Umlando Wokuphila

“Ifihlo” Esayifunda Ekonzwenethu Ecwengileko

Ilandiswa ngu-Olivier Randriamora

‘Ngiyakwazi ukutlhaga, nokuba nomnono. Kikho koke nakibo boke ubujamo ngafunda ifihlo yakho kokubili ukusutha nokulamba . . . Nginamandla wokujamelana nakho koke, ngebanga laloyo ongipha amandla.’—Fil. 4:12, 13.

AMEZWI wompostoli uPowula la bekasolo asikhuthazo esikhulu kimi nakumkami, u-Oly. NjengoPowula, safunda “ifihlo” ngokuthembela kuJehova ngokuzeleko nesimkhomzako lapha eMadagascar.

Ngo-1982 aboFakazi BakaJehova nebathoma ukufunda iBhayibhili nonina lika-Oly, mina no-Oly besele sithembisene umtjhado. Nami ngamukela isifundo seBhayibhili, begodu kamva no-Oly wasijoyina. Satjhada ngo-1983, sabhabhadiswa ngo-1985, begodu msinyana ngemva kwalokho sathoma ikonzo yobuphayona besigiyani. Ngo-Julayi 1986, saba maphayona wesikhathi esizeleko.

NgoSeptemba 1987, sathoma ukukhonza njengamaphayona akhethekileko. Isabelo sethu sokuthoma besisedorobhaneni elincani elingetlhagwini tjhingalanga yeMadagascar lapho belingekho ibandla. EMadagascar kuneenqhema ezi-18 eziyihloko zamasiko kuhlanganise neenkoro ezinengi, begodu iinkolelo namasiko wakhona kuhluke khulu. Kukhulunywa ilimi lesiMalagasy, kodwana godu kunezinye iinlimi ezikhulunywako. Ngalokho sathoma ukufunda ilimi elikhulunywa esabelweni sethu esitjha, begodu lokho kwasisiza bona samukeleke msinyana emphakathini.

Ekuthomeni, benginikela ikulumo yenengi qobe ngoSondo, ngemva kwalokho u-Oly angibethele izandla ngehlonipho. Bekuba ngithi kwaphela ababakhona. Godu besinehlelo elipheleleko leSikolo Sekonzo Sezulwini, u-Oly nekanikela ikulumo yakhe bekenza ngasuthi ukhuluma nomninimuzi namtjhana angekho. Qala bona sathaba kangangani umbonisi wesifunda osivakatjheleko ngomusa nekaphakamisa bona sitjhentjhe iimhlangano yethu!

Ngebanga lokobana iposi beyingathembakali, besingayifumani qobe imali yethu yesibonelelo yaqobe nyanga. Ngalokho, safunda ukuphila ngokuncani. Kesinye isenzakalo, besinganamali eyaneleko yokukhwela ibhesi siye emhlanganweni wesifunda, egade ukude pheze ngamakhilomitha ali-130. Sikhumbula isiluleko esihle esasifumana komunye uFakazi esikunye naye, esithi: “Tjelani uJehova ngeemrarwenu. Ngaphezu kwalokho, nenza umsebenzakhe.” Ngalokho, sathandaza saqunta ukukhamba ngeenyawo. Nokho, ngaphambi kobana sikhambe, singakalindeli savakatjhelwa mzalwana othileko begodu wasipha isipho semali—elingene patsi imali yebhesi!

UMSEBENZI WOKUBHODA

NgoFebherbari 1991, ngabekwa bona ngibe mbonisi wesifunda. Ngesikhatheso, isiqhema sethu esincani besande ngabarhuweleli aba-9, aba-3 babo  bebabhabhadisiwe, begodu besinesilinganiso sabantu aba-50 abeza emhlanganweni. Ngemva kokubandulwa, sakhonza isifunda esisehloko dorobha, e-Antananarivo. Ngo-1993, sabelwa esifundeni esisengcenyeni yepumalanga yendawo leyo. Ubujamo bokuphila lapho bebuhluke khulu kunebedorobheni.

Bona sifike emabandleni neenqhemeni ezikude, besikhamba ngeenyawo, ngezinye iinkhathi pheze amakhilomitha ali-145 emahlathini ahlangeneko aseentabeni. Besiphatha iimthwalo elula. Kuliqiniso, nanyana kunini ikulumo yenengi yombonisi wesifunda neyihlanganisa umboniso weenthombe ezifitjhani (slide),njengombana bekuba njalo ngezinye iinkhathi, umthwalo wethu bewuba budisi. U-Oly bekaphatha umtjhini wokutjengisa iinthombe ezifitjhani, mina bengithwala ibhethri lekoloyi.

