Wala Shihilɛ He Sane

Wɔsɔɔmɔ Krɔŋŋ lɛ Ha Wɔkase Nɔ Ko ni He Hiaa Waa

Mɔ ni gba ji Olivier Randriamora

‘Mile ohia mli shihilɛ, ni mile nii amli shihilɛ hu; mihe ehomɔ yɛ nɔ fɛɛ nɔ kɛ nii fɛɛ mli: tɔɔ jio, hɔmɔ jio. Minyɛɔ nii fɛɛ mifeɔ yɛ mɔ ni wajeɔ mi lɛ mli.’—Fil. 4:12, 13.

BƆFO Paulo wiemɔi nɛɛ etee nɔ ewo mi kɛ miŋa Oly hewalɛ be kplaŋŋ. Beni wɔsɔmɔɔ Yehowa yɛ biɛ yɛ Madagascar lɛ, wɔkɛ wɔhe fɔ̃ enɔ kwraa, ni enɛ ha wɔkase nɔ ko ni he hiaa waa, taakɛ eji yɛ Paulo gbɛfaŋ lɛ.

Beni Yehowa Odasefoi kɛ Oly mami bɔi Biblia lɛ kasemɔ yɛ afi 1982 lɛ, no mli lɛ mi kɛ Oly ewo wɔhe shi momo kɛha gbalashihilɛ. Mi hu miha akɛ mi bɔi Biblia lɛ kasemɔ, ni sɛɛ mli lɛ Oly bafata mihe. Wɔbote gbalashihilɛ mli yɛ afi 1983, abaptisi wɔ afi 1985, ni no sɛɛ nɔŋŋ lɛ wɔkɛ wɔhe wo gbɛgbalɔi awamɔ nitsumɔ lɛ mli. Yɛ July 1986 lɛ, wɔbatsɔmɔ daa gbɛgbalɔi.

Yɛ September 1987 lɛ, wɔbɔi sɔɔmɔ akɛ gbɛgbalɔi krɛdɛi. He klɛŋklɛŋ ni wɔyasɔmɔ yɛ ji maŋ bibioo ko ni yɔɔ Madagascar kooyi-anaigbɛ, ní asafo ko bɛ jɛmɛ yɛ nakai beaŋ lɛ. Ayɛ akutsei wuji 18 kɛ wekui srɔtoi babaoo yɛ Madagascar, ni ayɛ kusumii srɔtoi babaoo. Malagasy ji wiemɔ titri ni awieɔ, shi ayɛ wiemɔ nɛɛ henɔi krokomɛi hu. No hewɔ lɛ, wɔbɔi wiemɔ ni awieɔ yɛ he ni wɔsɔmɔɔ yɛ lɛ kasemɔ, ni no ha mɛi ni yɔɔ jɛmɛ lɛ ná wɔhe miishɛɛ.

Shishijee lɛ, mihaa maŋshiɛmɔ daa Hɔgbaa, ni kɛ́ migbe naa lɛ Oly kome too tswaa edɛ̃. Wɔ pɛ wɔyɔɔ kpee lɛ shishi. Kɛfata he lɛ, wɔfeɔ Teokrase Sɔɔmɔ Skul lɛ mli nifeemɔi lɛ fɛɛ, ni Oly kwaa efeɔ tamɔ ekɛ shianyɛ ko miiwie. Kwɛ bɔ ni wɔmii shɛ wɔhe ha beni kpokpaa nɔkwɛlɔ ni basara wɔ lɛ wo wɔ ŋaa koni wɔtsake kpeei lɛ amli lɛ!

Akɛni anyɛɛɛ amu afɔ̃ post ɔfis ni yɔɔ jɛmɛ lɛ nɔ hewɔ lɛ, shika ni ahaa wɔ daa nyɔɔŋ nɔ lɛ baaa yɛ be naa. Enɛ ha wɔkase ohia mli shihilɛ. Be lɛ eko lɛ, wɔhiɛɛɛ shika ni fa ní wɔkɛaawo tsɔne kɛya kpokpaa nɔ kpee ko ní aafee yɛ he ko ni jɛkɛmɔ aaafee kilomitai 130 lɛ. Wɔkai ŋaawoo kpakpa ko ni wɔnaanyo Odasefonyo ko kɛha wɔ lɛ, akɛ: “Nyɛkɛa Yehowa nyɛnaagbai lɛ. Lɛ enii nyɛtsuɔ lɛ.” No hewɔ lɛ, wɔsɔle ni wɔkpɛ mli akɛ wɔbaatswa nantu. Shi beni wɔbaashi nɔŋŋ kɛkɛ ni nyɛmi nuu ko basara wɔ trukaa, ni eke wɔ shika—bɔ pɛ ni baashɛ wɔ tsɔnewomɔ!

