▪ Biibilimi Jiisusip ajoqersukkaminut peqqussutaa una atuarsinnaavarput: “Taamaattumik aallarlusi inuiaqatigiit tamaasa uannut ajoqersuganngortissigit . . . ajoqersorlugillu.” (Matthæusi 28:19, 20) Kristumiut tamarmik taamaaliussappat? Aap, Jiisusip ajoqersugaasa siulliit paasivaat taamaaliortussaallutik. Assersuutigalugu apustili Petrusi ima oqarpoq: ‘[Jiisusip] peqquaatigut inunnut oqaluussissutigeqqullugu nalunaajaatigeqqullugulu.’ (Apustilit Suliaat 10:42) Apustililu Paulusi ima allappoq: “Pinngitsoornangami tusarliuttussaagakku, eqqanarlu uanga iivangkiiliu nalunaajaatiginngikkukku.” — 1 Korinthimiut 9:16.

Jiisusip peqqussutaanik naalattut tassaaginnaanngillat Paulusi Petrusilu, ukiunimi hundredelinni siullerni kristumiut tamarmik tamatuminnga maleruaapput. Oqaluussineq ilisarnaatigilerpaat. (Apustilit Suliaat 5:28-32, 41, 42) Ullutsinni Jehovap Nalunaajaasui taakkua maligassiaat ilaarniarsarivaat. Jiisusip oqariartuutigisimasaata assinga, tassa “qilaap Naalagaaffia”, oqaluussissutigisarpaat. — Matthæusi 10:7.

Guutip naalagaaffia pillugu tusarliussaq kikkunnut oqaluussissutigineqassava? Jiisusi paasititsivoq tamanna kikkunnut tamanut sumiikkaluartunulluunniit oqaluussissutigineqassasoq. Ajoqersukkani ima oqarfigai: ‘Nalunaajaasigissavassi nunarsuup isua tikillugu allaat.’ (Apustilit Suliaat 1:8) Taassumalu siulittuutigaa silarsuup naggatissaata nalliutinnginnerani ‘Naalagaaffimmik iivangkiiliu taanna silarsuarmi tamarmi oqaluussissutigineqassasoq inuiannut tamanut nalujunnaarsillugu.’ (Matthæusi 24:14) Taamaattumik kristumiut siulliit ilagisartakkatik upperisaqanngitsullu oqaloqatigiinnarnagit kikkut tamaasa oqaloqatiginiarsarisarpaat. (Kolossemiut 1:23; 1 Timotheusi 2:3, 4) Taamatuttaaq ullumikkut Jehovap Nalunaajaasuisa kikkut tamaasa tusarlerniartarpaat. *

Guutip naalagaaffia pillugu tusarliussaq qanoq sunniuteqarluarnerpaamik oqaluussissutigineqartarpa? Jiisusip nalunnginnamiuk sapinngisamik inuit amerlanerpaat qanoq tusarlerneqarsinnaasut ajoqersukkani illoqarfinnut, illoqarfeeqqanut inuillu angerlarsimaffiinut aallartippai. (Matthæusi 10:7, 11, 12) Jiisusip toqunerata makititaaneratalu kingorna ajoqersugaasa illumiit illumut oqaluussinertik ingerlatiinnarpaat. (Apustilit Suliaat 5:42) Jiisusi ilaarlugu aamma taakku inuit sumiluunniit naapitassaatillugit sumiiffinnilu kikkut tamarmik takkuanni oqaluussisarput. (Johannesi 4:7-26; 18:20; Apustilit Suliaat 17:17) Aamma ullumikkut Jehovap Nalunaajaasui kikkut tamaasa oqaluussiffiginiarlugit taamatut periaaseqartarput.

Jiisusi oqarpoq inuit ilaannaat tusarnaarumaartut. (Matthæusi 10:14; 24:37-39) Kristumiut tamanna pissutigalugu oqaluussinaveersaassappat? Assersuut una eqqarsaatigeriaruk: Nunap sajorujussuarnerata kingorna annaassiniaqataaguit sivisungaatsiartumillu ujaasereerlutit aniguisut ikittuinnaat nanineqarnerat pissutigiinnarlugu ujaasiunnaassavit? Ilimananngilaq, inummik ataatsimik annaassinissat ilimagigukku ujaasiuassaatit. Jiisusip ajoqersukkani ilinniartippai Guutip naalagaaffia pillugu nutaarsiassamik nuannersumik ilassinnikkumaartunik nanisinissamik neriuutissaqartuartillugu pinertusaassasut. (Matthæusi 10:23; 1 Timotheusi 4:16) Illumiit illumut tamakkuninnga ujaasinermikkut Jehovap Nalunaajaasui Guutimik tullerminnillu asanninnerminnik ersersitsisarput. Inuimmi Guutip naalagaaffia pillugu tusarliussaq tusarlugulu ajunngitsumik qisuariarunik annaanneqarsinnaapput. — Matthæusi 22:37-39; 2 Thessalonikamiut 1:8.

Atuagassiami uani atuakkanni tusarliussaq tamanna sammineqarpoq. Paasisaqarnerorusukkuit tulliani Jehovap Nalunaajaasuinit attaveqarfigineqaruit oqaloqatigisinnaavatit, atuagassiamilluunniit matuminnga saqqummiisut allaffigisinnaavatit.

[Quppernerup ataani ilanngussaq]