Ababelenga Ino Magazini Balepusha Ukuti . . .

Mulandu Nshi Inte sha kwa Yehova Bashimikilila ku Ng’anda ne Ng’anda?

▪ Muli Baibolo mwaliba ifunde ilyo Yesu apeele abasambi bakwe ilya kuti: “E ico kabiyeni, kalengeni aba nko shonse ukuba abasambi, . . . mulebasambilisha.” (Mateo 28:19, 20) Bushe Abena Kristu bonse balingile ukulakonka ili ifunde? Abasambi ba kubalilapo aba kwa Yesu baishibe ukuti Abena Kristu e fyo bafwile ukulacita. Ku ca kumwenako, umutumwa Petro atile: “[Yesu] atwebele ukushimikila abantu no kushimikisha ubunte.” (Imilimo 10:42) Umutumwa Paulo na o alembele ukuti: “E mulimo mfwile ukubomba. Iye, ca bulanda kuli ine nga nshibila imbila nsuma!”—1 Abena Korinti 9:16.

Te Paulo fye na Petro abaleshimikila, lelo na Bena Kristu bonse aba kubalilapo balekonka ifunde Yesu apeele abasambi. Umulimo wa kushimikila e o bacindamike sana. (Imilimo 5:28-32, 41, 42) Ifi fine e fyo ne Nte sha kwa Yehova bacita muno nshiku. Bashimikila imbila nsuma imo ine iyo na Yesu aleshimikila, e kutila “ubufumu bwa mu muulu.”—Mateo 10:7.

Ni kuli bani imbila ya Bufumu ilingile ukubilwa? Yesu alandile ukuti ilingile ukubilwa konse kabili ku bantu fye bonse. Aebele abasambi bakwe ukuti: “Mukaba inte shandi . . . na ku mpela ya pano isonde.” (Imilimo 1:8) Asobele no kuti ilyo impela ya buno bwikashi ishilaisa, “imbila nsuma iyi iya bufumu ikabilwa ku bantu bonse aba pe sonde ku kuba ubunte.” (Mateo 24:14) E fyo na Bena Kristu ba kubalilapo balecita, bale-esha na maka ukushimikila ku bantu bonse, tabaleshimikila fye ku bo baishibe nelyo ku bantu abashalepepa. (Abena Kolose 1:23; 1 Timote 2:3, 4) Ne Nte sha kwa Yehova muno nshiku e fyo bacita, balesha na maka ukushimikila ku bantu bonse. *

Ni nshila nshi iisuma iya kubililamo imbila nsuma iya Bufumu? Yesu uwaishibe ifya kucita pa kushimikila ku bantu abengi nga nshi, atumine abasambi bakwe mu misumba, mu mishi na mu mayanda. (Mateo 10:7, 11, 12) Ilyo Yesu afwile no kubuushiwa, abasambi bakwe balitwalilile ukushimikila “ku ng’anda ne ng’anda.” (Imilimo 5:42) Nga filya fine Yesu alecita, nabo baleshimikila konse uko balesanga abantu, na mu fifulo fya cintubwingi. (Yohane 4:7-26; 18:20; Imilimo 17:17) Inte sha kwa Yehova nabo babomfya inshila shimo shine pa kushimikila ku bantu bonse.

Yesu alangile ukuti te bonse abaali no kukutika ku mbila nsuma. (Mateo 10:14; 24:37-39) Bushe ici cifwile ukulenga Abena Kristu ukuleka ukushimikila? Natulangilile: Tutile kwacitika icinkukuma icikalamba kabili muli pa balepususha abasanshilwe, bushe kuti mwaleka ukufwaya abantu na bambi pa mulandu fye wa kuti ukutula apo mutendekele ukufwaya abasanshilwe, banono fye musangilepo abatuntulu? Awe nakalya, kuti mwatwalilila fye ukufwaya nga namwishiba ukuti kucili umuntu na umbi uo mwingapususha. Yesu aebele abasambi bakwe ukutwalilila ukushimikila cikulu fye kuli isubilo lya kutila kuti basanga na bambi abengakutika ku mbila nsuma iya Bufumu bwa kwa Lesa. (Mateo 10:23; 1 Timote 4:16) Ifi Inte sha kwa Yehova bashimikila ku ng’anda ne ng’anda ukufwaya abantu ba musango yu, balanga ukuti balitemwa Lesa na bantu banabo, kabili aba bantu kuti baisapusuka nga ca kutila bakutika ku mbila nsuma iya Bufumu no kucita ifyo basambilila.—Mateo 22:37-39; 2 Abena Tesalonika 1:8.

Muli iyi yine magazini mulebelenga, mwaliba iyi mbila nsuma iya Bufumu. Nga mulefwaya ukwishibilapo na fimbi, mukwai mukalande ne Nte sha kwa Yehova ilyo bakamutandalila nelyo kuti mwalembela ku balemba ino ine magazini.

[Futunoti]