Se Akpanamde Edieke Mûnyeneke Okụk nte Ekesinyenede

OBED enyene nditọ iba. Enye akanam utom isua duop ke ata akamba ufọkisen ke akwa obio kiet ke Africa. Emi ama anam enye ekeme ndise mban̄a ikọtufọk esie. Ke ini ke ini, enye ama esimen mmọ ọwọrọ aka udia uwem ke itie ubọkunam ke idụt oro. Edi n̄kpọ ama ọtọ etịmede ke ini ẹketienede ẹsio enye ke utom.

Stephen akanam utom ke itie unịm okụk ke n̄kpọ nte isua 22 tutu akabade edi akwa owo do. Itieutom emi ẹma ẹnam ediwak n̄kpọ ẹnọ enye, ẹnọ enye akamba ufọk, ubomisọn̄, nditọufọk, ẹnyụn̄ ẹdọn̄ nditọ esie ke ọwọrọetop ufọkn̄wed. Edi ẹma ẹsio enye ke utom ke ini ẹkenamde ndusụk ukpụhọde ke itieutom oro. Enye Stephen ọdọhọ ete: “Ekikere ama etịmede mi ye ofụri ubon mi. Enyịn ama anan mi tutu ofụri idem edinyenyek mi. Kpukpru n̄kpọ ẹkedọdiọk mi esịt.”

Se isụk inemede emi ọwọrọ ata ediwak owo. Nsọn̄ọn̄kpọ emi osụk akade iso ke ofụri ererimbot anam ẹsion̄o ata ediwak owo emi ẹkenyenede ata eti okụk ke utom. Idem ndusụk mbon emi ẹkụtde utom, owo ikpehe mmọ eti okụk, ndien nsọn̄ọn̄kpọ emi inyụn̄ iyakke mmọ ikpat kiet. Nsọn̄ọn̄kpọ emi etie nte edịm, ibọn̄ke ọkọm kiet.

Oyom Ẹnyene Ata Ọniọn̄

Ekikere esiwot mbon oro mînyeneke okụk aba m̀mê oro mînyeneke aba nte ẹkesinyenede. Imọdiọn̄ọ ke idụhe nte idem mîdisụk imemke owo emi utọ n̄kpọ emi ọwọrọde. Edi owo ọniọn̄ kiet ọkọdọhọ ete: “Nte idem emem fi ke usen nnanenyịn? Odudu fo oyosụhọde.” (Mme N̄ke 24:10) Utu ke ndiyak idem emem nnyịn sia n̄kpọ mîtiehe aba nte ekesitiede, ikpenyene ndinam n̄kpọ ke “ata ọniọn̄” nte Bible etemede.—Mme N̄ke 2:7.

Okposụkedi emi Bible mîdịghe n̄wed emi ọnọde owo item aban̄a okụk, item oro enye ọnọde aban̄a okụk an̄wam ata ediwak owo ke ofụri ererimbot. Ẹyak ise ndusụk akpan item emi Bible ọnọde ke n̄kpọ emi.

Bem iso biere se edibiatde. Kere ban̄a ikọ Jesus oro ke Luke 14:28: “Anie ke otu mbufo emi oyomde ndibọp tọwa mîdibemke iso isụhọde itie ibat se iditakde, man okụt m̀mê enye enyene okụk emi ekemde ndida mbọp mma?” Ndida item emi ndu uwem ọwọrọ ke ọfọn iwewet se iyomde inịm ikûnyụn̄ idep n̄kpọ oro nnyịn mîkewetke inịm. Obed emi iketịn̄de iban̄a ke enyọn̄ emi okụt ke imemke ndinam emi. Enye ọdọhọ ete: “Ke ini n̄kosụk nnamde utom, ima isidep se ikokụt, idem mme n̄kpọ oro nnyịn mîkenen̄ekede iyom. Nnyịn ikesiwetke-wet se iyomde ndidep sia okụk ama odu barasuene.” Ndiwewet se oyomde ayanam abiat ekpri okụk oro enyenede ke mme n̄kpọ oro ẹnen̄erede ẹyom ke ufọk.

Kpụhọde nte odude uwem. Isimemke utom owo emi ekenen̄erede enyene okụk ndikpụhọde nte enye odude uwem, edi ana ẹnam emi. Stephen ọdọhọ ete: “Okposụkedi ufọk nnyịn mîkokponke, nnyịn mîkonyụn̄ ibọpke ima, ima iwọrọ ikodụn̄ do man ikûbiat aba okụk ke okụk ufọk. Ima inyụn̄ ision̄o nditọ  nnyịn ke ọwọrọetop ufọkn̄wed oro mmọ ẹkekade ikesịn ke eti ufọkn̄wed en̄wen emi owo mîkpehe okụk awawak akaha.”

