របៀបដោះស្រាយជីវភាពពេលមានប្រាក់ចំណូលតិចជាងមុន
របៀបដោះស្រាយជីវភាពពេលមានប្រាក់ចំណូលតិចជាងមុន
អូបិឌជាឪពុកដែលមានកូនប្រុសពីរនាក់ អស់រយៈពេល១០ឆ្នាំ គាត់បានធ្វើការឲ្យសណ្ឋាគារលំដាប់ថ្នាក់ផ្កាយប្រាំនៅទីក្រុងធំមួយក្នុងទ្វីបអាហ្វ្រិក ហើយគាត់មិនសូវមានបញ្ហាក្នុងការផ្គត់ផ្គង់ក្រុមគ្រួសារគាត់ទេ។ ម្ដងម្កាល គាត់អាចនាំក្រុមគ្រួសាររបស់គាត់ទៅកម្សាន្តនៅកន្លែងល្អៗ ដូចជាទៅមើលតំបន់អភិរក្សសត្វព្រៃជាដើម។ ប៉ុន្តែ គាត់បានបាត់បង់ការងារ ដោយសារតែការធ្លាក់ចុះនៃភ្ញៀវដែលមកស្នាក់នៅសណ្ឋាគារ ហើយនេះធ្វើឲ្យគាត់លែងមានអ្វីៗដូចពីមុនទៀត។
ស្តេហ្វេនបានធ្វើការអស់រយៈពេលជាង២២ឆ្នាំនៅធនាគារដ៏ធំមួយ ហើយគាត់បានឡើងឋានៈជានាយកប្រតិបត្ដិម្នាក់ក្នុងធនាគារនោះ។ ដោយសារការងារនោះ ធនាគារបានផ្ដល់ការឧបត្ថម្ភពិសេសដល់គាត់និងក្រុមគ្រួសារគាត់ ដូចជាឲ្យគាត់រស់នៅផ្ទះធំមួយ មានឡាន មានអ្នកបម្រើ ហើយកូនៗរបស់គាត់ក៏អាចទៅរៀននៅសាលាដែលមានឈ្មោះល្បីផងដែរ។ ពេលដែលធនាគារចាប់ផ្ដើមផ្លាស់ប្ដូររបៀបរៀបចំបុគ្គលិកក្នុងការិយាល័យ ស្រាប់តែគាត់បាត់បង់ការងារ។ ស្តេហ្វេនបាននិយាយថា៖ «ខ្ញុំនិងក្រុមគ្រួសាររបស់ខ្ញុំធ្លាក់ទឹកចិត្តយ៉ាងខ្លាំង។ ខ្ញុំមានអារម្មណ៍ថាអស់សង្ឃឹម ជូរចត់ក្នុងចិត្ត ហើយព្រួយបារម្ភខ្លាំងណាស់»។
រឿងទាំងនេះមិនមែនជាអ្វីដែលចម្លែកនោះទេ។ ដោយសារសេដ្ឋកិច្ចនៅទូទាំងពិភពលោកបានធ្លាក់ចុះជាលំដាប់ នោះមនុស្សរាប់លាននាក់ដែលមានប្រាក់ចំណូលជាទៀងទាត់បាត់បង់ការងារ។ ក្នុងចំណោមមនុស្សដែលរកការងារថ្មីបាន ពួកគេជាច្រើននាក់ត្រូវបង្ខំចិត្តទទួលការងារដែលមានប្រាក់ខែតិច រីឯទំនិញវិញចេះតែឡើងថ្លៃ។ មិនថានៅប្រទេសជឿនលឿនឬប្រទេសក្រីក្រក្ដី ប្រទេសទាំងអស់បានទទួលផលប៉ះពាល់ពីវិបត្ដិសេដ្ឋកិច្ច។
ត្រូវការឱវាទដែលមានប្រយោជន៍
