Pas i Kam Long Aialan

Nambawan Gutpela Holide Bilong Mi!

PAPAMAMA bilong mi i tokim mi olsem: “Yu mas mekim sampela gutpela samting bambai yu no ken wari tumas long eksem bilong yu. Yumi go visitim ol kasen bilong yu long Aialan na autim tok long ol manmeri em longpela taim ol i no bin harim gutnius bilong Kingdom.”

Mi no laikim dispela tingting. Mi pret olsem mi bai i no gat taim bilong stadi long eksem na long wankain taim mi pret long dispela raun, long wanem, mi no bin lusim Inglan o flai long balus bipo. Olsem wanem dispela siti gel i gat 17 krismas na i save stap tasol long biktaun London inap lain long laip bilong ol man long liklik taun long hap saut-wes bilong Aialan?

Tasol i no gat as long mi wari long wanpela samting. Taim balus bilong mipela i go pundaun, mi kirap nogut tru long ol samting mi lukim. Mipela i kirapim raun bilong mipela long bikmoning tru, olsem na mi slip taim kar i ron. Taim mipela i draiv i go, mi save kirap sampela taim na lukim olsem i gat ol naispela ples long sait sait bilong dispela liklik rot ol i wokim long ston.

Long fes nait, mipela i kamap long taun Skibbereen, na mipela i amamas tru long stap wantaim wanpela famili em ol i bin muv i kam long Aialan bilong helpim wok bilong autim tok bilong Kingdom. Mipela i pilaim sampela Baibel gem. Mipela i putim nem bilong ol bilipman bilong Baibel long wanpela beg na mipela olgeta wan wan i pikim wanpela nem na ektim wanpela ekspiriens bilong dispela bilipman. Ol narapela i mas ges long nem bilong em.

Long neks de, mi, papamama, liklik brata, ol kasen, na narapela famili, mipela i kalap long bot na i go long Heir Island, em liklik ailan i gat 30 manmeri tasol i stap long en. Jisas i bin tokim ol disaipel bilong em long autim gutnius long olgeta hap bilong graun. Olsem na long dispela de mipela i autim ol gutpela tok bilong Baibel long ol dispela manmeri husat i gat pasin pren, na mipela i amamas long lukim dispela naispela ples.

San i lait gut long blupela skai i klia tru. Win i gat naispela smel bilong yelopela plaua em smel bilong en i olsem bilong kokonas. Ol plaua i kamap na i karamapim gut graun. I gat ol pasis, na arere long nambis i gat ol traipela ston we ol pisin bilong solwara i save lukautim ol bebi pisin. Mipela i lukluk i go long Roaringwater Bay na mipela inap lukim ol liklik ailan, em planti bilong ol i no gat man i sindaun long en. Mipela i amamas tru long olgeta dispela samting em Jehova i bin wokim!

Long taun Skibbereen, mi bungim planti gutpela pren long kongrigesen bilong ol Witnes Bilong Jehova na mi mekim ol samting mi no bin mekim bipo. Wanpela nupela samting mi mekim na mi laikim tru em long pul long kaiyak. Taim mi pul long kaiyak, mi inap lukim gut naispela  nambis bilong Aialan! Mipela i go bilong painim pis bilong kaikai long apinun, tasol ol sil bilong solwara i bihainim mipela na ol i kaikaim ol pis long hap mipela i laik huk long en. Mipela i pilai long nambis, na mi traim tu long mekim danis bilong Aialan.

Mipela i lusim sampela haptaim long kisim save tu long taun Skibbereen. Bihain long yia 1840, ol poteto i no kamap gut long Aialan, olsem na dispela i putim bikpela hevi long ol manmeri i stap long taun na long ol ples i stap klostu. Planti tausen manmeri i dai long hangre na ol i bin wokim traipela hul na planim 9,000 manmeri long en. Mipela i amamas olsem klostu nau taim Kingdom Bilong God i bosim graun, bai i no gat moa hangre, na planti milion manmeri husat i dai ol bai kirap bek na kisim laip long Paradais long graun.

Mipela i bung wantaim ol Witnes bilong dispela hap na mipela i go lukim ol manmeri em ol i stap longwe na ol Witnes i save go wan wan taim tasol long lukim ol. Mipela i draiv long liklik rot i go antap long maunten na kamap long ol haus i stap long het bilong maunten na i lukluk i go daun long solwara Aialan. Long dispela hap tu mipela i bungim ol manmeri em ol i gat gutpela pasin pren. Olsem mipela i bin mekim long Heir Island, mipela i tokim ol man olsem mipela i raun long holide, na tu, mipela i tokim ol long sampela gutpela tok bilong Baibel.

Mama bilong mi i toktok wantaim wanpela meri husat i amamas tru long kisim ol magasin bilong yumi, em Wastaua na Kirap! Taim mipela i bungim em gen sampela de bihain, em i tok em i bin amamas tru long ritim ol dispela magasin.

Em i tok: “Plis, bringim sampela magasin na kam bek lukim mi.” Mipela i tokim em olsem mipela bai go bek, tasol mipela bai tokim sampela narapela long kam na lukim em.

Em i tok: “Em orait, tasol taim yupela i kam bek, plis kam na lukim mi. Mipela ol manmeri bilong Aialan i no save lusim tingting hariap long ol narapela!”

Long laspela de bilong holide, mipela i go long nambis wantaim ol brata na sista bilong kongrigesen. Mipela i kisim ol ston na ol paiawut i slip arere long nambis na laitim paia na kukim ol sel mipela i kisim namel long ol ston bilong nambis. Mi laikim tru olgeta samting long dispela holide!

So nau bai mi tok wanem long wanpela wik holide bilong mi long Aialan? Em i nambawan gutpela holide tru! Mi laikim tru dispela holide, na mi amamas moa yet, long wanem, mi bin mekim samting Jehova i amamas long en na i litimapim nem bilong em. Mi amamas tru long mekim wok bilong God. Taim yu gat ol gutpela pren na famili em ol i gat wankain tingting olsem yu na ol i wok wantaim yu, dispela bai givim yu bikpela amamas moa yet. Taim mi go bek, mi tenkyu long Jehova i givim mi planti gutpela pren em ol i laikim tru Jehova, na ol gutpela samting mipela i bin mekim wantaim em mi bai tingim inap oltaim bihain.

[Piksa Kredit Lain long pes 25]

An Post, Ireland