Kalata Ukufuma ku Ireland

Ukutandala Uko Naipakishe Sana!

ABAFYASHI bandi banjebele ati, “Ulingile ukucitako fimbi ifingakusansamusha pa kuti wisakamikwa sana na mashindano. Tuli no kuya ku Ireland ku kutandalila umufyala obe na bena mwakwe kabili tukayashimikila na ku bantu abekala ku ncende ukushaba sana aba kushimikila imbila nsuma iya Bufumu.”

Nshalefwaya ukuya ku Ireland. Twali mupepi no kulemba amashindano ne ci calinsakamike e lyo no lwendo lwine lwalentiinya pantu nshatalile mfumapo mu England nelyo ukuninapo indeke. Naletontonkanya ukuti, bushe ne mukashana uuli ne myaka 17 ne wabelesha ukwikala mu musumba wa London, umwaba abantu abengi kabili abapamfiwa sana nkayaipakisha ukutandala kwi tauni ilinono ilya mu Ireland, ukushaba na bantu abengi?

Lelo nshalingile ukusakamana pantu ilyo fye twafikile ku Ireland, nalikutemenwe nga nshi. Lelo apo twaimine ulucelo sana ukufuma pa cibansa ca ndeke, ilyo fye twaninine motoka, naliponene mu tulo. Ilyo twaleya, naleti nalaala, kabili cilya papita fye inshita iinono nashibuka ku kutamba incende shimo ishisuma, ishalemoneka bwino sana bushilya bwa musebo.

Ubushiku bwa kubalilapo, twafikile mwi tauni lya Skibbereen mu nshita ya cungulo kabili twaliipakishe nga nshi ukubishanya no lupwa lumo ulwa bamunyinefwe ulwakuukile ku Ireland mu kushimikila imbila nsuma iya Bufumu. Twalyangele ne fyangalo fya kulondolola abantu abalembwa mu Baibolo.

Ubushiku bwakonkelepo, ine, abafyashi bandi, umwaice wandi umwaume, abafyala bandi, no lupwa lumbi twaninine ubwato no kuya ku cishi icinono ico beta ati Heir Island, apaba abantu abashafika na 30. Yesu atile imbila nsuma ifwile ukubilwa ku bantu bonse aba pe sonde. E ico twawishishe akasuba konse tulelanshanya fye na bantu ba pali ici cishi ifya mu Baibolo. Ala aba bantu baliba bwino kabili ba cileela. Ilyo twali pali ici cishi twaletamba ne fyo iyi ncende imoneka bwino.

Akasuba kalibalike kabili takwali na makumbi. Umwela nga wapuupa, ku fimuti fya kokonati kwalefuma akacena akasuma. E lyo kwali na maluba ayasuma aya-andatile bwino pa mushili kwati ni kapeti. Pali ici cishi pali ne ncende ya mucanga iyafikile ku mpili ukwali ifinsa fya fyuni no twana. Akatalamukila kwalemoneka utufishi utwingi apashaba abantu. Ala twalitashishe Yehova pa fyo abumba bwino ifintu!

Ilyo twali ku Skibbereen, nalitemenwe sana pa kupanga ifibusa ifisuma ifingi mu cilonganino ca Nte sha kwa Yehova, kabili nalicitileko ne fintu ifyo nshabalile ncitapo. Cimo ico natemenwe sana, koobako akabwato akanono. Nga naunina muli aka kabwato e lyo wingamona bwino ifyo ululamba lwa calo ca Ireland lumoneka bwino! Twaile mu kuloba isabi ilya kuti tulye icungulo,  nomba icacitike ca kuti inama sha mu menshi isho beta ukuti silu e shalecibula isabi twalefwaya ukuloba. Twatendeke ukwangala kulya kwine ku lulamba, kabili nalyeseshepo no kucinda nge fyo abena Ireland bacinda.

Twalishibilepo na fimbi pa fyacitike mwi tauni lya Skibbereen. Mu ma 1840 ilyo ifyumbu ifyo balya sana mu calo ca Ireland fyakeene, pa ncende umwali sana icipowe, pali ne tauni lya Skibbereen e lyo ne ncende shimbi isha mupepi. Abantu abengi nga nshi balifwile ku nsala, kabili abantu nalimo 9,000 babashikile pamo mu cilindi icikalamba. Lelo icatusansamwishe lisubilo twakwata ilya kutila, nomba line Ubufumu bwa kwa Lesa buli no kutendeka ukuteka kabili takwakabe ifipowe, na bantu abengi nga nshi abafwile kuli ici cipowe bakabuuka no kwisaikala mu paradaise pano isonde.

Twaile na ba Nte ba kuli iyi ncende mu kushimikila mu cifulo umo bashishimikila sana pa mulandu wa kuti incende bashimikilamo ikulu. Pa kuya ku mayanda ayabelele mu mbali ya lupili ulwalosha kuli Bemba ya Irish, twatentemwike ulupili na motoka ukubomfya umusebo uunono. Abantu twailesanga kuli iyi ncende nabo basuma kabili ba cileela. Nga filya fine twalecita ilyo twaile ku Heir Island, no ku kwine twale-eba abantu ukuti twaile fye mu kutandala, lelo twalefwaya no kubomfya iyi nshita ya kutuusha ukwebako abantu amashiwi ayasuma ayaba mu Baibolo.

Bamayo bashimikile ku banakashi bamo ifi abasumine ukupokako magazini ya Ulupungu lwa kwa Kalinda na Loleni! Ilyo papitile inshiku ishinono, twalishilekumana nabo kabili batwebele ukuti balitemenwe nga nshi ifyo babelengele muli magazini.

Batwebele ukuti: “Mukabwele tukeselanshanya na kabili, mukatuleteleko magazini na imbi.” Twabebele ukuti twali pa kubwelelamo, lelo tukabatumina bambi aba kubatandalila.

Nabo batile: “Ilyo mukabwela mukesempempulako, fwe bena Ireland tatulaba umuntu twamona!”

Pa bushiku bwa kulekeleshako ubwa kutuusha, twaile ku kwangala ku lulamba lwa bemba na ba bwananyina ba mu cilonganino. Twalikoseshe umulilo no koca isabi ilyo twatoolele pa mabwe ku nse ya bemba ilyasendelwe ku mabimbi. Nangu ca kuti nakuliile mu tauni, nali-ipakishe sana ukutandala kuli iyi ncende!

Ala mwandini uku e kutandala naipakishe sana! Nangu ca kutila nali-ipakishe ukwangala, ico natemenwe sana ca kutila ifyo nacitile fyalilengele umutima wa kwa Yehova ukusekelela ne shina lyakwe ukucindikwa. Nalitemwa ukubombela Lesa, kabili cilacilapo ukuwama nga ca kutila naukwata ifibusa na balupwa abatemwa ukubombela Yehova. Ilyo nafikile ku ng’anda, nalitashishe Yehova pa kumpeela ifibusa ifingi ifisuma kabili ifyatemwa Yehova. Nalitashishe na pa fisuma ifyo naipakishe ifyo nshakalabe.

[Abatusuminishe Ukubomfya Icikope pe bula 25]

An Post, Ireland