Leta Ireland

Nduọkodudu Oro N̄kamade N̄kan!

ETE ye eka mi ẹkedọhọ mi ẹte: “Ana oyom akpan n̄kpọ kiet anam man etre nditịmede esịt mban̄a udomo ufọkn̄wed mbufo. Yak ika ikese eyen eyeneka mi ke Ireland inyụn̄ iketiene mmọ ikwọrọ ikọ inọ mbon emi mîsiwakke ndikop eti mbụk Obio Ubọn̄.”

N̄kenen̄ekede mma ekikere oro. Idem ama enyek mi aban̄a utọ isan̄ oro sia akanam n̄wọrọke n̄kpọn̄ England nnyụn̄ ndụkke ubomofụm, ndien n̄kenyene ndikot n̄wed man mben̄e idem nnọ udomo. N̄kaiferi isua 17 emi mîmaha ebiet emi etiede ndobo ndobo akpanam didie ọkpọn̄ London emi edide akwa obio emi etiede uwem uwem aka ekpri ndobo ndobo obio ke edem usoputịn edem usụk Ireland?

Idịghe utọ n̄kpọ emi ekpenyek mi idem. Mma mma obio emi ndondo oro ubomofụm nnyịn ebehede. Edi, sia ikabakde-bak itọn̄ọ isan̄ ke ubomisọn̄ usenubọk oro, idap ama ọbọhọ mi. Anam anam ami ndemede nse ediye obio emi ẹsịnde ọkọ ke n̄kpri usụn̄ mmọ.

Eyo akpa usen okokụt nnyịn ke Skibbereen, ndien ikodu ye ubon emi ẹkedide Ireland man ẹdin̄wam ke utom edikwọrọ Obio Ubọn̄ do. Ima ibre mbre Bible. Owo kiet kiet eyesịn ubọk ke ekpat osio ekpri babru emi ẹwetde enyịn̄ owo ke Bible onyụn̄ anam n̄kpọ emi owo Bible oro akanamde. Ndien mbon en̄wen ẹyeda oro ẹtịn̄ m̀mê anie owo edi oro.

Ekem ke ndan̄nsiere, ete ye eka mi, ami ye ekpri eyeneka mi, nditọ eyeneka ete mi, ọkọrọ ye ubon en̄wen ima idụk ekpri ubom ika Isuo Heir, emi mme owo mîyọhọke 30. Jesus ọkọdọhọ ke ẹnyene ndikwọrọ eti mbụk nnọ kpukpru mme idụt. Ntem ima ida ofụri uwemeyo oro ikwọrọ ikọ inọ mbon Ireland emi ẹtiede ufan ufan ẹnyụn̄ ẹfọnde ido. Ima inyụn̄ ida ifet oro ise ediye obio mmọ.

Utịn ama asiaha. Ima ikop ndinem ufuọn̄ nsio nsio ndiye frawa. Frawa emi esisiahade ke ndaeyo ẹma ẹfụk ndusụk itie ke isuo emi. Utan obio emi odoro ekesịm mben ikpọ itiat emi mme enenịm inyan̄ ye inuen inyan̄ eken ẹsịnde nsen mmọ. Ima ida ikụt ediwak n̄kpri isuo emi mme owo mîdụn̄ke ke ndusụk, kpukpru ẹdu ke akani isuo emi ẹkotde Roaringwater Bay. Ima inen̄ede ikụt nte mme n̄kpọ oro Jehovah obotde ẹyede.

Mma nnam ufan ye ediwak owo ke esop Mme Ntiense Jehovah ke Skibbereen, nnyụn̄ ndomo ndinam mme n̄kpọ emi akanam mmennamke. Obufa n̄kpọ emi n̄kamade ekedi ndiwat ubom emi ẹdade ikpaunam ẹnam. Akanam idụhe n̄kpọ emi enemde mi nte ndisịne  ke esịt ubom ikpaunam nse mbenesụk Ireland. Ima ika ndikọ iyak oro iditade mbubreyo, edi mme unam mmọn̄ ẹma ẹbem nnyịn iso ẹkemụm iyak ẹta. Ima itọn̄ọ mbre ke esụk oro inyụn̄ ikpep ndinek unek mbon Ireland.

