Wuhrẹ Emọ Ra

Ọ Kake Se Vẹre, Rekọ O Yoẹme Uwhremu Na

KỌ WHO je veghe uzou vẹre, nọ whọ jẹ rọwo yoẹme he?— * Ẹsejọhọ who rri ifimu nọ ọsẹ hayo oni ra ọ ta kẹ owhẹ nọ who rri hi. Ẹsejọhọ, uwhremu na nọ who roro kpahe oware nọ who ru na, o tẹ da owhẹ gaga fikinọ who yoẹme he. Neaman yọ ọzae jọ nọ o yoẹme he nọ a kake ta kẹe nọ o ru oware jọ. Joma ruẹ epanọ a ro fi obọ họ kẹe nwene.

Ma rehọ iẹe nọ ma jọ uzuazọ ikpe idu esa (3,000) nọ i kpemu. Neaman ọ jọ oletu nọ o wuzou gaga evaọ ogbaẹmo Siria. Ọye ọ rẹ ta kẹ isoja riẹ oware nọ a re ru, yọ a je yoẹme riẹ. Rekọ Neaman o wo ekpehre ẹyao jọ nọ a re se oti. Ẹyao na ọ raha ovioma riẹ, yọ ẹsejọhọ o jẹ hae kẹe edada gaga.

Aye Neaman o wo odibọ ọmọtẹ ọsese jọ nọ a mu no orẹwho Izrẹl ze. Ẹdẹjọ, ọmọtẹ ọsese na ọ tẹ ta kẹ aye Neaman kpahe ọzae jọ nọ a re se Elaesha nọ ọ rrọ obọ Izrẹl. Ọmọtẹ na ọ ta nọ Elaesha ọ rẹ sai siwi oti Neaman kpo. Nọ Neaman o yo ẹme nana, ọ tẹ gwọlọ nọ ọ rẹ nyae ruẹ Elaesha ababọ okioraha. Te ọyomariẹ gbe isoja riẹ a tẹ ruọ edhere bi kpohọ obọ Izrẹl avọ ekẹ buobu nọ ọ wha lele oma. Nọ o te orẹwho Izrẹl, ọ tẹ nya bru ovie Izrẹl, jẹ ta oware nọ o wọ riẹ ze kẹe.

Nọ Elaesha ọ riẹ nọ Neaman ọ rọ fiki riẹ nyaze orẹwho Izrẹl, o te vi odibo riẹ bru ovie Izrẹl re ọ ta kẹ Neaman nọ ọ nya bru ei ze. Nọ Neaman o te uwou Elaesha, Elaesha o te vi odibo riẹ ruọ otafe re ọ vuẹ Neaman inọ o duwu omariẹ fihọ Ethẹ Jọdan isia ihrẹ. Elaesha ọ ta nọ otẹrọnọ Neaman o ru onana, ẹyao riẹ o ti kpo. Ẹvẹ who  roro nọ oware nọ a ta kẹ Neaman nọ o ru na o jariẹ oma?—

Eva e dha riẹ gaga. O veghe uzou, jẹ se nọ o re ru oware nọ Elaesha ọruẹaro Ọghẹnẹ ọ ta kẹe na ha. Ọ ta kẹ isoja riẹ nọ: ‘Ithẹ nọ e rrọ obọ ẹwho mai i woma vi enana nọ mẹ hẹ sae jọ họ.’ Neaman o te kuoma rẹriẹ bi zihe kpo. Kọ whọ riẹ onọ nọ isoja riẹ a nọ riẹ?— ‘O hae jọnọ ọruẹaro na ọ ta nọ who ru oware ulogbo jọ, kọ whọ gbẹ hai ru ei? Keme whọ jẹ se nọ who re ru omoware osese nana ha?’

Uwhremu na, Neaman ọ tẹ gaviezọ kẹ isoja riẹ, je ru oware nọ a ta kẹe na. O te duwu omariẹ fihọ ame ethẹ na isia ezeza. Nọ Neaman ọ va no ame na ze orọ avọ ihrẹ, akpọ o te gbei unu, keme oti na o no rie oma no. Enẹ ekpehre ẹyao riẹ na o ro kpo. Evaọ etẹe, Neaman ọ tẹ dhẹ oware wọhọ emaele 30 nyai yere Elaesha. Ọ gwọlọ nọ ọ rẹ kẹ Elaesha ekẹ eghaghae buobu, rekọ ọruẹaro na ọ rọwo mi ei hi.

Fikiere, Neaman ọ tẹ yare Elaesha oware jọ. Kọ whọ riẹ oware nọ ọ yare?— ‘Mẹ lẹ owhẹ nọ kẹ omẹ uwẹkpẹ nọ iruẹ ivẹ e rẹ sae wọ re mẹ wha kpo.’ Kọ whọ riẹ oware nọ o lẹliẹ Neaman yare nọ a kẹe uwẹkpẹ?— Neaman ọ gwọlọ jọ ehru uwẹkpẹ nọ a whẹ no orẹwho Izrẹl ze dheidhe kẹ Ọghẹnẹ. Kẹsena, Neaman ọ tẹ ya eyaa inọ ọ rẹ gbẹ gọ ẹdhọ vievie he ajokpanọ Jihova ọvo. Enẹ o ro nwene uruemu aghẹmeeyo riẹ, je mu ẹme họ eyo kẹ Ọghẹnẹ uzẹme na.

Kọ whọ ruẹ oware jọ nọ whọ rẹ sai wuhrẹ no uruemu Neaman ze?— Otẹrọnọ who je veghe uzou vẹre wọhọ Neaman, whọ rẹ sai nwene. O gwọlọ nọ whọ rẹ jẹ obọ nọ a bi fihọ kẹ owhẹ rehọ, jẹ whaha uruemu aghẹmeeyo.

Jọ Ebaibol ra se

2 Ivie 5:1-19, NW

Luk 4:27

[Oruvẹ-obotọ]