tolang u polo’ e fayleng” ma ra sobut’nag ir ni nge sulweg e girdi’ rok nga rogon nib m’agan’ ngay. (Psalm 83:18) Bochan ni bay e athap rok Jeremiah, ma aram e rayog ni nge fel’ laniyan’. Fare profet nib yul’yul’ e ke dugliy u wan’ ni nge sonnag fare rran rok Jehovah nra chuweg e girdi’ rok ni ke kalngan’rad.​—Verse 21.

Fapi thin rok Jeremiah e be fil l’agruw ban’en ngodad u murung’agen Jehovah. Som’on, e ir be’ nib sobut’an’. (Psalm 18:35) Yugu aram rogon ni Jehovah e rib “gel” gelngin, machane ba m’agan’ ngay ni nge sobut’nag ir ya nga yog ni nge ayuwegdad u nap’an ni ke kireban’dad. (Job 37:23; Psalm 113:5-7) Re n’ey e rayog ni nge fal’eg lanin’dad. Bin migid, e Jehovah e ma runguy e piin ta denen ni kar kalgadngan’rad ma ke pagrad ni ngar sulod ngak, ya ir be’ nib ‘gol ngorad ma ma n’ag fan u wan’ e kireb rorad’. (Psalm 86:5, BT) Gal fel’ngin ney ni sobut’an’ nge runguy e bay rogon reb nga reb.

Ri gad ma pining e magar ngak Jehovah ya rib thil ko piin ni yad ma gagiyegnag e girdi’ nu fayleng ya ba ga’ ni yad ba tolangan’ ma dariy fan e girdi’ u wan’rad ma darur lemniged rogorad. Ere, ga baadag ni ngam nang boch murung’agen fare Got rodad nib sobut’an’ mab m’agan’ ngay ni nge “chugur” ngodad ya nge ayuweg e piin yad ma liyor ngak u fithik’ e magawon ni ma yib ngorad, fa?

[Blurb on page 32]

M’agan’ Jehovah ngay ni nge sobut’nag ir ni nge ayuwegdad