OBED mokõi itaʼýra ha diez áñorema ombaʼapo peteĩ otél iporãitereívape, oĩva peteĩ puévlope Áfricape. Opa mbaʼe oho porã kuri chupe ha ifamiliakuérape. Upéicha rupi oho jepi hikuái de vakasión peteĩ párke nasionál oĩhápe mymbakuéra. Péro ndahetavéima rupi ojepyta upe otélpe, operde itraváho.

Stephen 22 áño rasáma ombaʼapo peteĩ vánko iñimportántevape ha mbeguekatúpe ohupytýma umi puésto ijyvatevéva. Pe vánko omoĩ chupe peteĩ óga tuicháva, áuto, empleáda ha omoinge ifamiliakuérape umi eskuéla oñemboʼe porãvehápe. Péro peteĩ árape upe vánko omoakãva odesidi okambiapa ipuéstogui umi ombaʼapóvape upépe ha oñemosẽ Stéphenpe. Haʼe heʼi: “Che ha che família rombyasyeterei upe oikóva. Añamarga ha ajedesespera, ndaikuaái mbaʼépa oikóta orehegui”.

Ndahaʼéi ningo haʼekuéra añónte ohasáva koʼã mbaʼe ijetuʼúva. Hetaiterei tapicha oĩ ombaʼapo porã vaʼekue ha koʼág̃a opyta travahoʼỹre. Ha umi oguerekóva traváho katu ndojepagaporãi chupekuéra. Ijetuʼuveha, opa mbaʼe hepy hepyve ohóvo. Tahaʼe umi tetã ipláta térã imboriahúva ohasa koʼã situasión.

Tekotevẽ ñanearandu

Ñaganaʼive térã japerdéramo ñande traváho, ñañeñandu vaítante voi. Ha ndaivaíri ningo jajepyʼapy, peteĩ kuimbaʼe iñarandúva heʼivaʼekue: ‘¡Nekangýramo ivai jave, nandepuʼakamoʼãi!’ (Proverbios 24:10). Upéicharõ, ijetuʼu jave ñandéve ñañemantene hag̃ua, jajepyʼapyeterei rangue, iporãve jaheka umi konsého oĩva la Bíbliape ‘ñanearandu’ hag̃ua (Proverbios 2:7, ÑÑB).

La Bíbliape ndeʼíriramo jepe mbaʼéichapa jaiporuvaʼerã ñande pláta, omeʼẽ heta konsého oipytyvõmava hetaiterei tapicha oparupiguápe oñemantene hag̃ua orekomívarente. Jahechamína umi konsého omeʼẽva la Biblia.

Ekalkulavaʼerã mboýpa regastáta. Ehechamína ko konsého Jesús omeʼẽvaʼekue oĩva Lucas 14:28-pe: “¿Mávapa pende apytépe omopuʼãsérõ peteĩ tórre ndoguapyraẽi okalkula mboýpa ogastáta, ohecha hag̃ua ikatútapa omohuʼã?”. Rejapo hag̃ua ko téystope heʼíva rehechavaʼerã mboy pevépa ikatu regasta ha rejapo upeichaite. Péro, Obed ohechakuaaháicha, upéva ijetuʼu. Haʼe heʼi: “Aperde mboyve che traváho, che familiakuérandi rojepokuaámi roho supermerkádope ha rogueru heta mbaʼe, péro umíva apytépe hetave mbaʼe noroikotevẽiva. Arakaʼeve ndorokalkuláiva mboy pevépa rogastáta, roguerekógui umi mbaʼe roipotáva repyrã”. Rekalkula porãrõ mboy pevépa regastakuaa, reiporu porãvéta umi platami reguerekóva remantene hag̃ua ne família.

Eñehaʼãvaʼerã reiko ikatumiháicha koʼág̃a. Añetehápe ijetuʼu jaiko hag̃ua umi mbaʼe jarekomívarente, péro tekotevẽ jajapo ani hag̃ua ivaive ñane situasión. La Bíbliape heʼi: “Oikokuaáva ohecha yvykua ha ojere  chugui” (Proverbios 22:3). Stephen heʼi: “Saʼive rogasta hag̃ua, rova jey ore róga yma guarépe, michĩve ha isensíllovape. Upéi, roguerova ore familiakuéra ótro koléhio ivaratovévape, péro omboʼe porãva”.

