Omombeʼu Olivier Randriamora

“Aikokuaa mbaʼeveʼỹ rehe ha mbaʼeta apytépe. Añehaʼã aime opaicharã ahasáva rovake; tyg̃uatã térã ñembyahýi [...]. Opa mbaʼe ikatu chéve g̃uarã Upe chemombaretéva rupive.” (Fili. 4:12, 13, JMP.)

KOʼÃ ñeʼẽ apóstol Pablo ohaivaʼekue akóinte oremokyreʼỹ, chéve ha che rembireko Ólype, roservívo ísla Madagascárpe. Tahaʼe haʼéva umi mbaʼe rohasáva, Pábloicha rohechakuaa roiko hag̃ua vyʼápe tekotevẽtereiha rojerovia Jehováre opaite mbaʼépe.

Áño 1982-pe, Oly sy oñepyrũ ostudia la Biblia umi testígo de Jehovándi. Che añepyrũ avei astudia ha Oly upérõ che nóvia, haʼe ohaʼarõmie ostudia hag̃ua. Upéi 1983-pe romenda, ha 1985-pe rojevautisa. Upe riremi rojapo ore prekursorádo auxiliár ha julio 1986-pe, roñepyrũ ore prekursorádo rregulár.

Septiembre 1987-pe roñenombra prekursór espesiál ha roñemondo peteĩ puévlo opytávape noroeste gotyo Madagascárpe, upépe ndaipóri kongregasión. Upe íslape oĩ 18 étnia ha heta grúpo orekóva diferénte kostúmbre. Upe tetãme oñeñeʼẽ malgáche, péro oĩ avei oñeʼẽva ambue hendáicha. Rog̃uahẽ rire, roaprende pe idióma oñeñeʼẽva upe puévlope ha upéicha rupi umi hénte orerendu porãve.

Ñepyrũrã káda domingo ajapo peteĩ diskúrso, ha ajapopa rire che rembireko hatã ojepopete chéve, haʼeñomínte oĩ. Rojapo avei káda semána Eskuéla Jaiporukuaa Hag̃ua la Biblia, Oly ojapo umi demostrasión ha oñeimahinánte orekoha iñirũ ojapóva hendive. Péro upéi pe superintendénte de sirkuíto orevisita ha heʼi oréve rojapo hag̃ua pe rreunión ambue hendáicha. Upéva tuicha orembopyʼaguapyve.

Upe íslape umi korréo oñemondóva sapyʼánte nog̃uahẽi, upéicha rupi ndororresivíri jepi pe platami ojeguerahaukáva oréve. Péro roñehaʼã roiko ikatumiháichante. Peteĩ jey, roho hag̃ua Aty guasu dos diaguápe, roviahavaʼerã 130 kilómetro ha ndororekopái ore pasaherã. Upérõ oremanduʼa peteĩ Testígo heʼivaʼekuére oréve: “Pehasa jave umi mbaʼe ijetuʼúva, pemombeʼu Jehovápe. Peẽ ningo pembaʼapopeína chupe g̃uarã”. Upémarõ roñemboʼe Jehovápe ha rodesidi roho yvýrupi. Péro rosẽ mboyvemi, orevisita peteĩ ermáno ha omeʼẽ oréve plataʼimi ha upépe rorekopáma ore pasaherã.

ROSERVI SIRKUÍTOPE

Febrero 1991-pe añenombra superintendénte de sirkuíto. Upérõ, pe grúpo roservihápe oĩma  9 maranduhára, umíva apytépe mbohapýma ojevautisa, ha rreunionhápe katu roime jepi 50 rupi. Upéi chembokatupyry hikuái superintendenterã ha oremondo peteĩ sirkuíto oĩvape Antananarívope. Áño 1993-pe katu roñemondo ótro sirkuítope, opytáva éste gotyo upe tetãme. Upépe umi hénte oiko lája idiferentete siudapeguágui.

Rovisita hag̃ua umi kongregasión ha grúpo oĩva mombyry, rohómi yvýrupi, sapyʼánte roguata 145 kilómetro sérro ha kaʼaguýre. Rogueraha umi mbaʼe tekotevẽkueténte. Péro upe tiémpope sapyʼánte ojehecha diapositíva pe diskúrso púvlikondi, upéicha jave Oly ogueraha pe projektór ha che katu agueraha peteĩ vatería de 12 vóltio.

