Churi-wawaykichikta yachachiychik

Qallariypi mana munachkaspanpas kasukurqam

¿HAYKAPIPAS sasachakurqankichu kasukunaykipaq?  * . . . Ichapas gustasusqayki kaqta televisionpi qawachkaptiki tayta-mamayki ama qawaychu nisuchkaptikipas qawarurqanki. Yaqapaschá mana kasukusqaykimanta cuentata qokuruspayki hukman sientekurqanki. Chaynam Naaman sutiyoq runapas qallariypiqa sasachakurqa hukkunapa nisqanta kasukunanpaq. Qawasun imam yanaparqa kasukuq kananpaq.

Piensariy kimsa waranqa wata ñawpaqta ima pasakusqanpi. Naamanmi Siria tropakunapa kamachiqnin karqa. Soldadonkunata imatapas kamachiptinmi paykunañataq kasukuqku. Chayna kachkaspanmi Naamanqa yacharurqa leprawan onqosqanta, chay onqoyqa aychapim millakuypaq qawakun, llumpaytaraqmi nanakunpas.

Warminpa sirvientanmi karqa Israel nacionniyoq huk warmacha. Huk punchawmi warmachaqa chay señoraman nirqa Israel nacionniyoq profeta Eliseo Naamanta hampiy atinanmanta. Chayta Naaman yacharuspanmi chaylla Eliseowan tupayta munarqa. Hinaspanmi Israel lawman soldadonkunapiwan pasarqa achka regalokunata apariykuspanku. Puntataqa Israelpa reyninmanraqmi yaykurqaku imanasqa yaykusqankumanta willanankupaq.

Chayta Eliseo yacharuspanmi reyman willachimurqa paypa wasinman Naaman rinanpaq. Wasinman chayaruptinñataqmi Eliseoqa mana chaskiq lloqsimurqachu, aswanqa sirvientenwanmi nichimurqa Jordan mayupi qanchis kutikama  bañakamunanpaq. ¿Imatam Naamanqa ruranman karqa? . . .

Llumpayta piñakuruspanmi Diospa profetan kasukuytapas mana munarqachu. Hinaspanmi soldadonkunata nirqa: “¿Kay mayupi bañakunaymantaqa manachu llaqtaypi kaq mayukunapi bañakuyman?”. Hinaspanmi wasinman kutikurqa. Ichaqa, ¿yachankichu soldadonkuna imam consejasqankuta?... Paykunam kaynata nirqaku: “Taytáy, Diosmanta willakuq imatapas sasa kaqta kamachisuptikiqa ¿manachum ruraruwaq? ‘Bañakaramuspaykiqa sanoyarunkim’ nichkaptillanqa bañakaramuyá”, nispa.

Paykunapa nisqanta kasukuspanmi bañakururqa. Yakumanta qanchis kuti kaq lloqsimusqanpim admirakuypaq kaq pasakurqa ¡lepra onqoyninmi chinkarusqaña! Chaymanta agradecekunanpaqmi chaylla Eliseopa wasinta rirqa, chaypaqqa illarqa yaqa 50 kilometrotam. Paymi aparqa ancha chaninniyoq regalokunata, Eliseom ichaqa mana chaskirqachu.

¿Yachankichu chay pasaruptin Naamanqa Eliseota ima mañakusqanmanta? . . . Paymi nirqa: “Ama hina kaspaykiyá kay llaqtaykipi allpata iskay mulapi apanaypaq kamaqta qoykuway”, nispa. ¿Imapaqmi chayta apanman karqa?... Diospa llaqtan Israelmanta apasqan chay allpapa hawanpi animalkunata kañapunanpaqmi. Prometekurqataqmi Jehová Diosllataña yupaychananpaqpas. Qawasqanchikman hinaqa qallariypi mana munaspanpas cheqap Diostam kasukurqa.

¿Imatam Naamanmanta yacharunki? . . . Payqa hukkunapa nisqanta uyarispanmi kasukurqa. Chaynaqa, sichu wakinpi kasukunaykipaq sasachakuspaykiqa pay hina cambiaytaqa atiwaqmi.

Bibliapi leenapaq

2 Reyes 5:1-19

Lucas 4:27

[Willakuy]