Kanengi besihlanganisa amakhilomitha ama-40 ngelanga bona sifike ebandleni elilandelako. Endleleni besehla sikhuphuka iintaba, siyama iimlambo, sikhamba edakeni. Ngezinye iinkhathi, besilala eqadi kwendlela, kodwana ngokujayelekileko besilinga ukufumana indawo esingalala kiyo ubusukobo. Ngezinye iinkhathi sibawe abantu esingabaziko bona basilalise ubusukobo. Ngemva kokufumana indawo yokuhlala, besithoma ngokulungisa ukudla. U-Oly bekaboleka ipoto yokupheka begodu aye ngemlanjeni oseduze ayokukha amanzi. Nekasayileko, bengiboleka izembe ngikape iinkuni bona sizokupheka. Yoke into beyithatha isikhathi. Ngezinye iinkhathi, besithenga ikukhu ephilako, bese kufuze siyiqunte begodu siyihlube.

Ngemva kokudla, besikhamba siyokukha amanye amanzi wokuhlamba. Ngezinye iinkhathi besilala ngekhwitjhini. Nelinako, besilala sisame ngeboda, bona singathambi indlu neyinethelako.

Besihlala sifakaza ebantwini esifikele kibo. Nesifika lapha size khona, umusa nomoya wokungenisa iimvakatjhi wabanakwethu nabodadwethu abamaKrestu bewusithinta ngaphakathi. Ukuthokoza kwabo okusuka ehliziyweni ngokubakhambela kwethu bekusenza sibukhohlwe boke ubudisi esiqalana nabo endleleni.

Nesihlala eemzini yaboFakazi esikunye nabo, besikuthabela ukubasiza ngeemsebenzi yekhaya. Lokhu bekubenza bahlanganyele nathi ekonzweni yesimini ngokutjhaphulukileko. Khenge silindele ukufumana izinto zehlobo eliphambili namtjhana ukudla okukhethekileko abantu esifikele kibo engeze bakghona ukukuthenga.

UKUVAKATJHELA IINQHEMA EZIKUDE

Besikuthabela ukuvakatjhela iinqhema ezikude, lapho abazalwana bebasihlangabeza ngehlelo elimajadu. Besinganaso isikhathi ‘sokuphumula isikhatjhana.’ (Mar. 6:31) Kenye indawo, isibili esiboFakazi samema zoke iimfundo zaso zeBhayibhili—ezi-40—emzinaso bona sizokuhlanganyela naso eemfundweni zaso. U-Oly wajoyina udade ekurageni iimfundo ezi-20, begodu mina benginomzalwana siraga ezinye ezi-20. Esinye nesikhambako, msinyana bekuthoma esinye isifundo. Ngokukhamba kwelanga, besiphumula bona sibe neemhlangano yebandla, ngemva kwalokho iimfundo zeBhayibhili beziragela phambili. Ilanga elimajadu beliphela ngemva kwe-iri lobunane ebusuku!

Nesivakatjhela esinye isiqhema, soke sangena indlela pheze nge-iri lobunane ekuseni saya endaweni  engumakhelwana. Soke besembethe izembatho ezidala. Ngemva kokukhamba isikhathi eside sikhamba ehlathini, safika esimini leyo emini. Sembatha izambatho ezihlwengileko begodu msinyana sathoma ukutjhumayela emzini nomuzi. Izindlu bezimbalwa begodu abarhuweleli babanengi. Ngalokho sahlanganisa isimu yoke ngeemzuzu epheze ibe ma-30. Ngemva kwalokho sadlulela kenye indawo. Ngemva kokutjhumayela, saqalana nekhambo elide lokubuyela ekhaya. Kokuthoma, ikambiso le yasidanisa kancani. Besinikele ngesikhathi esinengi namandla kodwana besitjhumayele isikhathi esipheze sibe li-awara linye. Nokho, aboFakazi bendaweni leyo khenge banghonghoyile. Bahlala bathabile.

Esinye isiqhema esikude eTaviranambo besiseduze nesiqongo sentaba. Safumana lapho umndeni waboFakazi bahlala ekamurweni yinye. Omunye umakhiwo omncani oseduze bewusetjenziswa njengendawo yokubambela umhlangano. Msinyana, umuntu esifikele kwakhe warhuwelela ngelizwi elikhulu wathi, “Banakwethu!” Kwasabela ilizwi livela esiqongweni sentaba eseduze lathi “Yebo!” Esafikela kwakhe warhuwelela godu wathi, “Umbonisi wesifunda ufikile!” Kwasabela ilizwi lathi, “Siyeza!” Umlayezo wadluliselwa nakwabanye abahlala kudenyana. Msinyana abantu bathoma ukubuthana, begodu kwathonywa umhlangano, kwaba nabantu abangaphezu kwe-100.

