Chakuhanda Namali Antesha Kubadika Imwadiña Nawu

OBED wukweti anyana ayedi. Wazatileña kuhotelu yeneni hadi yaaka ikumi mumusumba weneni muAfrica nawa hadiña nakukala kwakuloñeshela chisaka chindi yuma yakeñekañaku. Mumpinji mumpinji, wayileña nachisaka chindi kumaluña akunookela mwituña dawu. Alekeli kudiluñisha yumiyi hampanji yamanini mudimu muloña antu amavulu alekeli kukama kuhotelu.

Stephen wazatili kunyambawulu hayaaka yakubadika 22, nkumininaku wekalili mukulumpi kunyambawulu yeneni. Kampani yamwinkeli yuma yayivulu yidi neyi itala deneni, motoka, añamba nawa anyanindi atañilileña hamashikola aya mpuhu. Chelili akwanyambawulu atachiki kuhimpa akwanyidimu, yena mudimu wamanini. Stephen wahosheli nindi, “Ami nichisaka chami twaneñeli chikupu. Chumichi chankatili kumuchima nankashi, nadiña nakwakama nawa natiyileña woma.”

Nsañu yamuchidiwu yamwekanaña kwejima. Antu amavulu ahandileña chiwahi nyidimu yinakumana muloña wakukala kwamali kunakutwalekahu mukaayi kejima. Antu amavulu eñila nyidimu eteja kuyifweta mali antesha iku anakulwisha nawuseya wunakukandaminaku. Hela chakwila ituña dikweti mali hela nehi, hanu heseki hosi ituña dabulaña kumona kukala kwamaluku.

Mwatela Kwikala naMaana Alala

Neyi tunakutambula mali antesha hamudimu hela neyi mudimu wunamani, tunateli katachika kutoñojoka yuma yabula kutelela. Hela chochu, muntu hanateli kushakama chakadi kwakamenaku. Ilaña muntu wamaana wahosheli nindi: “Neyi wakazeya hefuku dakala ñovu jeyi jakeha.” (Yishimu 24:10) Chatela tutachiki kwakamena neyi mali anakali, twatela kwila neyi chatukoleshaña Izu daNzambi nawu: ‘Swekenu maana alala.’—Yishimu 2:7.

Bayi neyi Bayibolu himukanda wahoshaña hansañu jamaluku, ilaña kufumba kwekalamu hansañu yamali kwakwashaña antu amavulu mukaayi kejima. Tushinshikenu yishina yikwawu yekala muBayibolu.

Chindenu mali. Shinshikenu mazu aYesu ekala hamukanda waLuka 14:28 akwila nawu: “Mwinenwinyi wukwila neyi wukukeña kutuña itala deneni, wukubula kusambila kushakama nakuchinda mali achidikochu, atali neyi wukweti mali akudimanisha nachu?” Ichi chishina chatalisha mukwila nawu tufuukuluhu chakuzatisha mali nikubula kuzatisha mali hayuma yitunabuli kufuukulahu. Ilaña Obed wetejeli nindi chumichi chakala. Wahosheli nindi “henohu nichidi kuzata, mpinji yejima twalandileña yuma yayivulu yitwabulileña nikukeña. Hitwafuukwileña chakuzatisha maluku muloña twadiña namali amavulu akulanda yuma yejima yitwakeñeleña.” Kufuukulahu chadimu kukuyikwasha kuzatisha mali antesha imukweti hakulanda yuma yalema yinakukeñeka muchisaka.

Himpenu chihandilu chenu. Chakadi nikujina kwikala nachihandilu chapela hichuma chakala nankashi ilaña chalema. Chishimu  chamuBayibolu chahosha nawu: “Muntu wadihoñeshaña mumuchima wamonaña katama, hakubatama.” (Yishimu 22:3) Stephen wahosheli nindi: “Hakwila nawu tuhembi mali twatuntulukilili mwitala detu danyanya nawa dakubula nikumanisha mukachi. Anyana niwena twayitwalili hashikola hafweteleñawu mali antesha ilaña hatañishileñawu chiwahi.”

