Basikubala Balabuzya . . .

Nkaambo nzi Bakamboni ba Jehova Ncobakambaukila Kuŋanda Aŋanda?

▪ Mu Bbaibbele, tujana mulawo ooyu Jesu ngwaakapa basikumutobela wakuti: “Aboobo kamuya mukagwasye bantu bamisyobo yoonse kuba basikwiiya, . . . kubayiisya.” (Matayo 28:19, 20) Sena eeci cilabajatikizya Banakristo boonse? Basikwiiya ba Jesu bakusaanguna bakalizyi kuti cilabajatikizya. Mucikozyanyo, mwaapostolo Petro wakaamba kuti: “[Jesu] wakatulailila kukambaukila bantu akupa bumboni cakulomya.” (Milimo 10:42) Alimwi mwaapostolo Paulo wakalemba kuti: “Ngomukuli ngondakapegwa. Mubwini, maawe kulindime ikuti naa kanditaambilizyi makani mabotu!”—1 Bakolinto 9:16.

Tiibakali buyo ba Paulo a Petro ibakautobela mulawo wa Jesu pele a Banakristo bamumwaanda wamyaka wakusaanguna. Mulimo wakukambauka ngomulimo wakali mupati mubuumi bwabo. (Milimo 5:28-32, 41, 42) Mazuba aano, Bakamboni ba Jehova balasoleka kucita mbubwenya oobu. Bakambauka mulumbe ngweenya ngwaakali kukambauka Jesu, wa “Bwami bwakujulu.”—Matayo 10:7.

Ino mbaani beelede kukambaukilwa mulumbe wa Bwami? Jesu wakaamba kuti weelede kukambaukwa kubantu boonse. Wakaambila basikwiiya bakwe kuti: “Muyooba bakamboni bangu . . . mane akusikila kumagolelo aanyika.” (Milimo 1:8) Alimwi mane wakaamba kuti kaatanasika mamanino aabweende bwazyintu oobu, “makani mabotu aa Bwami aaya ayookambaukwa munyika yoonse kuti bukabe bumboni.” (Matayo 24:14) Kutegwa bauzuzikizye mukuli ooyu, Banakristo bamumwaanda wamyaka wakusaanguna bakasolekesya kubandika abantu boonse kutali buyo balongwe babo naa bantu batakali kukomba. (Bakolose 1:23; 1 Timoteyo 2:3, 4) Mbubwenya buyo amazuba aano, Bakamboni ba Jehova balasolekesya kusikila bantu boonse. *

Ino ninzila nzi iibeleka kabotu yakumwaya mulumbe wa Bwami? Jesu iwakazyi mbobakonzya kusikilwa bantu banji, wakatuma basikwiiya bakwe mumadolopo, muminzi, alimwi amumaanda aabantu. (Matayo 10:7, 11, 12) Jesu naakafwa akubusyigwa, basikwiiya bakwe bakazumanana kukambauka “kuŋanda aŋanda.” (Milimo 5:42) Mbubwenya mbwaakacita Jesu, abalo bakacita bukambausi bwamukwiizya alimwi amumasena aabuleya. (Johane 4:7-26; 18:20; Milimo 17:17) Mazuba aano, Bakamboni ba Jehova bakambaukila bantu boonse kwiinda mukubelesya nzila nzyoonya eezyi.

Jesu wakaamba kuti tabali boonse bayooswiilila. (Matayo 10:14; 24:37-39) Sena eeci ceelede kulesya Banakristo kukambauka? Amubone cikozyanyo eeci: Ikuti naa mwakali akati kabasikufwutula bantu nikwamana kucitika muzuzumo wanyika, sena mulacileka kuyandaula akaambo kakuti mwajana buyo bantu basyoonto? Peepe, mulazumanana kufwumbwa kuti kamujisi bulangizi bwakuti inga mwafwutula muntu omwe. Jesu wakalailila basikwiiya bakwe kuzumanana kufwumbwa kuti kakuli bulangizi bwakujana bamwi bayooswiilila makani mabotu aajatikizya Bwami bwa Leza. (Matayo 10:23; 1 Timoteyo 4:16) Kwiinda mukuyandaula bantu bali boobo kuŋanda aŋanda, Bakamboni ba Jehova batondezya kuti balamuyanda Leza alimwi abasimukobonyina ibakonzya kufwutulwa kwiinda mukumvwa mulumbe wa Bwami.—Matayo 22:37-39; 2 Batesalonika 1:8.

Magazini njomubala yaamba mulumbe ooyo wamu Bbaibbele. Kutegwa muzyibe zinji, amukabandike a Bakamboni ba Jehova baakuboola, naa amubalembele basikumwaya magazini eeyi.

[Bupanduluzi buyungizidwe]