បើយើងទទួលប្រាក់ចំណូលតិចជាងមុន ឬបាត់បង់ការងារ យើងអាចងាយនឹងមានគំនិតអវិជ្ជមានខ្លាំង។ ជាការពិតណាស់ មនុស្សគ្រប់រូបមិនអាចជៀសផុតពីការខ្វល់ខ្វាយទាំងអស់បានទេ។ ក៏ប៉ុន្តែ បុរសដែលមានប្រាជ្ញាម្នាក់បាននិយាយថា៖ «បើឯងអន់ថយក្នុងថ្ងៃលំបាក នោះឈ្មោះថាឯងមានកំឡាំងតិចទេ»។ (សុភាសិត ២៤:១០) ដូច្នេះ ជាជាងខ្វល់ខ្វាយហួសហេតុពេកអំពីវិបត្ដិសេដ្ឋកិច្ច យើងចង់ធ្វើតាមការដាស់តឿនពីបណ្ដាំរបស់ព្រះដែលឲ្យយើង«បំរុងទុកសេចក្ដីដែលមានប្រយោជន៍»។—សុភាសិត ២:៧
ទោះជាគម្ពីរមិនមែនជាសៀវភៅដែលឲ្យយោបល់អំពីរឿងសេដ្ឋកិច្ចក្ដី តែគម្ពីរពិតជាមានឱវាទដែលបានជួយមនុស្សរាប់លាននាក់ទូទាំងពិភពលោកឲ្យចេះដោះស្រាយបញ្ហាបែបនេះមែន។ សូមឲ្យយើងពិចារណាអំពីគោលការណ៍គម្ពីរខ្លះៗដូចខាងក្រោម។
គិតគូរជាមុន។ សូមពិចារណាអំពីប្រសាសន៍របស់លោកយេស៊ូនៅសៀវភៅលូកា ១៤:២៨ ដែលចែងថា៖ «ក្នុងចំណោមអ្នករាល់គ្នា បើចង់សង់ប៉មមួយ តើមានអ្នកណាមិនអង្គុយគិតគូរជាមុនសិនឲ្យដឹងថា ខ្លួនមានប្រាក់គ្រប់គ្រាន់ដើម្បីសង់ឲ្យបានរួចរាល់ឬទេ?»។ ដើម្បីធ្វើតាមគោលការណ៍នេះ យើងត្រូវរៀបចំគម្រោងចំណាយជាមុនសិន រួចមកយើងត្រូវធ្វើតាមគម្រោងនោះឲ្យបានដិតដល់។ ប៉ុន្តែការធ្វើដូច្នេះជាការពិបាកមួយ ដូចពាក្យសម្ដីរបស់អូបិឌដែលថា៖ «មុនពេលដែលខ្ញុំបាត់បង់ការងារ យើងតែងតែទៅផ្សារទំនើបដើម្បីទិញរបស់របរជាច្រើនដែលមិនសូវចាំបាច់ យើងមិនដែលរៀបចំគម្រោងចំណាយទេ ដោយសារយើងមានលុយគ្រប់គ្រាន់ដើម្បីទិញអ្វីដែលយើងចង់ទិញ»។ បើយើងរៀបចំគម្រោងទុកជាមុន ទោះជាយើងមានលុយតិចជាងមុនក៏ដោយ ក៏យើងប្រាកដថា យើងនៅតែអាចទិញរបស់របរដែលក្រុមគ្រួសាររបស់យើងត្រូវការជាចាំបាច់បានដែរ។
កែប្រែរបៀបរស់នៅរបស់អ្នក។ ពិតមែនហើយ វាមិនមែនជាការងាយស្រួលទេដើម្បីកែប្រែរបៀបរស់នៅរបស់យើងឲ្យសាមញ្ញជាង។ ប៉ុន្តែ ការធ្វើដូច្នេះគឺជាអ្វីដែលសំខាន់ចាំបាច់។ បទគម្ពីរនៅសុភាសិតចែងថា៖ «មនុស្សដែលមានគំនិតឆ្លៀវឆ្លាត គេឃើញសេចក្ដីអាក្រក់មក ក៏ពួនខ្លួនទៅ»។ (សុភាសិត ២២:៣) ស្តេហ្វេនបាននិយាយថា៖ «ដើម្បីសន្សំលុយ ក្រុមគ្រួសាររបស់ខ្ញុំត្រូវរកផ្ទះខ្លួនឯងវិញ។ ផ្ទះនោះតូចជាង ហើយនៅខាងក្នុងផ្ទះនោះមិនទាន់ជួសជុលរួចនៅឡើយទេ។ កូនរបស់ខ្ញុំបានប្ដូរទៅរៀននៅសាលាដែលបង់ថ្លៃថោកជាងមុន ប៉ុន្តែនៅតែផ្ដល់ការអប់រំល្អ»។
