Yu Save Long Dispela?

I gat wanem as na ol Juda i laik tru long save long lain tumbuna bilong ol?

▪ Nem bilong ol lain tumbuna i bikpela samting bilong helpim ol long save long famili na lain bilong ol. Na tu, dispela bai helpim ol long skelim na tilim graun na ol samting ol i kisim long ol tumbuna. Wanpela as na em i bikpela samting em lain tumbuna we Mesaia bai kamap long en. Ol Juda i save gut tru olsem dispela Man bai kamap long lain bilong Devit bilong lain Juda.—Jon 7:42.

Na tu, saveman Joachim Jeremias i tok, “wok bilong lain pris na lain Livai i stap tasol long wanpela lain tumbuna, olsem na . . . em i bikpela samting tru olsem dispela lain i mas i stap klin tru long ai bilong God na i no gat doti long en.” Ol meri Israel em ol i maritim ol man long lain pris, ol i mas kamapim klia ol i kam long wanem lain tumbuna, bambai lain pris “i stap klin tru na i no gat ol man bilong narapela lain long en.” Long taim bilong Nehemia, wanpela famili olgeta bilong lain Livai i no kamap pris, long wanem, ol i bin “painim nem bilong ol tumbuna long buk i gat nem bilong olgeta lain pris. Tasol ol i no inap lukim nem bilong ol i stap.”—Nehemia 7:61-65.

Na tu, Lo Bilong Moses i tok, ol pikinini em meri i karim nating na ‘ol Amon na ol Moap i no inap i kam insait long lain manmeri bilong Bikpela.’ (Lo 23:2, 3) Jeremias i tok, long dispela as “man i mas save gut long wanem lain tumbuna em i kam long en bambai em i ken i gat rait long mekim sampela samting, na dispela tingting i stret wantaim tingting bilong yumi olsem . . . wanpela man nating bilong Israel i save gut long lain tumbuna bilong em na em i bilong wanem lain insait long 12-pela lain Israel.”

Olsem wanem ol Juda i raitim na lukautim lista bilong lain tumbuna bilong ol?

▪ Matyu na Luk, em ol man bilong raitim Gutnius, ol i raitim gut lista bilong ol tumbuna bilong Jisas. (Matyu 1:1-16; Luk 3:23-38) I gat ol narapela rekod tu ol man i bin raitim na lukautim gut. Olsem, wanpela nius bilong Juda i stori long Hilel, em wanpela tisa long taim bilong Jisas, na i tok: “Ol i painim skrol long Jerusalem we i gat lista bilong ol tumbuna na i gat rait i tok Hilel i kamap long lain bilong Devit.” Long buk The Life bilong Flavius Josifas em wanpela saveman Juda long taim bilong ol aposel, em i tok lain tumbuna bilong Hilel ol i pris na long sait bilong mama bilong em, em i “bilong lain king.” Em i tok em i painim dispela tok long “rait i stap long ol pablik rejista.”

Long sait bilong rekod i gat nem bilong ol famili bilong lain pris, Josifas i tok long buk Against Apion olsem long kantri bilong em ol i save givim dispela wok long “ol man i gat bikpela namba.” Buk The Jewish Encyclopedia i tok: “Wanpela ofisa i holim ol dispela rekod, na long Jerusalem i gat wanpela lain bilong harim kot na bekim askim ol man i gat long nem bilong ol lain tumbuna.” Ol Juda em ol i no bilong lain pris, ol i save rejistaim nem bilong ol wantaim lain tumbuna long sait bilong papa. (Luk 2:1-5) Ol man bilong raitim Gutnius i bin sekim ol dispela rekod na kisim ol tok long en. Olgeta wan wan famili tu i bin holim ol rekod i gat nem bilong ol lain tumbuna bilong ol.