Ia Aʻoaʻo Lau Fanau

Na Lotomaaa o Ia, ae na Usitaʻi Mulimuli Ane

PE NA iai se taimi na e lotomaaa ai, ma iʻu ina e musu e usiusitaʻi?— * Atonu na e matamata i se polokalame o le televise na faatonuina oe e lou tinā ma lou tamā e aua e te matamata iai. Atonu o le a e toe salamō mulimuli ane ona o lou lē usiusitaʻi. O Naamanu le igoa o le tagata na musu muamua e usiusitaʻi. Seʻi tatou vaai po o le ā na fesoasoani iā te ia e lē toe lotomaaa ai.

Seʻi mafaufau faapea o loo e ola i le 3,000 tausaga ua mavae. O Naamanu o se alii tāua e pule i ʻautau a Suria. E na te avatuina faatonuga i ana fitafita, ma e usiusitaʻi foʻi i latou iā te ia. Peitaʻi, na maua Naamanu i se faamaʻi mataʻutia tele o le paʻu, e taʻu o le lepela. Na matuā auleaga ai lona tino, ma e mautinoa na oo foʻi iā te ia lagona tigā.

Sa iai se teine pologa a le avā a Naamanu mai i Isaraelu. I se tasi aso, na taʻu atu ai e le teine i lona matai tamaʻitaʻi e faatatau i le tamāloa e igoa iā Elisaia o loo i lona atunuu. Na ia faapea atu, e mafai ona ia faamālōlō iā Naamanu. Ina ua faalogo Naamanu i lenei tala, na vave lava ona ia manaʻo e alu atu iā Elisaia. Na ia ave le tele o meaalofa ma malaga atu loa ma ana fitafita i Isaraelu. Na alu atu o ia i le tupu o Isaraelu ma faailoa le māfuaaga ua ia alu atu ai.

Ina ua faalogo Elisaia i lenei tala, ona ia auina atu lea o se feʻau i le tupu ina ia auina mai Naamanu iā te ia. Ina ua taunuu Naamanu i le fale o Elisaia, na auina atu loa e Elisaia lana avefeʻau ina ia taʻu atu iā Naamanu, e alu e tofu faafitu i le vai o Ioritana. Na faapea atu Elisaia, o le faia faapea o le a faamālōlō ai Naamanu. O le ā sou manatu i  lagona o Naamanu e tusa ai ma lenei faatonuga?—

Ua ita Naamanu. Na lotomaaa ai lea o ia, ma musu e usiusitaʻi atu i le perofeta a le Atua. Na ia faapea atu i ana fitafita: ʻPe e lē sili ea vai o loo i loʻu nuu e mafai ona ou taʻele ai.’ Ua faliu Naamanu o le a toe foʻi. Ae pe e te iloa le mea na fesili atu ai ana fitafita iā te ia?— ʻAna fai atu e le perofeta iā te oe se mea faigatā, e te lē faia ea? Ae aiseā ua e lē faia ai lenei mea faigofie na ia talosaga mai ai?’

Na faalogo Naamanu, ma talia fautuaga a ana fitafita. Na faaono ona tofu ma ea aʻe Naamanu mai i le vai o Ioritana. Ae ina ua ea aʻe Naamanu mai i le vai i lona tofu faafitu, na matuā ofo o ia ina ua alu ese le faamaʻi o le paʻu sa maua ai o ia, ma ua toe maua lona malosi! Ona ia toe foʻi atu lea i le fale o Elisaia pe tusa o le 30 maila (48 kilomita) le mamao, ina ia faafetai atu iā te ia. Na ia manaʻo e foaʻi atu iā Elisaia ni meaalofa taugatā, ae na teena e le perofeta.

Ae na iai se mea na talosaga atu ai Naamanu iā Elisaia. Pe e te iloa lenā mea?— ʻSeʻi foaʻiina mai iā te aʻu ni avega eleele a ni asini se lua ou te alu ma aʻu.’ E te iloa le māfuaaga na ia manaʻo ai i na mea?— Na manaʻo Naamanu e ofoina atu meaalofa o le taulaga i le Atua, e faaaogā ai eleele mai i laueleele o tagata o le Atua o Isaraelu. Na folafola mai e Naamanu o le a lē toe tapuaʻi i se isi lava atua, ae tau lava o Ieova! Ua lē toe lotomaaa o ia, ae ua lotomalie e usiusitaʻi atu i le Atua moni.

Po o e iloa le mea e mafai ona tutusa ai oe ma Naamanu?— Pe afai e te lotomaaa e pei ona sa iai Naamanu, e mafai la ona suia lou tulaga. E mafai ona e talia le fesoasoani ma aua neʻi toe lotomaaa.

Faitau i lau Tusi Paia

2 Tupu 5:1-19

Luka 4:27

[Faaopoopoga i lalo]