▪ Beibel ta bisa cu Hesus a duna su siguidonan e mandamento aki: “Bay, y haci hende di tur nacion mi discipel, . . . y siña nan.” (Mateo 28:19, 20) E mandamento aki ta conta pa tur cristian? E prome discipelnan di Hesus a compronde cu esey ta asina. Apostel Pedro, por ehempel, a bisa: “[Hesus] a manda nos predica na e pueblo y duna testimonio cabal.” (Echonan 10:42) Y apostel Pablo a bisa: “Ta mi obligacion esey ta. Realmente, ay di mi si mi no declara e bon noticia!”​—1 Corintionan 9:16.

No ta Pablo y Pedro so a obedece e mandamento di Hesus, sino tur cristian den prome siglo. E trabou di predica tabata e trabou di mas importante pa nan. (Echonan 5:28-32, 41, 42) Y awe, Testigonan di Jehova tambe ta haci esfuerso pa cumpli cu e mandamento ey. Nan ta predica e mesun mensahe cu Hesus a predica, esta, “e Reino di cielo.”​—Mateo 10:7.

Awor, na ken nos mester predica e mensahe di Reino? Hesus a indica cu nos mester predica na tur hende, tur caminda. El a bisa su discipelnan: “Boso lo ta mi testigonan . . . na e parti mas leu di tera.” (Echonan 1:8) El a hasta profetisa cu prome cu e fin yega, “e bon noticia aki di e Reino lo ser predica den henter e tera habita, como testimonio pa tur nacion.” (Mateo 24:14) Pesey, e cristiannan di prome siglo tabata haci esfuerso pa papia cu tur hende, no solamente cu nan conocinan of cu hende cu no tabata pertenece na un religion. (Colosensenan 1:23; 1 Timoteo 2:3, 4) Awendia tambe Testigonan di Jehova ta haci esfuerso pa predica na tur hende. *

Cua ta e metodo mas eficaz pa predica e mensahe di Reino? Hesus, kende tabata sa con pa alcansa mas tanto hende posibel, a manda su discipelnan bay predica den stad, pueblo y di cas pa cas. (Mateo 10:7, 11, 12) Despues di e morto y resureccion di Hesus, su discipelnan a sigui predica “di cas pa cas.” (Echonan 5:42) Mescos cu Hesus, nan tambe a duna testimonio informal y predica na luganan publico. (Juan 4:7-26; 18:20; Echonan 17:17) Awe, Testigonan di Jehova ta uza e mesun metodonan ey pa predica na tur hende.

Pero Hesus a indica cu no ta tur hende lo scucha of acepta e mensahe. (Mateo 10:14; 24:37-39) Esey mester stroba cristiannan di predica? Pensa riba e ilustracion aki: Supone cu un temblor severo a tuma luga y cu bo ta forma parti di un team di rescate. Lo bo stop di busca sobrebibiente despues di un rato pasobra ta algun hende so boso por a rescata? No. Tanten cu tin speransa di rescata sikiera un persona, lo bo sigui busca. Di mes manera, Hesus a instrui su discipelnan pa persevera den e trabou di predica tanten cu tin speransa pa haya hende cu lo acepta e mensahe di Reino. (Mateo 10:23; 1 Timoteo 4:16) Dicon? Pasobra bida di hende ta den wega. Pesey mes Testigonan di Jehova ta sigui bay di cas pa cas en busca di hende cu kier tende y acepta e mensahe di Reino. Di e manera ey, Testigonan di Jehova ta demostra cu nan ta stima Dios y nan prohimo.​—Mateo 22:37-39; 2 Tesalonicensenan 1:8.

E revista cu bo ta lesando aki ta siña hende tocante e mensahe di Reino. Pa mas informacion, papia cu Testigonan di Jehova ora bo topa cu nan of skirbi e editornan di e revista aki.

[Nota]