KPOKPAA NƆKWƐMƆ NITSUMƆ

Yɛ February 1991 lɛ, mibatsɔ kpokpaa nɔkwɛlɔ. Nakai beaŋ lɛ, shiɛlɔi ni yɔɔ wɔkuu bibioo lɛ mli lɛ ayi efa kɛyashɛ mɛi 9, abaptisi amɛteaŋ mɛi 3, ni kɛ́ hooo lɛ mɛi 50 baa kpeei. Beni atsɔse mi sɛɛ lɛ, wɔyasɔmɔ kpokpaa ko yɛ  Antananarivo, ni ji maŋtiase lɛ. Yɛ afi 1993 lɛ, aha wɔyasɔmɔ kpokpaa ko ni yɔɔ maŋ lɛ bokagbɛ lɛ. Shihilɛ ni yɔɔ jɛmɛ lɛ yɛ srɔto kwraa kɛ́ akɛto bɔ ni eji yɛ maŋtiase lɛ mli lɛ he.

Kɛ́ wɔyaasara asafoi kɛ kui ni etse amɛhe banee lɛ, wɔnyiɛɔ, ni bei komɛi lɛ wɔnyiɛɔ aaafee kilomitai 145 kɛtsɔɔ gɔji kɛ amɛnɔ koo hayii anɔ. Wɔhaa wɔjatsu lɛ nɔ gbɔɔ kwraa. Shi be fɛɛ be ni abaajie sini afata kpokpaa nɔkwɛlɔ lɛ maŋshiɛmɔ lɛ he, taakɛ afeɔ bei komɛi yɛ nakai beaŋ lɛ, wɔjatsu lɛ tsiiɔ. Oly hiɛɔ nɔ ni akɛjieɔ sini lɛ, ni mi hu mihiɛɔ kar batre lɛ.

Bei pii lɛ, wɔnyiɛɔ aaafee kilomitai 40 daa gbi dani wɔyashɛɔ he ni asafo kroko ni wɔyaasara lɛ yɔɔ lɛ. Wɔkwɔlɔɔ gɔji ni wɔkpelekeɔ, wɔfoɔ fai, ni wɔnyiɛɔ kɛtsɔɔ ŋmɔtɔ mli. Bei komɛi lɛ, wɔwɔɔ gbɛjegbɛi ahe, shi bei pii lɛ wɔbɔɔ mɔdɛŋ akɛ wɔɔná akrowa ko wɔwɔ nakai gbɛkɛ lɛ. Bei komɛi hu lɛ, wɔbiɔ mɛikpɔji koni amɛha wɔbaye jenamɔ lɛ yɛ amɛshĩai amli. Kɛ́ wɔná wɔɔhe sɛɛ lɛ, wɔtoɔ niyenii he gbɛjianɔ. Oly yamaa tsɛŋsi, ni eyaa faa loo kpaakpo ni bɛŋkɛ lɛ naa eyayɛɔ nu. Mi hu miyamaa lema kɛyagbálaa lai ni wɔkɛbaahoo nii lɛ. Nɔ fɛɛ nɔ feemɔ heɔ be. Bei komɛi lɛ wɔheɔ wuɔ ní ebaabi ni wɔgbe ni wɔsaa.

Beni wɔye nii sɛɛ lɛ, wɔyafoɔ nu saŋŋ koni wɔná eko kɛju wɔhe. Bei komɛi lɛ wɔwɔɔ kpata lɛ shi. Kɛ́ nugbɔ nɛ ní tsũ lɛ miidu lɛ, wɔkpasaa gbogbo lɛ kɛwɔɔ koni wɔhe akafɔ.

Be fɛɛ be lɛ, wɔbɔɔ mɔdɛŋ akɛ wɔbaaye mɛi ní wɔyato lɛ odase. Kɛ́ wɔyashɛ he ni wɔyaa lɛ, gbɔfeemɔ kɛ suɔmɔ ni wɔnyɛmimɛi hii kɛ yei Kristofoi lɛ jieɔ lɛ kpo amɛtsɔɔ wɔ lɛ taa wɔtsuiŋ waa. Hiɛsɔɔ kpele kpo ni amɛjieɔ lɛ sɔŋŋ po haa wɔhiɛ kpaa naagbai ni wɔkɛkpe yɛ gbɛ lɛ nɔ lɛ anɔ.