Edieke oyomde ndikụt unen ke se isụk inemede emi, neme enye ata in̄wan̄-in̄wan̄ ke iso ofụri ufọk. Austin emi ama akanam utom ke itie unịm okụk ke isua usụkkiet mbemiso ẹsiode enye ke utom ọdọhọ ete: “Ami ye n̄wan mi ima itie iwet mme n̄kpọ emi inen̄erede iyom. Ima ibiere ke nnyịn ididepke mme n̄kpọudia oro ẹsọn̄de urua, idisikaha ikpọ itie udia uwem, m̀mê ndidi ima ikokụt ọfọn̄ nnyịn idep. Esịt enem mi ndikụt ofụri ubon mi ẹdianade kiet ẹnam mme ukpụhọde emi.” N̄kpri nditọwọn̄ ke ufọk idinen̄ekede idiọn̄ọ ntak emi ẹnamde mme ukpụhọde, edi mbufo mme ete ye eka ẹmekeme ndin̄wam mmọ ẹdiọn̄ọ ntak anade ẹnam.

Nyịme ndinam utom en̄wen. Edieke edide ekesinam utom mbakara, ekeme ndisọn̄ fi ndinam utom emi oyomde odudu. Austin ọdọhọ ete: “Ama enen̄ede ọsọn̄ mi ndinyịme ndinam n̄kpri utom sia n̄kedi akwa owo ke ata akamba itieutom. N̄kpọ en̄wen emi akafịnade mi ekedi se mme owo ẹditịn̄de.” Emi ikpaha owo idem sia Bible ọdọhọ ke Mme N̄ke 29:25 ete: “Editen̄e owo enyịn ọkọk afia.” Nditịmede esịt mban̄a se mme owo ẹditịn̄de idinọhọ fi ye ubon fo se ẹdiade. Nso ke akpanam man etre utọ editịmede esịt oro?

Akpan n̄kpọ edi nsụhọdeidem. Ke ẹma ẹkesio Obed ke utom, akani owo itieutom mmọ ama ọdọhọ enye editiene imọ anam utom udiọn̄ ubomisọn̄. Emi ama oyom enye esisan̄a ata anyan usụn̄ ke ntọn̄ ekedep mme n̄kpọ ye ndom mbakara emi ẹdidade ẹyet ubomisọn̄. Obed ọdọhọ ete: “N̄kamaha utom emi, edi n̄kekemeke ndinyan̄a. Nsụhọdeidem ama an̄wam mi nnam ukpụhọde nnyụn̄ nnam utom oro edikpede mi se mîyọhọke mbahade inan̄ ke se n̄kesibọde. Edi ekpri se ẹnyụn̄ ẹkpede mi idahaemi ekem se ndade nse mban̄a ubon mi.” Ndi ukereke ke edieke osụhọrede idem ntem, ke emi ayan̄wam fi n̄ko?

Yụhọ ye se enyenede. N̄wed ukabadeikọ kiet ọdọhọ ke owo emi oyụhọde ye se enye enyenede “oyosụk okop inemesịt ke idaha ekededi oro enye odude.” Emekeme ndikere m̀mê owo emi mînyeneke okụk ekeme ndikop inemesịt. Kop se apostle Paul, kpa isụn̄utom Abasi, emi ekesidude ke unana ndusụk ini ọkọdọhọde mi ete: “Mmekpep ndiyụhọ ye se nnyenede ke idaha ekededi oro ami ndude. Ke akpanikọ mmọfiọk ndinyene esisịt mmonyụn̄ mfiọk ndinyene uwak uwak.”—Philippi 4:11, 12.

Sia owo ndomokiet mîdiọn̄ọke n̄kpọn̄, n̄kpọ ekeme ndifọn nnyịn mfịn, ọdiọk n̄kpọn̄. Edi n̄kpọ ekeme ndifọn ye nnyịn edieke inamde item emi Paul akadade spirit Abasi ọnọ mi ete: “Ke akpanikọ, uten̄e Abasi emi edi usụn̄ akwa udori ke ini asan̄ade ye ediyụhọ ye se owo enyenede. Ntre, ke inyenede se idiade ye se isịnede ye itie udakibuot, nnyịn iyoyụhọ ye mme n̄kpọ emi.” Paul ikọdọhọke idi ifu, edi ọkọdọhọ iyụhọ ye se inyenede.—1 Timothy 6:6, 8.

Nte Ẹkpenyenede Ata Inemesịt

Idịghe nnyịn ndikọ akpakịp inyene m̀mê ndidu uwem nte ọbọn̄ edinam inyene ata inemesịt. Jesus ke idemesie ọkọdọhọ ete: “Inemesịt odu ke ndinọnọ akan ke ndibọbọ.” Omokụt do ke se inọde owo ata inemesịt ye uyụhọ edi ndinam n̄kpọ nnọ mbon en̄wen nnyụn̄ nsọn̄ọ mmọ idem.—Utom 20:35.

Jehovah Abasi emi edide Andibot nnyịn etịm ọfiọk kpukpru se iyomde. Enye ada Ikọ esie kpa Bible ọnọ item emi an̄wamde ediwak owo ẹnam uwem mmọ ọfọn mînyụn̄ iyakke mmọ ẹtịmede esịt ẹkaha. Edi akpanikọ nte ke ndida item Bible ndu uwem idinamke owo ọsọsọp oforo m̀mê ndinam n̄kpọ ọfọn owo ke mbuari. Edi Jesus ama ọsọn̄ọ etịn̄ nte ke Abasi ọyọnọ mbon oro ‘ẹkade iso ndibem iso nyom Obio Ubọn̄ ye edinen ido Abasi’ se mmọ ẹyomde ke usen ke usen.—Matthew 6:33.