Hakwila mutweshi kuhimpa chihandilu chachiha, chalema kuhanjeka nachisaka. Austin wazatileña kunyambawulu hadi yaaka yitanu nayiwana, chelili mudimu wumani wahosheli nindi: “Ami niñodami twashakamini hamaseki nakufuukulahu yuma yayeni yitwakeñeleña. Twalekeli kulanda yakudya yawuseya, kuya nakunookela kumaluña asweja wuseya nikulanda yakuvwala yayiha yabulileña kukeñeka. Nazañalalaña muloña chisaka chami chetejeli kuhimpa muniyi njila.” Kafwampi, anyana anyanya hiyanateli kutiyishisha chalemena kuhimpa muniyi njilaku, hakwikala anvwali munateli kuyikwasha kulonda eluki.

Itejenu kuzata nyidimu yidi yejima yayiha. Neyi mwenjilila dehi kuzatila mukasanji, munateli kuchiina kuzata mudimu wakola. Austin wahosheli nindi, “Chineli nenjilili kuzatila hayifulu yamaneni hakampani yeneni, chankalilili kwiteja kuzata nyidimu yamakasa.” Chumichi chinateli kutuhayamisha wanyi kwesekeja nachahosha Bayibolu haYishimu 29:25 nawu: “Kutiya antu woma chaletaña muhetu.” Neyi mutwalekahu kutoñojoka chikuyimonañawu antu amakwawu chikuyikalila kuwana mali akukwasha nachu chikasa chenu. Chumanyi chikuyikwasha kubula kutoñojoka muniyi njila?

Kudizoza kunateli kuyikwasha. Chamanini mudimu wazatileñayi kuhotelu, Obed amwiñijili mudimu wakuloñesha nyotoka kudi mukwawu muyazatilileñawu hakusambila. Iwu mudimu wakeñekeleña kwenda yintampu yayilehi hamaseki munyikwakwa yalunkuñu nakulanda wulombu wanyotoka niyozelu yikwawu. Obed nindi: “Hinakeñeli iwu mudimuku, ilaña yuma yankalilili chikupu. Kudizoza kwankwashili kuzata mudimu wanfweteleñawu mali antesha chikupu kubadika inatambwileña hakusambila, ilaña adiña ashikila kudikwashamu nachisaka chami.” Komana munateli kuzatisha njila yoyimu?

Zañalalenu nayuma yimukweti. Muntu wudi nakukala kwamali hanateli kuzañalala nayuma yakwetiyuku. Hela chochu, shinshikenu mazu akapostolu Pawulu, kamishonali welukili mwatalisha kubula yuma: “Nadizi dehi kutiya kuwaha munekalila mwejima. Neluki kusawuka hela kwikala nayuma yayivulu.”—Afwilipi 4:11, 12.

Hadaha chihandilu chetu chidiku chiwahi, ilaña muyinu mpinji yinakuhimpika yuma chinateli kutaminaku. Tunateli kuhetelamu chikupu neyi tuzatisha kufumba kwaPawulu kwonenawu kwakwila nawu: “Kwakama Nzambi, nikutiya kuwaha, hikuheta kwakweni. Dichi neyi tukweti yakudya niyakudivwika, yumiyi yinawani.” Pawulu washimwini chitwatela kumona yuma yakumujimba munjila yayiwahi nawa watukolesheli kuzata nañovu.—1 Timotewu 6:6, 8.

Chuma Chaletaña Muzañalu Waweni

Muzañalu waweni hiwafumaña hakuheta yuma yejima yitwakeñaña hela kushakama chachiwahuku. Yesu yomweni wahosheli nindi: ‘Mukuhana mwekala muzañalu weneni kubadika wekala mukutambwila.’ Eñañi, twazañalalaña neyi tuzatisha yuma yitukweti hakukwasha amakwawu nikuyikolesha.—Yililu 20:35.

Nleñi yetu Yehova Nzambi weluka chikupu yuma yejima yitwakaankilaña. Kuhitila Mwiizu dindi Bayibolu, watwinka kufumba kwakuwahi kunakwashi antu amavulu kuwahisha chihandilu chawu nikubula kwakamena. Kafwampi, chihandilu chamuntu wudi nakukala kwamali hichinateli kuhimpa hohenohuku. Ilaña Yesu wayilejeli antu atwalekañahu “kukeña wanta [waNzambi] nikuloña kwindi” nindi akayinka yuma yejima yakeñañawu mufuku ejima.—Matewu 6:33.