Peteĩ kongregasióngui roho jave ótra kongregasiónpe, roguata jepi 40 kilómetro rupi káda día pe sérrore, rohasa rrío ha tuju. Rohokuévo, roheka peteĩ puévlo ropyta hag̃ua, péro sapyʼánte ropytántema roke tape yképe. Sapyʼánte rojerure avei umi hénte roikuaaʼỹvape ropytami hag̃ua hógape. Ha rotopa rire ropyta hag̃ua roñepyrũ rojapo ore senag̃ua. Oly oiporu peteĩ ólla pe óga járagui ha oho ogueru y pe rrío térã lágo hiʼag̃uivévagui, upe aja che akonsegi peteĩ hácha ha ajapo jepeʼa roñekosina hag̃ua. Opa koʼã mbaʼe rojapo hag̃ua ningo oraha tiémpo. Rojogua jepi avei ryguasu, rojuka ha romopotĩ rokosina hag̃ua chugui.

Rosenamba rire, rogueru y rojahu hag̃ua ha upéi roñeno roke pe kosináme. Ha okýramo katu rojekohápe parére orekoʼẽ ani hag̃ua otykypa orerehe.

Péro, katuete roñehaʼã ropredika umi óga járape. Ha rog̃uahẽvo pe kongregasión rovisitávape, umi ermáno imbaʼeporãiterei orendive. Rohechávo omombaʼetereiha rovisita haguére chupekuéra, oreresaraipa umi mbaʼe rohasavaʼekuégui tapére.

Ropyta jave umi ermáno rógape, roipytyvõ chupekuéra umi tembiapo ogapypeguápe. Upéicha haʼekuéra itiempove avei osẽ hag̃ua opredika orendive. Arakaʼeve norohaʼarõiva ermanokuéra omoĩ oréve tembiʼu hepýva térã ambue mbaʼe haʼekuéra ikatuʼỹvaʼerã ohupyty.

ROVISITA UMI GRÚPO OĨVA MOMBYRY

Igustoiterei vaʼekue oréve rovisita umi grúpo oĩva mombyry. Umi ermáno oreraʼarõmi vaʼerã heta tembiapo kongregasionpegua reheve ha apéna hemby oréve tiémpo ropytuʼu hag̃ua (Mar. 6:31). Pór ehémplo, peteĩ ermáno ha hembireko oinvita hógape 40 iñestudiántepe rostudia hag̃ua hendivekuéra la Biblia. Oly ojapo 20 estúdio pe ermánandi, ha che upéicha rupi avei ajapo pe ermánondi. Rostudiapa peteĩ ndive ha roñepyrũ ótrondi, upéi ropoi rojapo hag̃ua pe rreunión ha opa rire rosegi jey rostudia. Upéicha roho hese ropytuʼuʼỹre pyharepyte peve.

Rovisita jave ambue grúpo oĩva mombyry, enterove maranduhára ndive roho ropredika peteĩ aldéa hiʼag̃uivévape. Rosẽ pyhareve las ocho rupi ha rohasátagui kaʼaguy rupi, romonde ore  ao tujánte. Las doce rupi rog̃uahẽ pe territóriope, romonde ore ao potĩ ha roñepyrũ ropredika. Oreretaiterei ha pe aldéa michĩ rupi, média órape rojapopáma. Upégui rohasa ambue aldéape, ha ropredikapa rire upépe, roju jey. Ñepyrurã oremokangyʼimi upéva, hetaiterei roguata rog̃uahẽ hag̃ua pe territóriope, ropredika una óra rupi ha roju jeýma. Péro umi ermáno ndojekehái ha akóinte ikyreʼỹ.

Taviranambópe oĩ avei peteĩ grúpo opytáva mombyry, haimete peteĩ sérro ruʼãme. Rog̃uahẽvo rotopa peteĩ óga ikoty peteĩva oikoha peteĩ família Testígo. Ijykére oĩ peteĩ ogaʼi ojeporúva ojejapo hag̃ua umi rreunión. Upeichaháguinte, pe ermáno osapukái ha heʼi: “¡Ermanokuéra!”. Pe sérro ruʼãgui oñehendu heʼíva: “¡Si!”. Pe ermáno osapukái jey: “¡Og̃uahẽma superintendénte!”. Ótro ombohovái: “¡Oĩma!”. Péicha oavisapaite hikuái umi mombyry oikóvape, ha upéi oĩma og̃uahẽva oúvo. Ha oñepyrũrõ g̃uarã pe rreunión ijatýma 100 tapicha rupi.

ROHASA HETA MBAʼE ROVIAHA JAVE

Áño 1996-pe roñekambia ótro sirkuítope, opytáva ag̃uive Antananarívogui, pe lugár ijyvatevehápe pe ísla mbytépe. Upépe rohasa avei heta mbaʼe ijetuʼúva, pór ehémplo, peteĩ árape rovisitavaʼerã peteĩ grúpo oĩva Beankànape (Besakay), opytáva 240 kilómetro Antananarívogui, péro nameméi oike kolektívo upe lugárpe. Upéi roikuaa peteĩ kamionéta ohotaha upe gotyo, ha roñemongeta porã rire pe chofér ndive, oheja oréve roho hendivekuéra. Upe kamiónpe oĩma voi treinta pasahéro rupi, oĩ ohóva pe kamión técho ári ha oñakãramava ijatukupére.

