▪ Long Baibel, yumi ritim tok em Jisas i mekim long ol disaipel bilong em olsem: “Yupela i mas i go na kamapim ol disaipel long olgeta lain man. . . . Skulim ol.” (Matyu 28:19, 20) Yu ting dispela tok bilong Jisas i go long olgeta Kristen? Ol disaipel bilong Jisas long pastaim i bin save olsem dispela tok i go long olgeta Kristen. Olsem, aposel Pita i tok: “Em [Jisas] i tokim mipela long autim tok long ol manmeri na stori gut tru.” (Aposel 10:42) Na aposel Pol i tok: “Em wanpela wok mi mas mekim. Tru tumas, sapos mi no autim gutnius, bai mi stap nogut tru!”—1 Korin 9:16.

Pol na Pita wantaim olgeta Kristen bilong pastaim i bin bihainim dispela tok bilong Jisas. Ol i putim wok autim tok i stap olsem nambawan bikpela wok bilong ol. (Aposel 5:28-32, 41, 42) Ol Witnes Bilong Jehova long nau tu i wok strong long mekim olsem. Ol i autim wankain tok olsem Jisas i bin mekim, em tok i stori long “Kingdom bilong heven.”—Matyu 10:7.

Ol i mas autim tok bilong Kingdom long husat? Jisas i tok ol i mas autim dispela tok long ol manmeri long olgeta hap. Em i tokim ol disaipel: “Yupela bai stap witnes bilong mi . . . i go inap long olgeta hap bilong graun.” (Aposel 1:8) Em i tok profet tu olsem paslain long pinis bilong pasin nogut bilong nau i kamap, “ol bai autim dispela gutnius bilong Kingdom long olgeta hap bilong graun na bai olgeta lain man i ken harim.” (Matyu 24:14) Olsem na ol Kristen bilong pastaim i bin toktok wantaim olgeta kain man, na i no long ol pren tasol o long ol man i no save lotu. (Kolosi 1:23; 1 Timoti 2:3, 4) Olsem tasol, ol Witnes Bilong Jehova long nau i autim tok long olgeta kain man. a

Wanem nambawan gutpela rot bilong autim tok bilong Kingdom? Jisas i save long rot bilong autim tok long planti manmeri, olsem na em i salim ol disaipel bilong em i go long ol taun, ol viles, na ol haus. (Matyu 10:7, 11, 12) Bihain long Jisas i dai na kirap bek, ol disaipel bilong em i wok yet long autim tok “long olgeta wan wan haus.” (Aposel 5:42) Olsem Jisas, ol tu i autim tok long kain kain taim na ples na long ol pablik ples. (Jon 4:7-26; 18:20; Aposel 17:17) Long nau, ol Witnes Bilong Jehova i bihainim wankain pasin na autim tok long olgeta kain man.

Jisas i tok i no olgeta man bai putim yau long tok ol i autim. (Matyu 10:14; 24:37-39) Yu ting dispela bai pasim ol Kristen long autim tok? Tingim dispela: Sapos yu wantaim sampela man i go bilong helpim ol manmeri bihain long wanpela bikpela guria, yu ting yu bai les long painim ol manmeri sapos bihain liklik yu lukim olsem yupela i bin painim liklik lain tasol? Nogat, yu bai wok strong yet sapos yu save olsem yu bai seivim wanpela man na em i no ken kisim bagarap. Jisas i tokim ol disaipel bilong em long wok strong yet na no ken givap, long wanem, ol inap painim sampela man husat bai harim gutnius long Kingdom Bilong God. (Matyu 10:23; 1 Timoti 4:16) Long rot bilong painim ol kain man olsem long ol haus, ol Witnes Bilong Jehova i soim olsem ol i laikim tru God na ol i laikim tru ol manmeri em ol inap kisim laip sapos ol i harim gutnius bilong Kingdom na mekim ol samting i stret long dispela.—Matyu 22:37-39; 2 Tesalonaika 1:8.

Magasin nau yu ritim i kamapim dispela tok bilong Baibel. Bilong kisim sampela save moa, toktok wantaim wanpela Witnes Bilong Jehova i kam long haus bilong yu o raitim pas i go long lain bilong wokim dispela nius.

[Futnot]