Kɛ́ wɔyahi wɔnyɛmimɛi Odasefoi lɛ ashĩai lɛ, wɔnáa he miishɛɛ akɛ wɔɔye wɔbua amɛ kɛ amɛshĩa nifeemɔi. Enɛ haa amɛnáa be ni amɛkɛ wɔ yaa shiɛmɔ. Wɔkpaaa nibii ni jara wala loo niyenii pɔtsĩi ni mɛi ni wɔyato lɛ nyɛŋ aha wɔ lɛ gbɛ.

WƆYASARA KUI NI ETSE AMƐHE

Wɔmii shɛɔ wɔhe kɛ́ wɔyasara kui ni etse amɛhe banee lɛ, ni nyɛmimɛi hii ni yɔɔ jɛmɛ lɛ toɔ gbɛjianɔ kɛha nibii babaoo ní wɔbaatsu. Bei pii lɛ, wɔnáaa be ni ‘wɔkɛbaajɔɔ wɔhe fioo’ po. (Mar. 6:31) Yɛ he ko lɛ, Odasefonyo ko kɛ ehefatalɔ fɔ̃ amɛ-Biblia kaselɔi lɛ fɛɛ nine​—amɛyi 40​—kɛba amɛshĩa lɛ koni wɔfata amɛhe ni akɛ amɛ akase nii. Oly fata nyɛmi yoo lɛ he ni amɛkɛ mɛi aaafee 20 kase nii, ni mi hu mifata nyɛmi nuu lɛ he ni wɔkɛ mɛi 20 kroko lɛ kase nii. Kɛ́ wɔkɛ mɔ kome kase nii wɔgbe naa nɔŋŋ lɛ, mɔ kroko nyiɛ sɛɛ. Sɛɛ mli yɛ gbi lɛ mli lɛ, wɔkɛ asafoŋ kpeei lɛ fo mli, ni beni akpa nɔŋŋ lɛ, wɔbatsa Biblia mli nikasemɔi lɛ anɔ. Nakai etsa nɔ aahu kɛyashi gbɛkɛ ŋmɛlɛ kpaanyɔ sɛɛ!

Beni wɔyasara kuu kroko lɛ, wɔ fɛɛ wɔshi aaafee leebi ŋmɛlɛ kpaanyɔ koni wɔya akrowa ko ni bɛŋkɛ lɛŋ. Wɔ fɛɛ wɔwo atadei memeji. Wɔnyiɛ saŋŋ kɛtsɔ koo lɛ mli kɛyashi wɔyashɛ akrowa lɛ aaafee shwane ŋmɛlɛ nyɔŋma kɛ enyɔ. Wɔtsake wɔtadei lɛ, nɔŋŋ kɛkɛ ni wɔbɔi shiɛmɔ yɛ shinaa kɛ shinaa naa. Shĩai lɛ faaa, shi shiɛlɔi lɛ fa. No hewɔ lɛ, beni shɛɔ minitii 30 lɛ wɔtsu shikpɔŋkuku  lɛ fɛɛ mli nii wɔtã. Ni wɔtsa nɔ kɛtee akrowa ni tsa nɔ lɛ. Beni wɔshiɛ yɛ jɛmɛ wɔgbe naa lɛ, ebabi ni wɔku sɛɛ wɔnyiɛ gbɛ kakadaŋŋ kɛya shĩa. Enɛ je wɔnijiaŋ wui fioo. Wɔbɔ mɔdɛŋ wɔnyiɛ ŋmɛlɛtswai abɔ, shi ŋmɛlɛtswaa kome ko pɛ wɔkɛtsu shĩa kɛ shĩa nitsumɔ lɛ. Shi enɛ gbaaa Odasefoi ni yɔɔ jɛmɛ lɛ anaa. Amɛtee nɔ amɛná miishɛɛ.