Ima inyụn̄ ikpep ndusụk n̄kpọ iban̄a Skibbereen. Ke ini bia mbakara Ireland mîkodụkke idem iwak ke iduọk isua 1840, akan̄ emi ekenen̄ede omụm mbon Skibbereen ye mbọhọ oro. Ediwak tọsịn owo ẹma ẹkpan̄a ke ntak ọ-biọn̄, ndien ẹkebụk n̄kpọ nte owo 9,000 ke udi kiet. Ima ibọ ndọn̄esịt nditi nte ke Obio Ubọn̄ Abasi ama akara isọn̄ ke mîbịghike, ke akan̄ ididụhe aba, ndien ke ẹyenam ediwak mbon emi ẹkpan̄ade idahaemi ẹset ẹdidu uwem ke Paradise isọn̄.

Ima itiene Mme Ntiense do ika ikese mbon emi owo mîsiwakke ndisịm ke akaka efakutom esop oro. Ima iwat ke ekpri usụn̄ isụhọde ika mme ufọk emi ẹdude ke mben ikpọ itiat oro ẹdude ẹkpere Inyan̄ Ireland. Mbon emi ikosobode do ẹma ẹfọn ido ẹnyụn̄ ẹtie ufan ufan. Kpa nte ikanamde ke Isuo Heir, ikesitọn̄ọ nneme ke ndidọhọ ke ikada ini nduọkodudu nnyịn idi ndineme etop inemesịt emi odude ke Bible ye mmọ.

Eka mi ama ọkwọrọ ikọ ọnọ mma kiet onyụn̄ ọnọ enye Enyọn̄-Ukpeme ye Awake! Ke ini ikafiakde isobo ye enye ke usen ifan̄ ẹbede, enye ama ọdọhọ ke imama mme magazine oro.

Enye ama ekpe nnyịn ubọk ete: “Mbọk ẹda magazine en̄wen ẹfiak ẹdineme nneme ye ami.” Ima idọhọ enye ke imọn̄ inyọn̄, edi ke iyọdọhọ owo edise enye.

Enye ama ọbọrọ ete: “Ọfọn, ama afiak edi, mbọk di dise mi. Nnyịn mbon Ireland isifreke iso owo!”

Ikodu ke esụk ke akpatre usen nduọkodudu oro ye nditọete emi ẹdude ke esop oro. Ima ida ifia ye itiat do ibara ikan̄ ifọp n̄kọp emi ikatan̄de do ita. Mma nnen̄ede mma nduọkodudu emi!

Nso ndien ke n̄kpetịn̄ mban̄a urua kiet oro n̄kodude ke Ireland? Enye ekedi nduọkodudu oro n̄kamade n̄kan! Esịt ama enem mi tutu, edi se ikakam inemde mi ikan akakam edi ndidiọn̄ọ ke n̄kanam se inemde Jehovah esịt, ke mmonyụn̄ nnam ẹtoro enye. Mmama ndinam n̄kpọ Abasi nnyịn, ndien afo ama enyene nti ufan ye mbonubon emi ẹnyụn̄ ẹmade ndinam n̄kpọ Abasi nnyụn̄ ndiana kiet ye afo, emi esinam etetịm okop inemesịt. Ke ini n̄kesịmde ufọk, mma n̄kọm Jehovah ke ndinọ mi nti ufan emi ẹmade mi ẹnyụn̄ ẹmade n̄kpọ Abasi. Mma nnyụn̄ n̄kọm enye ke ndinam mi nnyene ifiọkutom emi nditide ke nsinsi.

[Ebiet Ẹdade Ndise Ẹto ke page 25]

Stamp Ireland ▸