Athomi Aitũ Maroria Atĩrĩ . . .

Aira a Jehova mahunjagia nyũmba kwa nyũmba nĩkĩ?

▪ Thĩinĩ wa Bibilia tũthomaga watho ũyũ wa Jesu kũrĩ arũmĩrĩri ake: “Nĩ ũndũ ũcio, thiĩi mũgatũme andũ a ndũrĩrĩ ciothe matuĩke arutwo akwa, . . . mũkĩmarutaga.” (Mathayo 28:19, 20) Hihi ũndũ ũcio ũhutagia Akristiano othe? Ũguo nĩguo arũmĩrĩri a Jesu a tene mooĩ. Kwa ngerekano-rĩ, mũtũmwo Petero oigire ũũ: “[Jesu] nĩaatwathire atĩ tũhunjagĩrie andũ.” (Atũmwo 10:42) Nake mũtũmwo Paulo aandĩkire ũũ: “Niĩ ndirĩ hĩndĩ itabatairio nĩ kũũhunjia, na ingĩtiga kũhunjia Ũhoro-ũcio-Mwega-rĩ, kaĩ ndagĩa na haaro-ĩ!”—1 Akorintho 9:16.

To Paulo na Petero tu maathĩkĩire watho ũcio wa Jesu no nĩ nginya Akristiano arĩa angĩ a karine ya mbere. Wĩra wa kũhunjia nĩguo moonaga ũrĩ wa bata makĩria. (Atũmwo 5:28-32, 41, 42) Aira a Jehova o nao nĩ merutanagĩria gwĩka ũguo ũmũthĩ. Mahunjagia ndũmĩrĩri o ĩrĩa Jesu aahunjagia, ya “ũthamaki wa igũrũ.”—Mathayo 10:7.

Ndũmĩrĩri ĩyo ya Ũthamaki yagĩrĩire kũhunjĩrio a? Jesu onanirie atĩ yagĩrĩire kũhunjĩrio andũ othe kũndũ guothe. Eerire arutwo ake ũũ: “Mũtuĩke aira akwa . . . ituri ciothe cia thĩ.” (Atũmwo 1:8) O na nĩ aarathire atĩ mbere ya ithirĩro rĩkinye, “Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira.” (Mathayo 24:14) Nĩ ũndũ ũcio, Akristiano a karine ya mbere nĩ meerutanagĩria biũ kũhunjĩria andũ othe, to andũ arĩa mooyaine kana andũ arĩa mataarĩ a ndini. (Akolosai 1:23; 1 Timotheo 2:3, 4) O ũndũ ũmwe na ũcio, Aira a Jehova ũmũthĩ merutanagĩria gũkinyĩra mũndũ wothe. a

Njĩra ĩrĩa njega biũ ya kũhunjia ndũmĩrĩri ya Ũthamaki nĩ ĩrĩkũ? Jesu, ũrĩa wamenyaga ũrĩa angĩkinyĩra andũ aingĩ o ũrĩa kũngĩahotekire, aatũmire arutwo ake mathiĩ matũũra-inĩ, na mĩciĩ-inĩ ya andũ. (Mathayo 10:7, 11, 12) Thutha wa Jesu gũkua na kũriũka, arutwo ake maathire o na mbere kũhunjia ‘mĩciĩ-inĩ’ kana nyũmba kwa nyũmba. (Atũmwo 5:42) O ta ũrĩa Jesu eekaga, o nao maahunjagia kũndũ guothe kũrĩa maacemanagia na andũ na kũndũ kwa mũingĩ. (Johana 4:7-26; 18:20; Atũmwo 17:17) Ũmũthĩ, Aira a Jehova mahũthagĩra njĩra o icio kũhunjĩria andũ othe.

Jesu nĩ onanirie atĩ ti andũ othe mangĩgaathikĩrĩria. (Mathayo 10:14; 24:37-39) Hihi ũndũ ũcio nĩ wagĩrĩirũo gũtũma Akristiano matige kũhunjia? Ta geria kũringithania na ũndũ ũyũ: Mũngĩkorũo mũgĩteithĩrĩria kũhonokia andũ thutha wa gĩthingithia kĩnene-rĩ, hihi no ũtige gũcaria atĩ tondũ thutha wa ihinda no andũ anini tu mũhotete kũhonokia? Aca, ũngĩthiĩ na mbere rĩrĩa rĩothe harĩ na mwĩhoko wa kũhonokia o na akorũo no mũndũ ũmwe. Jesu eerire arutwo ake makirĩrĩrie wĩra-inĩ ũcio wa kũhunjia ihinda rĩrĩa rĩothe kũrĩ na mwĩhoko wa kuona andũ megwĩtĩkĩra ũhoro ũrĩa mwega wa Ũthamaki wa Ngai. (Mathayo 10:23; 1 Timotheo 4:16) Na njĩra ya gwetha andũ ta acio makĩhunjia nyũmba kwa nyũmba, Aira a Jehova monanagia nĩ mendete Ngai na andũ arĩa angĩ, arĩa ũtũũro wao wĩhocetie harĩ kũigua na gwĩtĩkĩra ndũmĩrĩri ya Ũthamaki.—Mathayo 22:37-39; 2 Athesalonike 1:8.

Ngathĩti ĩno ũrathoma ĩkoragwo na ndũmĩrĩri ĩyo ya Bibilia. Nĩguo wone ũhoro makĩria, ũkũũrio ũgaathikĩrĩria Aira a Jehova rĩrĩa magoka gwaku hĩndĩ ĩngĩ, kana wandĩkĩre acabi a ngathĩti ĩno.

[Kohoro ka magũrũ-inĩ]