ការពិភាក្សាជាមួយក្រុមគ្រួសារអំពីការផ្លាស់ប្ដូររបៀបរស់នៅជាការសំខាន់ណាស់ដើម្បីទទួលជោគជ័យ។ អូស្ទីនបានធ្វើការអស់រយៈពេល៩ឆ្នាំនៅអង្គការផ្នែកហិរញ្ញវត្ថុមួយ តែក្រោយមកគាត់បានបាត់បង់ការងារ។ គាត់បាននិយាយថា៖ «ខ្ញុំនិងប្រពន្ធបានអង្គុយពិភាក្សាគ្នា ហើយកត់សរសេរនូវអ្វីដែលយើងពិតជាត្រូវការចាំបាច់។ យើងក៏បានកាត់បន្ថយចំណាយទៅលើម្ហូបអាហារថ្លៃៗ ការកម្សាន្តដែលស៊ីលុយច្រើន និងការទិញសម្លៀកបំពាក់ដែលមិនចាំបាច់។ ខ្ញុំសប្បាយចិត្តណាស់ដែលក្រុមគ្រួសាររបស់ខ្ញុំបានសហការគ្នាលើការផ្លាស់ប្ដូររបៀបរស់នៅនេះ»។ ពិតមែនតែកូនតូចៗប្រហែលជាមិនយល់ទាំងស្រុងអំពីមូលហេតុដែលត្រូវកែប្រែដូច្នេះ តែក្នុងនាមជាឪពុកម្ដាយ អ្នកអាចពន្យល់ពួកគាត់ឲ្យយល់អំពីរឿងនេះបាន។
សុខចិត្តធ្វើការងារផ្សេង។ បើអ្នកធ្លាប់តែធ្វើការនៅការិយាល័យ អ្នកប្រហែលជារួញរាចំពោះការងារដែលប្រើកម្លាំង។ អូស្ទីនបាននិយាយថា៖ «ខ្ញុំធ្លាប់ធ្វើការជាអ្នកគ្រប់គ្រងនៅក្រុមហ៊ុនដ៏ធំមួយ ដូច្នេះពេលដែលត្រូវធ្វើការបម្រើគេ ខ្ញុំគិតថាវាពិបាកណាស់»។ ប៉ុន្តែ នេះមិនចម្លែកទេ ដោយសារក្នុងគម្ពីរនៅសៀវភៅសុភាសិត ២៩:២៥ បានចែងថា៖ «ការដែលខ្លាចចំពោះមនុស្ស នោះនាំឲ្យជាប់អន្ទាក់»។ ដូច្នេះ បើអ្នកចេះតែគិតអំពីទស្សនៈរបស់អ្នកឯទៀត នោះអ្នកនឹងគ្មានអង្ករច្រកឆ្នាំងទេ។ តើអ្វីអាចជួយអ្នកឲ្យយកឈ្នះនូវគំនិតអវិជ្ជមានបែបនោះ?
ចិត្តរាបទាបគឺជាកត្ដាដ៏សំខាន់មួយ។ ក្រោយពេលដែលអូបិឌបាត់បង់ការងារនៅសណ្ឋាគារហើយ មិត្តធ្លាប់រួមការងារដែលមានយានដ្ឋានជួសជុលរថយន្តបានអញ្ជើញគាត់ឲ្យធ្វើការជាមួយគ្នា។ ជួនកាលគាត់ត្រូវដើរយ៉ាងឆ្ងាយលើផ្លូវដីហុយទ្រលោមដើម្បីទិញថ្នាំបាញ់ឡាននិងគ្រឿងឧបករណ៍ជាច្រើនទៀត។ អូបិឌនិយាយថា៖ «ខ្ញុំមិនចូលចិត្តការងារនេះទេ តែខ្ញុំគ្មានជម្រើសណាដែលល្អជាងនេះឡើយ។ ការមានចិត្តរាបទាបបានជួយខ្ញុំឲ្យព្រមធ្វើការងារនេះ ទោះជាវាផ្ដល់ប្រាក់ខែមិនដល់មួយភាគបួននៃប្រាក់ខែដែលខ្ញុំមានពីមុនក៏ដោយ តែវាគ្រប់គ្រាន់ដើម្បីបំពេញនូវសេចក្ដីត្រូវការរបស់ក្រុមគ្រួសារខ្ញុំ»។ តើអ្នកអាចផ្លាស់ប្ដូរគំនិតឲ្យដូចគាត់ឬទេ?
