Ze Ba Buza Babali . . .

Ki kabakalañi Lipaki za Jehova ha ba kutazanga fa ndu ni ndu?

▪ Mwa Bibele, lu fumana taelo yeo Jesu naa file balutiwa ba hae ye li: “Hakulicwalo, ha mu ye, mi mu lute batu ba macaba kaufela ku ba balutiwa, . . . mu ba lute.” (Mateu 28:19, 20) Kana taelo ye, i ama Bakreste kaufela? Balutiwa ba Jesu ba kwa makalelo ne ba utwisisa cwalo. Ka mutala, muapositola Pitrosi naa bulezi kuli: “[Jesu] naa lu laezi ku kutaza kwa batu ni ku paka ka ku tala.” (Likezo 10:42) Muapositola Paulusi ni yena naa ñozi kuli: “Swanelo i ni tamile. Kaniti, ni maibile haiba ni sa shaeli taba ye nde!”—1 Makorinte 9:16.

Haki Paulusi ni Pitrosi feela ba ne ba latelezi taelo yeo ya Jesu, kono Bakreste kaufela ba mwa lilimo za mwanda wa pili ne ba i latelezi. (Likezo 5:28-32, 41, 42) Lipaki za Jehova ni bona kacenu ba lika ku latelela taelo yeo. Ba kutaza lushango lo lu swana ni lwa naa kutalize Jesu, lona lushango lwa “Mubuso wa kwa lihalimu.”—Mateu 10:7.

Lushango lwa Mubuso lu swanelwa ku kutazwa ku bo mañi? Jesu naa bonisize kuli lu swanelwa ku kutazwa kwa batu kaufela kai ni kai. Naa bulelezi balutiwa ba hae kuli: “Mu ka ba lipaki za ka . . . ku yo fita kwa mafelelezo a lifasi.” (Likezo 1:8) Mane naa polofitile kuli pili mafelelezo a muinelo wa lifasi a si ka fita kale, “taba ye nde ye ya Mubuso i ka kutazwa mwa lifasi kaufela kuli ibe bupaki kwa macaba kamukana.” (Mateu 24:14) Kamukwaocwalo, Bakreste ba mwa linako za baapositola ne ba likile ka taata ku kutaza kwa batu kaufela, isiñi feela kwa balikani ba bona kamba kwa batu ba ne ba sa lapeli. (Makolose 1:23; 1 Timotea 2:3, 4) Kamukwaoswana, Lipaki za Jehova kacenu ba lika ka taata ku kutaza ku mañi ni mañi. *

Ki ifi nzila ye buanyu ya ku hasanya ka yona lushango lwa Mubuso? Jesu, ya naa ziba mwa ku fumanela batu ba bañata, naa lumile balutiwa ba hae mwa mileneñi, mwa minzi ni kwa mandu a batu. (Mateu 10:7, 11, 12) Hamulaho wa lifu ni zuho ya Jesu, balutiwa ba hae ne ba zwezipili ku kutaza “fa ndu ni ndu.” (Likezo 5:42) Sina mwa naa ezelize Jesu, balutiwa ba hae ni bona ne ba kutalize ko ne ba kona ku fumana batu kaufela hamohocwalo ni mwa libaka za nyangela. (Joani 4:7-26; 18:20; Likezo 17:17) Kacenu, Lipaki za Jehova ba itusisa miezezo ye swana kuli ba kutaze kwa batu kaufela.

Jesu naa bonisize kuli haki batu kaufela ba ne ba ka teeleza. (Mateu 10:14; 24:37-39) Kana nto yeo i swanela ku palelwisa Bakreste ku kutaza? Mu nyakisise swanisezo ye: Mu nge kuli mu yo muñwi wa sikwata sa batu ba ba sweli ku bata-bata batu ba ba latehile mwa zikinyeho ye tuna, kana ne mu ka tuhela ku bata bakeñisa kuli hamulaho wa nako mu fumani feela batu ba sikai? Batili, ne mu ka zwelapili ku bata ibile feela kuli mu na ni sepo ya kuli mu ka yangwela nihaiba feela mutu a li muñwi. Jesu naa laezi balutiwa ba hae kuli ba tiiseze ku kutaza haiba feela ku na ni sepo ya ku fumana batu ba ba ka amuhela taba ye nde ya Mubuso wa Mulimu. (Mateu 10:23; 1 Timotea 4:16) Ka ku bata batu ba ba cwalo fa ndu ni ndu, Lipaki za Jehova ba bonisa lilato ku Mulimu ni ku ba ba pila mabapa ni bona ili bao puluso ya bona i itingile fa ku utwa lushango lwa Mubuso.—Mateu 22:37-39; 2 Matesalonika 1:8.

Magazini ye mu sweli ku bala ye, i na ni lushango lwa Bibele lo. Kuli mu zibe ze ñata, mu ikambote ni Lipaki za Jehova nako ye tatama ha ba ka to mi potela, kamba mu ñolele bahatisi ba magazini ye.

[Litaluso za kwatasi]