Kuu ko ni etse ehe banee ni yɔɔ Taviranambo lɛ yɛ gɔŋ ko yiteŋ. Wɔyana Odasefoi aweku ko yɛ jɛmɛ ní amɛ fɛɛ amɛwɔɔ tsũ kome mli. Amɛyaa kpeei yɛ tsũ fioo ko ni ma amɛtsũ lɛ masɛi lɛ mli. Trukaa lɛ, mɔ ni wɔyato lɛ bo waa akɛ, “Nyɛmimɛi!” Gbee ko here nɔ kɛjɛ yiteŋgbɛ akɛ, “Yeei!” Mɔ ni wɔyato lɛ bo ekoŋŋ akɛ, “Kpokpaa nɔkwɛlɔ lɛ ebashɛ shi ee ei!” Ahere nɔ akɛ, “Yoo!” Aha mɛi krokomɛi hu ni yɔɔ sɛɛgbɛ shɔŋŋ lɛ nu adafitswaa lɛ. Nɔŋŋ kɛkɛ ni mɛi bɔi amɛhe naa buamɔ, ni beni ajeɔ kpee lɛ shishi lɛ, mɛi fe 100 yɛ jɛmɛ.

TSƆNEWOMƆ HE NAAGBA

Yɛ afi 1996 lɛ, aha wɔyasɔmɔ kpokpaa ko ní gɔji yɔɔ jɛmɛ ní bɛŋkɛ Antananarivo lɛ. Kpokpaa nɛɛ hu kɛ enaagbai. Abɛ trɔtrɔ ni yaa akrowai ni bɛŋkɛ lɛ amli be fɛɛ be. Wɔto gbɛjianɔ koni wɔyasara kuu ko ni yɔɔ Beankàna (Besakay), ní kɛ Antananarivo jɛkɛmɔ aaafee kilomitai 240 lɛ. Wɔkɛ tsɔne ko ni miiya jɛmɛ gbɛ lɛ kudɔlɔ lɛ ye naa, kɛkɛ ni wɔho wɔtara mli. Mɛi aaafee 30 yɛ tsɔne lɛ mli momo, mɛi komɛi kamɔ tsɔne lɛ yiteŋ ni mɛi komɛi hu kpɛtɛ sɛɛ.

Taakɛ efɔɔ baa lɛ, tsɔne lɛ fite, ni wɔnyiɛ kɛtsa nɔ. Beni wɔnyiɛ ŋmɛlɛtswai abɔ sɛɛ lɛ, tsɔne agbo ko banina wɔ. Gbɔmɛi kɛ jatsu eyi lɛ obɔ, shi fɛɛ sɛɛ lɛ tsɔne kudɔlɔ lɛ wa. Wɔkpɛlɛ akɛ wɔbaadamɔ shi, kɛkɛ ni wɔkwɔ tsɔne lɛ. Sɛɛ mli lɛ wɔyashɛ faa ko naa, shi no mli lɛ aasaa briji ni kã nɔ lɛ. Shikome ekoŋŋ lɛ, wɔsaa wɔtswa nantu kɛyashɛ akrowa bibioo ko ni gbɛgbalɔi krɛdɛi komɛi yɔɔ jɛmɛ lɛ. Eyɛ mli akɛ wɔtoko gbɛjianɔ kɛha amɛsaramɔ moŋ, shi wɔkɛ amɛ tee shiɛmɔ beni wɔmɛɔ koni asaa briji lɛ, koni wɔwo tsɔne kroko ni baabaho lɛ.

Otsi sɛɛ dani tsɔne ko ba, ni wɔtsa wɔgbɛfaa lɛ nɔ. Gbɛ lɛ nɔ eyi kɛ bui vóovoo. Wɔyi shi shii abɔ wɔwa kɛtsi tsɔne lɛ kɛfo nui ni tara gbɛ lɛ nɔ ní bata wɔnakutsei anaa lɛ, ni bei pii lɛ wɔtɛrɛɔ wɔgbeɔ shi. Wɔyashɛ akrowa fioo ko leebi maŋkpa, ni wɔyimɔ shi. Wɔshi gbɛjegbɛ lɛ  nɔ, ni wɔtswa nantu kɛtsɔ omɔ ŋmɔji kɛ amɛmli ŋmɔtɔ ni bata wɔhɛ lɛ amli kɛmiiya he ni wɔyaa lɛ.

Akɛni enɛ ji klɛŋklɛŋ ni wɔtee jɛmɛ gbɛ hewɔ lɛ, wɔkpɛ mli akɛ wɔbaaye mɛi ni tsuɔ nii yɛ omɔ ŋmɔji lɛ amli lɛ odase, ní wɔbi ni amɛtsɔɔ wɔ he ni Odasefoi ní yɔɔ jɛmɛ lɛ yɔɔ. Kwɛ bɔ ni wɔmii shɛ wɔhe ha beni wɔna akɛ nitsulɔi lɛ ji wɔmumɔŋ nyɛmimɛi lɛ!