Peñemongeta porãramo ikatúta penepytyvõ pende rogapýpe pejepokuaa hag̃ua pe situasión pehasávare. Austin ombaʼapo nueve áño peteĩ vánkope, péro upéi operde itraváho. ¿Mbaʼépa ojapo haʼe ha hembireko? Austin heʼi: “Roguapy roanota oñondive umi mbaʼe añetehápe roikotevẽva. Rodesidi saʼive rogasta umi tembiʼu hepýva ha vakasión rehe. Avei rodesidi ndorojoguaveimaha umi ao roipotágui reínte. Avyʼa ahechávo che família oñehaʼãmbaite hague ojapo chendive koʼã mbaʼe”. Umi mitã ningo ikatu nontendéi mbaʼérepa saʼive ojegastavaʼerã, péro ituvakuéra oipytyvõvaʼerã chupekuéra ontende hag̃ua.

Reimevaʼerã rejapo hag̃uáicha ótro traváho. Oimérire rembaʼapóva ofisínapente, ikatu retĩ rejapo hag̃ua ótro traváho. Austin heʼi: “Ambaʼapo rire peteĩ puésto yvatépe peteĩ vánko tuichávape, ijetuʼu chéve ambaʼapo hag̃ua umi traváho naiñimportanteguasúivape”. Heta oĩ péicha oñeñandúva ha Proverbios 29:25-pe heʼi voi: “Yvypóragui jekyhyje, upéva peteĩ ñuhã”. Péro nemanduʼavaʼerã remboguapyetereíramo ndejehe umi mbaʼe ojeʼéva, neremongarumoʼãi ne famíliape. Upéicharõ, ¿mbaʼépa ikatu nepytyvõ resẽ hag̃ua tenonde gotyo?

Neumílderamo tuicha nepytyvõta. Obed operde rire itraváho pe otélpe, peteĩ ikompañerokue oikuaveʼẽ chupe traváho itallérpe. Ombaʼapóramo upépe oguatavaʼerã mombyry umi tape ijyvy timbóvare ogueru hag̃ua pintúra ha umi mbaʼe oñekotevẽva umi áutore g̃uarã. Obed heʼi: “Ndachegustaiete upe traváho, péro upévante akonsegi. Cheumílde rupi chepytyvõ ambaʼapo hag̃ua upévape, aganáramo jepe saʼieteve pe otélpe ambaʼapórõ guarégui. Péro agana aikotevẽmíva amantene hag̃ua che família”. Ha nde, ¿ikatúpa rejapo avei upéicha?

Evyʼavaʼerã reguerekomívare. Umi saʼi orekóvape oñemantene hag̃ua ikatu ijetuʼu ovyʼa hag̃ua orekomívare. Péro iporãta ojepyʼamongetáramo apóstol Pablo konséhore, haʼe ohasavaʼekue avei heta mbaʼe, upévare heʼi: ‘Ajepokuaa añekontenta arekomívarente. Che ahasa asykuaa ha areko hetakuaa’ (Filipenses 4:11, 12, ÑÑB).

Añetehápe ikatu oho porã ñandéve, péro jaikuaa hetave vése ndaupeichaiha, koʼã tiémpo ijetuʼuetévape ikatu voi hína oho vaietereive ñandéve. Upévare iporãta jajapo Pablo ohaivaʼekue espíritu sánto rupive: “Pe jerovia añeteguáva tuicha mbaʼe voi umi oñemomirĩvape g̃uarã ha ovyʼáva umi mbaʼe oguerekóva rehe. Upévare jaguerekóramo ñane rembiʼu ha ñande ao, tajavyʼa koʼã mbaʼe reheve” (1 Timoteo 6:6, 8, ÑÑB). Koʼã mbaʼe Pablo ohaivaʼekuépe ndeʼíri nañambaʼapoivaʼerãha, síno ñanemokyreʼỹ jahecha hag̃ua hekópe porãnte umi mbaʼe ñaikotevẽva.

Pe vyʼa añetetéva

Javyʼa hag̃ua natekotevẽi jarekopa umi mbaʼe jaipotáva guive ni jaiko porã. Jesús heʼivaʼekue: “Javyʼaiteve ñameʼẽvo, ñandéve oñemeʼẽ rangue” (Hechos 20:35, NM). Upeichaite, jaiporúramo umi mbaʼe jarekóva ñaipytyvõ ha ñamokyreʼỹ hag̃ua ñande rapichakuérape, javyʼa ha ñañeñandu porãta.

Ñande Apohare, Jehová, oikuaa porãiterei ñane remikotevẽ. Iñeʼẽ la Biblia rupive omeʼẽ ñandéve umi konsého iporãva, hetápema oipytyvõva oiko porãve ha ojei hag̃ua heta akãrasýgui. Upéva ndeʼiséi jajapóre koʼã konsého okambiatamaha ñane situasión. Péro Jesús oprometevaʼekue umi “omotenonde memévape Ñandejára Rréino ha ihustísia”, oñemeʼẽtaha umi mbaʼe oikotevẽva káda día g̃uarã (Mateo 6:33, NM).