Josombwa Penjo . . .

Ang’o momiyo Joneno mag Jehova Lendo Ot ka Ot?

▪ E Muma, Yesu nochiko jolupne niya: “Dhiuru utim ogendini duto jopuonjrena, . . . kupuonjogi.” (Mathayo 28:⁠19, 20) Be chikni omako Jokristo duto? Jopuonjre mokwongo mag Yesu ne owinjo tiend chikno kamano. Kuom ranyisi, jaote Petro nowacho ni: “[Yesu] nochikowa ni mondo wayal ni ji.” (Tich Joote 10:42) Jaote Paulo bende nondiko niya: “Ochuna ni nyaka ayal. Yaye, nodokna malit ka ok ayalo Wach Maberno! ”​​—⁠1 Jo Korintho 9:​16.

Ok mana Paulo gi Petro ema ne oluwo chikno, to Jokristo mokwongo bende notimo kamano. Tij lendo ema ne en tich maduong’ ma ne gitimo. (Tich Joote 5:​28-​32, 41, 42) Joneno mag Jehova e kindegi bende timo mana kamano. Gilando wach achielno ma Yesu nolando, ma en “pinyruodh polo.”​​—⁠Mathayo 10:7.

Onego waland wach Pinyruoth ne jomage? Yesu nowacho ni onego waland wachno ne ji duto kuonde te. Ne onyiso jopuonjrene niya: “Unudok jonenona . . . nyaka tung’ piny.” (Tich Joote 1:8) Bende Yesu nokoro ni kapok giko mar piny marachni ochopo, ‘wach maberni mar pinyruoth nolandre e pinje duto.’ (Mathayo 24:14) E momiyo Jokristo mokwongo notimo kinda mondo giwuo gi ji duto, maok mana gi joma ne ging’eyo kata joma ne onge din. (Jo Kolosai 1:​23; 1 Timotheo 2:​3, 4) E yo ma kamano bende, Joneno mag Jehova kindegi lendo ne ji duto. *

En yo mane maber moloyo mar lando wach Pinyruoth? Yesu ma ne ong’eyo kaka inyalo chop ne ji mang’eny kaka nyalore, ne ooro jopuonjrene e taonde, e mier, koda e udi. (Mathayo 10:⁠7, 11, 12) Bang’ tho kendo chier mar Yesu, jopuonjrene ne odhi nyime gi lendo “ot ka ot.” (Tich Joote 5:​42, New World Translation) Mana kaka Yesu notimo, ne gilendo kamoro amora ma ji ne yudoree. (Johana 4:​7-​26; 18:20; Tich Joote 17:17) Kindegi, Joneno mag Jehova tiyo gi yorego e lendo ne ji duto.

Yesu nowacho ni ok ji duto mabiro winjo. (Mathayo 10:14; 24:⁠37-​39) Be mano onego onyos chuny Jokristo ne tij lendo? Par ane: Kapo ni in achiel kuom joma reso ji bang’ masira moro maduong’, be ibiro weyo manyo joma inyalo resi mana nikech bang’ kinde iyudo ni usereso mana joma nok? Ooyo, ibiro timo sinani kata ka en mana ng’at achiel ma igeno reso. Yesu nochiko jopuonjrene ni mondo ginan tek mana ni nitie joma rwako wach maber mar Pinyruodh Nyasaye. (Mathayo 10:23; 1 Timotheo 4:​16) Joneno mag Jehova nyiso heragi ne Nyasaye koda ne jowetegi kuom manyo joma kamago ot ka ot nikech ngima jogo otenore kuom winjo kendo timo kaluwore gi wach Pinyruoth.​​—⁠Mathayo 22:⁠37-​39; 2 Jo Thessalonika 1:8.

Gaset ma isomoni oting’o wach Pinyruoth mayudore e Muma. Mondo iyud weche momedore, wuo gi Joneno mag Jehova chieng’ ma gilimie kendo, kata inyalo ndiko ne joma ogoyo gasedni.

[Weche moler piny]