WƆWO MƐI KROKOMƐI HEWALƐ NÍ AMƐBATSƆMƆ BE FƐƐ SƆƆLƆI

Yɛ afii ni eho lɛ amli lɛ, kɛ́ wɔna nɔ ni ejɛ hewalɛ ni wɔwo mɛi krokomɛi koni amɛkɛ amɛhe awo be fɛɛ sɔɔmɔ nitsumɔ lɛ mli lɛ mli kɛba lɛ, eŋɔɔ wɔnaa waa. Be ko beni wɔyasara asafo ko ni daa gbɛgbalɔi nɛɛhu yɔɔ mli lɛ, wɔwo gbɛgbalɔ fɛɛ gbɛgbalɔ hewalɛ ní ekɛfee oti ni ma ehiɛ akɛ ebaaye ebua shiɛlɔ kome koni lɛ hu ebatsɔ daa gbɛgbalɔ. Nyɔji ekpaa sɛɛ beni wɔyasara amɛ ekoŋŋ lɛ, amɛná gbɛgbalɔi 22. Nyɛmimɛi yei gbɛgbalɔi enyɔ wo amɛtsɛmɛi ní no mli lɛ amɛ fɛɛ amɛji asafoŋ onukpai lɛ hewalɛ, ni amɛ hu amɛbatsɔmɔ daa gbɛgbalɔi. Nyɛmimɛi hii enyɔ nɛɛ hu wo asafoŋ onukpa kroko hewalɛ, ni lɛ hu ebatsɔ daa gbɛgbalɔ. No sɛɛ etsɛɛɛ lɛ, akpɛlɛ onukpa nɛɛ nɔ ní esɔmɔ akɛ gbɛgbalɔ krɛdɛɛ. Sɛɛ mli lɛ, aha ekɛ eŋa yasɔmɔ akɛ kpokpaa nɔkwɛlɔ. Ni onukpai enyɔ krokomɛi lɛ hu? Mɔ kome miisɔmɔ akɛ kpokpaa nɔkwɛlɔ, ni mɔ kome hu miiye miibua kɛmiimamɔ Maŋtsɛyeli Asai.

Wɔdaa Yehowa shi daa yɛ yelikɛbuamɔ ni ekɛhaa wɔ lɛ hewɔ, ejaakɛ wɔle akɛ wɔnyɛŋ wɔfee nɔ ko yɛ wɔ diɛŋtsɛ wɔhewalɛ naa. Hɛɛ, bei komɛi lɛ wɔnuɔ he akɛ etɔ wɔ, ni hela hu mɔɔ wɔ, shi fɛɛ sɛɛ lɛ kɛ́ wɔkwɛ yibii ni ejɛ wɔsɔɔmɔ lɛ mli kɛba lɛ, wɔnáa miishɛɛ waa. Yehowa haa enitsumɔ lɛ shwereɔ. Eŋɔɔ wɔnaa akɛ wɔmiiná emli gbɛfaŋnɔ fioo ko, ni wɔmiisɔmɔ lɛ amrɔ nɛɛ akɛ gbɛgbalɔi krɛdɛi. Hɛɛ, wɔkase nɔ ko ni he hiaa waa—bɔ ni akɛ he fɔ̃ɔ Yehowa, “mɔ ni wajeɔ” wɔ lɛ nɔ.

[Wiemɔ ni akɔ ni akɛmiitsu nii ni yɔɔ baafa 6]

Wɔkase nɔ ko ni he hiaa waa​—he ní akɛfɔ̃ɔ Yehowa nɔ

[Shikpɔŋ he mfoniri/​Mfonirii ni yɔɔ baafa 4]

Madagascar, ní atsɛɔ lɛ Big Red Island lɛ ji ŋshɔkpɔi ni dara yɛ je lɛŋ fɛɛ lɛ ateŋ nɔ ni ji ejwɛ nɔ. Sũ tsuru ji nɔ ni yɔɔ jɛmɛ, ni tsei kɛ kooloi srɔtoi shwereɔ yɛ jɛmɛ

[Mfoniri ni yɔɔ baafa 5]

Wɔnyaa Biblia mli nikasemɔi afeemɔ he

[Mfoniri ni yɔɔ baafa 5]

Naagba wulu kome ni wɔkɛkpe ji tsɔne kɛgbɛfãa