No Kasano a Mayan-anay ti Bimmassit a Sapul

ADDAAN ni Obed iti dua nga annak. Sangapulo a tawenen nga agtartrabaho iti five-star hotel iti dakkel a siudad ti Africa ken saanna a problema ti material a kasapulan ti pamiliana. Maipasiarna latta ti pamiliana iti zoo iti pagilianda. Nagpatingga amin dagitoy idi naawanan iti trabaho gapu ta bassiten ti kostumer iti hotel.

Iti nasurok a 22 a tawen a panagtrabahona, nagbalinen ni Stephen a manedyer iti dakkel a banko. Karaman kadagiti benepisio iti trabahona ket ti dakkel a balay, kotse, katulong, ken nalatak nga eskuelaan para kadagiti annakna. Idi nagkissayda iti empleado ti banko, maysa ni Stephen kadagiti naikkat. “Naupaykami a sangapamiliaan,” kunana. “Dandani diak mailiwliwag ti pannakaupay, sakit ti nakem, ken danagko.”

Gagangayen daytoy a pasamak. Gapu iti agdama a panagsuek ti ekonomia, adu kadagiti natalged ti pagsapulanda ti naawanan iti trabaho. Adu met ti nakasarak iti trabaho ngem nababa laeng ti sueldo idinto ta nangina ti presio ti magatgatang. Narang-ay man wenno napanglaw a nasion, apektado amin iti panagsuek ti ekonomia.

Kasapulan ti Praktikal a Sirib

No bassit laeng ti sapulmo wenno maawananka iti trabaho, masansan nga agdanagka. Normal laeng a mariknam dayta. Ngem kas kinuna ti masirib a tao: “Impakitam kadi a naupayka iti aldaw ti rigat? Kurangto ti bilegmo.” (Proverbio 24:10) Imbes nga agdanagka no rumigat ti biag, agpaiwanwanka iti Sao ti Dios ket ipategmo ti “praktikal a kinasirib.”​—Proverbio 2:7.

Nupay ti Biblia ket saan a libro a mangiwanwan maipapan iti kuarta, nakatulongen ti balakadna iti adu a tattao iti intero a lubong. Usigentayo ti sumagmamano a prinsipio ti Biblia.

Agbadyet. Usigem ti kinuna ni Jesus iti Lucas 14:28: “Asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos, tapno kitaenna no adda umanay a pangleppasna iti dayta?” Kaipapanan dayta ti panagbadyet. Ngem kas kunaen ni Obed, mabalin a narigat daytoy. “Idi adda pay trabahok,” kinunana, “masansan a nagadu ti gatangenmi iti supermarket a saanmi met unay a kasapulan. Dikam agbadbadyet gapu ta adda met kuartami a panggatangmi iti aniaman a kayatmi.” Makatulong ti panagbadyet tapno mayanay ti bassit a sapul para iti kasapulan ti pamilia.

Baliwam ti estilo ti panagbiagmo. Talaga a makaikawa ti simple a panagbiag ngem kasapulan dayta. Kuna ti maysa a proverbio ti Biblia: “Makita ti manakem ti dumteng a riribuk ket liklikanna.” (Proverbio 22:3; Naimbag a Damag Biblia) “Tapno makaekonomiakami, immakarkami a sangapamiliaan iti bukodmi a balay, basbassit ken di pay nalpas,” kuna ni Stephen. “Immakar dagiti annakmi kadagiti saan unay a nangina  nga eskuelaan ngem nasayaat met latta ti ipaayna nga edukasion.”

Nasken ti sangapamiliaan a panagsasarita tapno nalaklaka a makibagay ti tunggal maysa iti baro a kasasaad. Kuna ni Austin a siam a tawen a nagtrabaho iti banko sakbay a naikkat iti trabahona: “Inlistami ken baketko ti bambanag a talaga a kasapulanmi. Masapul a kissayanmi ti gasgastuenmi iti taraon, bakasion, ken baro a kawes. Maragsakanak ta nakitinnulong ti pamiliak iti inaramidmi a panagbalbaliw.” Siempre, mabalin a saan a maawatan dagiti ubbing no apay a kasapulan ti kasta a panagbalbaliw, ngem kas nagannak, masapul nga ilawlawagmo kadakuada.

