▪ Sa Bibliya, atong mabasa kini nga sugo ni Jesus sa iyang mga sumusunod: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila.” (Mateo 28:19, 20) Mapadapat ba kini sa tanang Kristohanon? Nasabtan sa unang mga tinun-an ni Jesus nga mapadapat kana sa tanan. Pananglitan, si apostol Pedro nag-ingon: “Siya [si Jesus] nagsugo kanamo nga magwali ngadto sa katawhan ug maghatag ug bug-os nga pamatuod.” (Buhat 10:42) Ug si apostol Pablo misulat: “Ang panginahanglan gikapatong ibabaw kanako. Sa pagkatinuod, alaot ako kon dili ko ipahayag ang maayong balita!”—1 Corinto 9:16.

Dili lang si Pablo ug Pedro ang mituman sa sugo ni Jesus kondili ang tanang unang-siglong Kristohanon. Ang pagsangyaw maoy ilang hinungdanong buluhaton. (Buhat 5:28-32, 41, 42) Ang mga Saksi ni Jehova karon naningkamot usab sa pagbuhat niana. Ilang gisangyaw ang samang mensahe nga gisangyaw ni Jesus, nga mao, “ang gingharian sa mga langit.”—Mateo 10:7.

Kang kinsa angayng isangyaw ang mensahe sa Gingharian? Si Jesus miingon nga kini angayng isangyaw sa tanang tawo sa bisan diin. Iyang giingnan ang iyang mga tinun-an: “Kamo mahimong akong mga saksi . . . hangtod sa kinalay-ang dapit sa yuta.” (Buhat 1:8) Siya nagtagna pa gani nga sa dili pa matapos kining sistemaha, “kining maayong balita sa gingharian igawali sa tibuok gipuy-ang yuta ingon nga pagpamatuod.” (Mateo 24:14) Busa, ang unang-siglong mga Kristohanon naningkamot sa pagpakigsulti sa tanang tawo, dili lang sa mga kaila o sa mga walay relihiyon. (Colosas 1:23; 1 Timoteo 2:3, 4) Sa susama, ang mga Saksi ni Jehova karon naningkamot sa pagpakigsulti sa tanan. *

Unsa ang labing epektibong paagi sa pagpakaylap sa mensahe sa Gingharian? Si Jesus, kinsa nahibalo kon sa unsang paagi masangyawan ang daghang tawo kutob sa mahimo, nagpadala sa iyang mga tinun-an sa mga siyudad, balangay, ug kabalayan. (Mateo 10:7, 11, 12) Human sa kamatayon ug pagkabanhaw ni Jesus, ang iyang mga tinun-an nagpadayon sa pagsangyaw “sa balay ug balay.” (Buhat 5:42) Sama sa gibuhat ni Jesus, sila nagsangyaw usab bisan diin nga may mga tawo ug sa publikong mga dapit. (Juan 4:7-26; 18:20; Buhat 17:17) Karon, ang mga Saksi naggamit sa mao gihapong mga paagi aron masangyawan ang tanang tawo.

Gipakita ni Jesus nga dili tanan ang mamati. (Mateo 10:14; 24:37-39) Angay ba kanang magpugong sa mga Kristohanon sa pagsangyaw? Tagda kini nga pagtandi: Kon apil ka sa rescue team human sa grabeng linog, moundang ka na ba pagpangita tungod lang kay pipila ra ang nakit-an nimong naluwas? Dili, mopadayon ka samtang may paglaom pa nga makaluwas ug lain. Si Jesus nagsugo sa iyang mga tinun-an sa paglahutay samtang may paglaom pang makakaplag ug pipila nga mosanong sa maayong balita bahin sa Gingharian sa Diyos. (Mateo 10:23; 1 Timoteo 4:16) Pinaagi sa pagpangita kanila sa balay ug balay, ang mga Saksi nagpakitag gugma sa Diyos ug sa ilang mga silingan, kansang kinabuhi nagdepende sa pagpamati ug pagsanong sa mensahe sa Gingharian.—Mateo 22:37-39; 2 Tesalonica 1:8.

Kining magasina naghisgot niana nga mensahe sa Bibliya. Alang sa dugang impormasyon, palihog pakigsulti sa mga Saksi ni Jehova sa sunod higayon nga sila moduaw, o pagsulat sa magpapatik niining magasina.

[Footnote]