ចេះស្កប់ចិត្ត។ តាមវចនានុក្រមមួយ មនុស្សដែលចេះស្កប់ចិត្តជាបុគ្គលដែល«មានចិត្តសប្បាយ ហើយចេះពេញចិត្តនឹងស្ថានភាពរបស់ខ្លួន»។ ប៉ុន្តែ ចំពោះអ្នកដែលជួបនឹងវិបត្ដិសេដ្ឋកិច្ចធ្ងន់ធ្ងរ ការពន្យល់នេះមើលទៅហាក់ដូចជាមិនសូវសមហេតុផលទេ។ ក៏ប៉ុន្តែ សូមពិចារណាអំពីពាក្យរបស់សាវ័កប៉ូលដែលជាសាសនទូតម្នាក់ដែលធ្លាប់ពិសោធអំពីការខ្វះខាត គាត់បាននិយាយថា៖ «ខ្ញុំបានរៀនឲ្យចេះស្កប់ចិត្ត ទោះជាខ្ញុំនៅក្នុងកាលៈទេសៈណាក៏ដោយ។ ខ្ញុំចេះរស់នៅដោយមានតែបន្ដិចបន្តួច ខ្ញុំចេះរស់នៅដោយមានបរិបូរ»។—ភីលីព ៤:១១, ១២
ពិតមែនតែស្ថានភាពរបស់យើងនៅឥឡូវនេះមិនល្អដូចពីមុនមែន តែសូមចាំថាវាក៏អាចពិបាកជាងឥឡូវនេះបានដែរ ដោយសារសម័យនេះចេះតែផ្លាស់ប្ដូរ។ ហេតុនេះ យើងពិតជាអាចទទួលប្រយោជន៍បាន បើយើងធ្វើតាមយោបល់ដែលប៉ូលបានសរសេរក្រោមការដឹកនាំរបស់ព្រះថា៖ «តាមការពិត ភក្ដីភាពចំពោះព្រះ ជាមួយនឹងការស្កប់ចិត្ត នាំឲ្យបានផលប្រយោជន៍ច្រើនក្រៃលែងមែន។ ដូច្នេះ យើងនឹងស្កប់ចិត្តហើយ ដោយមានអាហារបរិភោគ សម្លៀកបំពាក់ និងជម្រក»។ ប៉ូលមិនបានលើកទឹកចិត្តយើងឲ្យខ្ជិលធ្វើការទេ ប៉ុន្តែគាត់ចង់បញ្ជាក់ថា សេចក្ដីត្រូវការខាងសម្ភារៈនោះមិនមែនជាអ្វីដែលសំខាន់បំផុតក្នុងជីវិតឡើយ។—ធីម៉ូថេទី១ ៦:៦, ៨
ប្រភពនៃសុភមង្គលពិត
សុភមង្គលពិតមិនបានមកពីការខំប្រឹងប្រមូលអ្វីៗទាំងអស់ដែលយើងចង់បាន ឬការមានជីវិតសុខស្រួលនោះទេ។ លោកយេស៊ូបានមានប្រសាសន៍ថា៖ «ការឲ្យគេ នោះនឹងផ្ដល់សុភមង្គលច្រើនជាងការទទួល»។ ពេលយើងប្រើអ្វីៗដែលយើងមានដើម្បីជួយអ្នកឯទៀត និងលើកទឹកចិត្តពួកគេ នោះនាំឲ្យយើងមានសុភមង្គលនិងការស្កប់ចិត្ត។—សកម្មភាព ២០:៣៥
ព្រះយេហូវ៉ាជាអ្នកបង្កើតយើង គឺលោកដឹងច្បាស់នូវអ្វីៗទាំងអស់ដែលយើងត្រូវការ។ តាមរយៈគម្ពីរដែលជាបណ្ដាំរបស់ព្រះ លោកបានផ្ដល់ឱវាទដ៏មានប្រយោជន៍ដែលបានជួយមនុស្សជាច្រើនឲ្យមានជីវិតដ៏ប្រសើរ ហើយក៏ជួយពួកគេមិនឲ្យខ្វល់ខ្វាយហួសហេតុពេកដែរ។ ការធ្វើតាមយោបល់ទាំងនេះនឹងមិនលើកស្ទួយជីវភាពរបស់យើងក្នុងមួយប៉ប្រិចភ្នែក ឬធ្វើឲ្យជីវភាពរបស់យើងឡើងខ្ពស់ត្រដែតឡើយ។ ប៉ុន្តែ លោកយេស៊ូបានធានាចំពោះអ្នកដែលបន្ត«ស្វែងរករាជាណាចក្រនិងសេចក្ដីសុចរិតរបស់ព្រះជាមុន»ថាពួកគេនឹងទទួលនូវអ្វីដែលពួកគេត្រូវការជាចាំបាច់ក្នុងជីវិតប្រចាំថ្ងៃ។—ម៉ាថាយ ៦:៣៣