IINTJHIJILO ZEZINTO ZOKUKHAMBA

Ngo-1996 sabelwa esifundeni esiseduze ne-Antananarivo, epakameni emaphakathi. Isifundesi godu saba neentjhijilo zaso. Bezingafumaneki qobe iinkhwelo zomphakathi eziya emaphandleni. Besihlelelwe bona siyokuvakatjhela isiqhema esiseBeankàna (Besakay), esikude ngamakhilomitha ama-240 ukusuka e-Antananarivo. Ngemva kokukhulumisana nomtjhayeli, sambawa bona asikhweze elorini encani egade iya ngapha siya ngakhona. Bekunabanye abakhweli aba-30 ngaphakathi elorini begodu abanye baphezu kwayo abanye balenga ngemva kwayo.

Njengombana kanengi bekwenzeka, ikoloyi msinyana yaphuka, saragela phambili sakhamba ngeenyawo. Ngemva kobana sikhambe kabuthaka ama-awara athileko, kwavela ilori ekulu. Beyizele abantu nezinto, kodwana nanyana kunjalo umtjhayeli wajama. Sakhwela, samukela bona sizokujama ngeenyawo. Kwamva safika emlanjeni, kodwana ibhlorho belilungiswa. Godu sahlika sakhamba ngeenyawo begodu ekugcineni safika endaweni encani, lapho bekunamanye amaphayona akhethekileko ahlala khona. Nanyana bewangekho erhelweni lethu, sasebenza nawo isikhathi esithileko sitjhumayela njengombana besisalindele bona ibhlorho lilungiswe nokobana sifumane enye into yokukhamba.

 Kwadlula iveke ngaphambi kobana kuvele ikoloyi, saragela phambili nekhambo lethu. Indlela beyizele imigodigodi emikhulu. Kanengi bekufuze sisize ekusunduzeni ikoloyi singemanzini afika emadolweni, besikhutjwa begodu siwe. Ngamathathakusa, safika endaweni encani, sahlika. Sisuka endleleni ekulu siya lapho sabelwe khona, saragela phambili sakhamba ngeenyawo sadlula esimini yereyisi, emanzini anedaka afika edinini.

Bekulivakatjho lethu lokuthoma endaweni leyo, ngalokho saqunta ukufakaza ebantwini egade basebenza esimini yereyisi begodu sabuza bona singabafumanaphi aboFakazi bendawo le. Qala bona sathaba kangangani ukufumana bona iinsebenzezi, eqinisweni zibanakwethu abangokomoya!

UKUKHUTHAZA ABANYE BONA BANGENELE IKONZO YESIKHATHI ESIZELEKO

Ngemva kweemnyaka eemnengi, kwasithabisa khulu ukubona iimphumela yokukhuthaza abanye bona bangenele ikonzo yesikhathi esizeleko. Nesivakatjhele elinye ibandla ebelinamaphayona alithoba wesikhathi esizeleko, sakhuthaza iphayona ngalinye bona lizibekele umnqopho wokusiza umrhuweleli munye bona angenele ikonzo yamaphayona. Nesilivakatjheleko ngemva kweenyanga ezisithandathu ezalandelako, amaphayona wesikhathi esizeleko besele ama-22. Abodade ababili abamaphayona bakhuthaza aboyise, bobabili egade babadala, bona babe maphayona wesikhathi esizeleko. Ngemva kwalokho, abazalwanaba bakhuthaza umdala wesithathu bona abajoyine. Ngemva kwesikhatjhana umdala wesithathu wabekwa njengephayona elikhethekileko. Ngokukhamba kwesikhathi, yena nomkakhe bathoma emsebenzini wokubhoda. Kuthiwani ngabanye abadala ababili? Omunye ukhonza njengombonisi wesifunda, omunye njengesisebenzi sokuzithandela sokwakha amaWolo woMbuso.

Sithokoza uJehova qobe langa ngesizo lakhe, njengombana sibona bonyana angeze sifikelele litho ngamandla wethu. Liqiniso, ngezinye iinkhathi sizizwa sidiniwe begodu sigule, nanyana kunjalo siyathaba nesiqala iimphumela yekonzwethu. UJehova wenza umsebenzakhe uthuthuke. Siyathaba ukuba nengcenye encani kiwo, njengombana kwanje sikhonza njengamaphayona akhethekileko. Kwamambala, siyifundile “ifihlo” ngokuthembela kuJehova, ‘osipha amandla.’

[[Umkhangiso osekhasini 6]

Siyifundile “ifihlo” ngokuthembela kuJehova

[UMebhe/Iinthombe ekhasini 4]

IMadagascar, ebizwa ngokobana yi-Big Red Island, sihlengele sesine esikhulu ephasini. Ihlabathi yakhona ibomvu, begodu kunezinto ezinengi eziphilako ezifumaneka endaweni le

[Isithombe ekhasini 5]

Siyakuthabela ukuhlanganyela eemfundweni zeBhayibhili

[Iinthombe ekhasini 5]

Ukukhamba bekungesinye seentjhijilo ezikulu esakhe saqalana naso