Dika agpilpili iti trabaho. No nairuamkan iti trabaho iti opisina, mabalin a maikawaka iti manomano a trabaho. “Kasla diak kabaelan ti nababa a trabaho ta nairuamakon iti nangato a saad iti dakkel a kompania,” kuna ni Austin. Saan a nakaskasdaaw daytoy ta kuna ti Biblia iti Proverbio 29:25: “Ti panagpigerger iti tattao isu ti mangipakat iti silo.” Kas iti kunada a no paturayem ti bain, matayka iti bisin. Ania ti makatulong kenka tapno maikkat ti negatibo a kapanunotan?

Masapul ti kinapakumbaba. Kalpasan a naikkat ni Obed iti trabahona iti hotel, adda katrabahuanna a nangitukon kenkuana iti trabaho iti pagtarimaanan iti lugan. Masapul a magmagna iti adayo ken natapok a kalsada tapno agbirok iti gumatang iti pintura ken alikamen ti lugan. Kuna ni Obed: “Diak koma kayat daytoy a trabaho ngem awanen ti pagpiliak. Nakatulong kaniak ti kinapakumbaba tapno awatek ti sueldo nga awan pay kakapat iti dati a sueldok ngem umdas met para iti kasapulan ti pamiliak.” Makatulong kadi kenka ti kasta a panangmatmat?

Makontento. Depinaren ti maysa a diksionario ti maysa a tao a kontento kas daydiay “naragsak ken mapnek iti bambanag nga adda kenkuana.” Mabalin a saan a realistiko dayta iti tao a problemado iti pinansial. Ngem usigentayo ti sasao ni apostol Pablo a maysa a misionero, a makaammo no ania ti rikna ti awanan: “Kadagiti aniaman a kasasaadko, naadalko ti mapnek. Iti kinapudnona, ammok no kasano ti agbalin a nanumo kadagiti pagtaraon, iti kinapudnona ammok no kasano ti maaddaan iti kinaruay.”​—Filipos 4:11, 12.

Mabalin a nasaysayaat ti kasasaadtayo, ngem kadagitoy agbaliwbaliw a panawen, nalabit nakarkaronto pay ti mapasamak. Magunggonaantayo no ipapusotayo ti naipaltiing a balakad ni apostol Pablo: “Iti kinaagpaysuanna, dayta ket panggun-od iti dakkel a gunggona, daytoy nadiosan a debosion agraman iti pannakapnek. Gapuna, no adda pagtaraon ken pagkawestayo, mapnektayon kadagitoy a banag.” Saan nga iparparegta ni Pablo ti kinasadut no di ket ipakpakitana laeng nga ikabil dagiti pisikal a kasapulan iti umiso a lugarda.​—1 Timoteo 6:6, 8.

Gubuayan ti Pudno a Kinaragsak

Ti pudno a kinaragsak ket saan nga agtaud iti pananggun-od ti amin a banag a kayattayo wenno iti aglaplapusanan ken nanam-ay a biag. Kinuna a mismo ni Jesus: “Ad-adu ti kinaragsak iti panangted ngem iti panangawat.” Wen, ti kinaragsak ken pannakapnek ket agtaud iti panangusar iti bambanag nga adda kadatayo tapno tulongan ti sabsabali ken paregtaen ida.​—Aramid 20:35.

Ammo ni Jehova a Dios a Namarsua kadatayo ti amin a kasapulantayo. Babaen iti Saona, ti Biblia, nangted iti praktikal a balakad a nakatulongen iti adu a tattao tapno sumayaat ti biagda ken mabang-aranda iti nakaro a pakaringgoranda. Siempre, saan a dagus a sumayaat ti pinansial a kasasaad ti maysa a tao. Ngem impanamnama ni Jesus a dagidiay ‘mangsapul nga umuna iti pagarian ken iti kinalinteg ti Dios’ maitedto ti amin a kasapulanda iti inaldaw.​—Mateo 6:33.