Kpep Nditọ Fo

Enye Ama Ọsọn̄ Ibuot, Ekem Okop Item

NDI akanam ọmọsọn̄ ibuot onyụn̄ esịn ndinam se ẹdọhọde fi?— * Yak idọhọ ke afo ese n̄kpọ oro ete m̀mê eka fo ọkọdọhọde okûse ke TV. Ekem ke ama eketie ekere aban̄a emi, afo edikụt ke akpakana okop uyo ete ye eka fo. Owo kiet emi ọkọsọn̄de ibuot ekem edinam se ẹkedọhọde enye anam ekekere Naaman. Yak ise nte ẹken̄wamde enye etre ndisọn̄ ibuot.

Yak inam nte ikodu uwem n̄kpọ nte isua 3,000 emi ẹkebede. Naaman edi etubom udịmekọn̄ Syria. Se ededi emi enye ọdọhọde mbonekọn̄ esie ẹnam ke mmọ ẹsinam. Edi Naaman ọdọn̄ọ akpamfia emi esitade owo ikpaidem. Udọn̄ọ emi abiat enye uyai onyụn̄ ekeme ndidi esibiak enye etieti.

N̄wan Naaman enyene ekpri eyenufọk kiet emi otode Israel. Usen kiet, ekpri eyenan̄wan emi ọdọhọ ekaufọk esie ke prọfet Elisha emi odude ke obio mmimọ ekeme ndinam udọn̄ọ emi okụre eteufọk imọ. Ekem ẹtịn̄ n̄kpọ emi ẹnọ Naaman, ndien enye adaha inikiet ndika n̄kokụt Elisha. Enye akama ediwak enọ asan̄a ye mbonekọn̄ esie aka. Enye ebem iso aka ebịne edidem Israel eketịn̄ ọnọ enye se idade imọ idi.

Elisha okop emi onyụn̄ ọdọn̄ utom ọnọ edidem ete anam Naaman edi ebịne imọ. Ke ini Naaman esịmde ufọk Elisha, Elisha ọdọn̄ ẹkedọhọ enye ekeyere mmọn̄ ke Akpa Jordan  utịm ikatiaba. Elisha ọdọhọ ke emi ayanam akpamfia okụre Naaman. Afo ekere ke ikọ emi etie Naaman didie ke idem?—

Ikọ emi ayat enye esịt. Enye ọsọn̄ ibuot esịn ndinam se prọfet Abasi ọdọhọde. Enye ọdọhọ mbonekọn̄ esie ete: ‘Mme akpa edem nnyịn ẹfọn ẹkan kpukpru akpa Israel ndika n̄keyere mmọn̄.’ Naaman ọtọn̄ọ isan̄ unyọn̄. Edi ndi ọmọfiọk se mbonekọn̄ esie ẹbụpde enye?— Mmọ ẹbụp enye ẹte: ‘Edieke ekpedide akwa n̄kpọ ke prọfet oro ọdọhọ fi anam, nte ukpunamke? Ntak ndien mûnamke ekpri n̄kpọ emi enye ọdọhọde fi anam?’

Naaman okop onyụn̄ anam se mbonekọn̄ esie ẹdọhọde. Enye ọkọduọ ke akpa Jordan utịm ikotiokiet. Anam utịm ikatiaba, idem akpa enye ndikụt udọn̄ọ emi okụrede enye! Inikiet inikiet enye afiak aka edem Elisha emi edide n̄kpọ nte kilomita 48 ndikọkọm enye. Enye oyom ndinọ Elisha ikpọ enọ, edi prọfet emi ibọhọ enye n̄kpọ ndomokiet.

Edi Naaman eben̄e Elisha n̄kpọ kiet. Ndi ọmọfiọk se enye eben̄ede?— Enye eben̄e ete ẹnọ imọ ndusụk ntanisọn̄ obio oro, se ikemde mbiomo mule iba. Ndi ọmọdiọn̄ọ ntak emi enye oyomde ntan emi?— Enye ọdọhọ ke imọ iyom ndida ke ntanisọn̄ Israel emi ẹdide ikọt Abasi n̄wa uwa nnọ Abasi. Enye ọn̄wọn̄ọ ke imọ idikponoke abasi en̄wen ke mîbọhọke Jehovah! Enye isọn̄ke ibuot aba edi enyịme ndinam se ata Abasi ọdọhọde.

Ndi omokụt nte ekpekpebede Naaman?— Edieke edide emesisọn̄ ibuot nte enye, emekeme ndikpụhọde. Edieke okopde item, udusọn̄ke aba ibuot.

Kot ke Bible fo

2 Ndidem 5:1-19

Luke 4:27

[Ikọ Idakisọn̄]