Hetaiterei vése oñembyai tapére pe kamión. Upévare rosegi yvýrupi, ha heta óra roguata rire ou peteĩ kamión tuicháva. Upe kamión henyhẽ pasahérogui ha ogueraha avei heta mbaʼe, upéicharõ jepe opyta. Rojupi pype rohótaramo jepe roñemboʼyhápe. Upéi rog̃uahẽ peteĩ rrío oĩháme, péro upe javete oñembaʼapo pe puéntere, upéicha rupi rosegi jey yvýrupi. Hasýpe rog̃uahẽ peteĩ puevloʼi oĩháme umi prekursór espesiál. Ndorohóiramo jepe rovisita hag̃uáicha chupekuéra, ropyta ropredika hendivekuéra oñemyatyrõmba peve pe puénte ha ohasa jey peve ótro kamión.

Una semána haguépe roviaha jey, upépe ae ohasa ótro kamión. Pe tape ijyvykuapa ha pyʼỹinte roike ýpe ore rrodílla guive romyaña hag̃ua  pe kamión. Heta vése roñepysãnga ha roʼa. Koʼẽtĩ rupi rog̃uahẽ peteĩ puevloʼípe ha upépe roguejypa. Rosẽ pe tape prinsipálgui ha rosegi roguata arrotýre, orekuʼa guive roike pe y kyʼápe rog̃uahẽ meve pe lugár rohohápe.

Primera vés rohaságui upérupi, ropredika umi ombaʼapóvape ha roporandu chupekuéra mbaʼéichapa ikatu rog̃uahẽ umi testígo de Jehová rógape. Rovyʼaiterei roikuaávo haʼekuéra voi haʼeha Testígo.

ROMOKYREʼỸ ERMANOKUÉRAPE OIPORUPAITE HAG̃UA ITIÉMPO JEHOVÁ SERVÍSIOPE

Umi áño ohasávape, rovyʼaiterei rohechávo umi mbaʼe porã ojehupytýva romokyreʼỹgui ermanokuérape oiporupaite hag̃ua itiémpo Jehová servísiope. Peteĩ kongregasiónpe roʼe umi nueve prekursór rregulárpe, káda uno oñehaʼã hag̃ua oipytyvõ peteĩ maranduhára jepe ojapo hag̃ua avei iprekursorádo. Roho jeývo upe kongregasiónpe seis mése haguépe, oĩma 22 prekursór. Mokõi prekursóra omokyreʼỹ ituvakuérape, oservíva ansiánoramo kongregasiónpe ojapo hag̃ua iprekursorádo. Koʼã ansiáno omokyreʼỹ avei ótro ansiánope. Péicha mbohapy ansiánoma ojapo iprekursorádo. Ha pe mbohapyha upe riremínte oñenombra prekursór espesiál ha upéi oservi superintendénteramo. ¿Ha mbaʼépa oiko umi mokõi ansiánogui? Peteĩva oservi superintendénte de sirkuítoramo ha pe ótro oipytyvõ oñemopuʼã hag̃ua Salón del Reino.

Káda día roagradese Jehovápe roikuaágui haʼe ore pytyvõguínte rohupytyha opa mbaʼe. Sapyʼánte ore kaneʼõ térã ore rasýramo jepe, rovyʼa rojepyʼamongetávo umi mbaʼe rohupytyvaʼekuére predikasiónpe. Ojekuaa Jehová ovendesiha opa mbaʼe ojejapóva iservísiope, ha rovyʼaiterei ikatu haguére roipytyvõ michĩmi jepe roservívo prekursór espesiálramo. Rohechakuaa, tahaʼe haʼéva pe jahasáva, javyʼa hag̃ua jajeroviavaʼerãha Jehováre opaite mbaʼépe, haʼe ningo pe ‘ñanemombaretéva’.

[Komentário oĩva páhina 6-pe]

Rohechakuaa, tahaʼe haʼéva pe jahasáva, javyʼa hag̃ua jajeroviavaʼerãha Jehováre

[Taʼanga ha mápa oĩva páhina 4-pe]

Madagascar (ijyvy pytã rupi oñehenói chupe Gran Isla Roja) oĩ cuatrohápe umi ísla tuichavéva apytépe ha oguereko heta plánta ha mymba ndaipóriva ótro hendápe

[Nóta oĩva taʼanga ndive páhina 5]

Rohasa heta mbaʼe roviaha jave

[Nóta oĩva taʼanga ndive páhina 5]

Igustoiterei oréve romboʼe ore rapichápe la Biblia